• 24 Sáýir, 2014

Aqparattar aǵyny

2 mın

oqý úshin

Egemen Qazaqstan

● Qazaqstan bıylǵy marketıngtik jyly 7 mln. tonnadan astam astyqty eksportqa shyǵardy. «Azyq-túlik korporasııasy» UK» AQ basqarýshy dırektory-kommersııalyq dırektory Nurbek Daıyrbekovtiń aıtýynsha, ústimizdegi jyldyń eksporttyq áleýeti shamamen 9,5 mıllıon tonnany quraıdy. «Biz Aýyl sharýashylyǵy mınıstrligi kórsetken áleýetke qol jetkiziledi dep oılaımyz», – dedi ol. ● Elimizde «Jasyl el» baǵdarlamasyna 650 mln. teńge bólinip otyr. Bilim jáne ǵylym mınıstri Aslan Sárinjipov bıyl atalmysh baǵdarlama qataryna 20-30 myń stýdent tartylatynyn jetkizdi. Olar negizinen ózderi bilim alyp jatqan qalany kógaldandyrý men kórkeıtý jumystaryna atsalysady. ● Astanada Jeńis kúnine oraı 60-tan astam merekelik is-shara uıymdastyrylady. Osy merekelik dýman kúnderi barlyq ardagerlerge 150 myń, Uly Otan soǵysyna qatysýshylar men múgedekterine, sondaı-aq, solarǵa teńestirilgenderge 20 myń, tyl eńbekkerlerine 10 myń teńgeden bir rettik áleýmettik kómek kórsetiledi. ● Aqtóbede bos oryn jármeńkesinde 400-den astam jumys orny usynyldy. Qaladaǵy «Dostyq» úıinde ótken kezekti qalalyq jármeńkede oblys kásiporyndary men uıymdary 401 bos jumys ornyn alǵa tartty. Áleýmettik jumys oryndarynda 19 bos oryn bolsa, turaqty jumys oryndarynda 382 bos oryn úleske tústi. ● Qazaqstandyqtar tasqynǵa ushyraǵan Atbasar turǵyndaryna 45 mln. teńge aýdardy. Qalada qazir tabıǵat apatynan japa shegip, úısiz-kúısiz qalǵan jandarǵa kómek qolyn sozýǵa nıet bildirýshilerdiń sany kún sanap artyp keledi. ● Mańǵystaý oblysyndaǵy aýyldyq okrýgter ákimderi jańa kólikterge qol jetkizdi. Oblys ákimi Alık Aıdarbaev aýdandardaǵy eldi mekender men Fort-Shevchenko qalasynyń ákimderine 33 «Nıva» jáne 1 «Kia Cerato» avtomobılderiniń kiltterin tapsyrdy. ● Jambyl oblysynda úkimettik emes uıymdarǵa 186,1 mln. teńge bólindi. О́tken jylǵydan 51,7 mln. teńgege artyq bul soma 35 lot boıynsha taratylady. Bul týraly oblys ákiminiń birinshi orynbasary Bekbolat Orynbekov osy uıymdar ókilderimen kezdesýi kezinde málimdedi. ● О́skemende koreı mádenı ortalyǵy qurylyp, iske kiristi. Qaladaǵy «Kvanson» Qazaqstan-Koreıa kolledjiniń bazasynda ashylǵan bul meken О́skemen jáne Kannyna qalalarynyń baýyrlas atanýyna baılanysty paıda boldy. BNews.kz, Altaynews.kz, Egemen.kz aqparlary men «Znamıa trýda» gazeti saıttary boıynsha daıyndaldy.