Is-shara ótken Dostyq úıiniń ǵımaraty osydan 50 jyl buryn irgetasyn qalaǵan. Osy mereıli kúntizbege oraılastyrǵan jıynda qazaq jáne ózge ult ókilderinen shyqqan aqyn-jazýshylardyń qazaq jáne ózge tilderge aýdarylǵan shyǵarmalarynan kórme uıymdastyryldy. Almatydaǵy zııaly qaýym, shyǵarmashylyq ókilderi bas qosqan alqaly jıynǵa QHA Tóraǵasynyń orynbasary Marat Ázilhanov, Memleket basshysynyń keńesshisi Málik Otarbaev qatysty.
Jıyn barysynda ult ulylyǵynyń qaıta jańǵyryp, memlekettiń nyǵaıyp, kúsh alýyna Qazaqstannyń árbir jas azamaty múddeli degen máseleler qozǵaldy. Assambleıaǵa eldiń jańa ımıdjin jáne ulttyń jańa biregeıligin qalyptastyrýǵa úles qosý, qoǵamdyq dıplomatııany damytý men dostyq elshileriniń korpýsyn keńeıtý sııaqty mindetter júktelip otyr. Sondaı-aq kezdesý sheńberinde etnomádenı birlestiktermen ózara is-qımyldyń ózekti tustary da aıtyldy. QHA tarapynan kez kelgen ýaqytta is-qımyl kezeńderine daıyn ekendigi aıtyldy.
Jıyn barysynda sóz tizginin alǵan Málik Otarbaev referendým nátıjesi qazaqstandyqtardyń ishki mádenıetiniń, saıası mádenıetiniń jańa sapalyq deńgeıge kóterilgenin, saıası ózgeristerdi qalaıtynyn, sonymen birge el bolashaǵyna degen alań kóńilin de kórsetkenin aıtty. «Qoǵamdaǵy ózgeristerdi el kórip-bilip otyr. Bılik pen qoǵam arasyndaǵy senimsizdik sındromy seıile tústi. Halyqtyń saıası mádenıeti men kózqarasy da ózgeristerge qaraı beıimdelip, joǵarylap keledi. Demek bul qoǵamdaǵy saıası mádenıettiń qalyptasa bastaǵandyǵynyń belgisi bolsa kerek. Birligimizdi saqtaı otyryp, saıası mádenıetimizdi damytý mańyzdy», dep atap ótti M.Otarbaev.
«Vaınah» cheshen-ıngýsh ortalyǵynyń mádenıetti damytý qaýymdastyǵynyń teń tóraǵasy Mýrad Ahmedov óz sózinde referendým nátıjesi tek memlekettik qurylymdy, bılik júıesin ǵana emes, qoǵamdyq sanadaǵy ózgeristerge de sebep bolýy tıis ekenin aıtty.
«Táýelsizdikten bergi ýaqyttaǵy saıasat Qazaqstanda turatyn ózge ult ókilderine qysym kórsetti dep eshkim aıta almaıdy. Kerisinshe egemendik jekelegen ulttardyń mádenıetti damytý qaýymdastyǵy arqyly ulttyq mádenıetin damytýǵa múmkindik berdi. Endigi jerde QHA memlekettik til – qazaq tilin damytýdy basty baǵdarǵa alýy tıis. Til máselesiniń aıtylyp kele jatqanyna 30 jyl boldy. Osy ýaqyt aralyǵynda ómirge kelgen bala 30 jastaǵy at jalyn tartyp mingen azamat boldy. Tildiń saıasat sheńberine syımaıtyn názik qubylys ekenine bárimiz kýá boldyq. Endigi jerde Qazaqstannyń memlekettik tili osy elde turatyn barlyq ult pen ulysty biriktiretin, ortaq maqsatqa jumyldyratyn til ekenin dáleldeıik» dep sózin túıindedi M.Ahmedov.
Almaty
