Jarystyń kezekti kúninde 67 kıloda synǵa túsken jerlesimiz eki baǵdarlamada da úzdik shyǵyp, álem chempıonatynyń altynyn jeńip aldy. Erasyl Sáýlebekov julqa kóterýde 123 kılo ziltemirdi eńserse, serpe kóterýde 158 kılony baǵyndyrdy. Sóıtip, eki jattyǵýdyń qorytyndysy boıynsha 281 kılomen Meksıkada Qazaqstannyń Ánuranyn shyrqatty. Ekinshi oryndy jerlesimizden úsh kılo (278 kg) kem kótergen túrkııalyq Alaaddın Saın ıelense, qola júlde polshalyq Bartosh Býrskıkege buıyrdy. Ol qossaıysta 269 kılony (116+153) basynan asyra kóterdi.
Aıta keteıik, bul – Qazaqstan quramasynyń jasóspirimder arasyndaǵy álem chempıonatyndaǵy alǵashqy altyny jáne úshinshi medali. Buǵan deıin qyzdar arasyndaǵy 40 kıloda synǵa túsken Aleksandra Belenko men erler arasyndaǵy 55 kıloda Erasyl Omarov álem chempıonatynyń qola júldesin jeńip alǵan bolatyn.
