Jarystyń birinshi raketkalary bolyp tirkelgen Anna Danılına men Valerııa Strahova fınalda argentınalyq Marııa Lýrdes Karle jáne reseılik Marııa Tımofeevamen bas júldeni sarapqa saldy. Birinshi partııada argentınalyq-reseılik jup 6:2 esebimen basymdyq tanytsa, ekinshi partııada Anna men Valerııa ese qaıtardy – 6:3. Sheshýshi básekede qazaqstandyq-ýkraınalyq tennısshiler sýper taı-breıkte qarsylastarynan jeńisti julyp aldy – 14:12.
Osylaısha, Anna Danılına juptyq syndaǵy óziniń 25-shi tıtýlyn jeńip alsa, Strahovamen birge qatarynan besinshi týrnırde úzdik shyqty. Sondaı-aq bul Anna Danılınanyń ITF sanatyndaǵy 24-shi jeńisi. Danılına osy jyldyń qańtarynda Sıdneıde WTA 250 serııasy týrnırinde brazılııalyq Beatrıs Haddad Maııamen birge jeńiske jetken bolatyn.
