Kompanııa basshysy Premer-Mınıstrge kompanııanyń Qazaqstandaǵy qyzmeti men jańa jobalardy iske asyrý perspektıvalary týraly aıtyp berdi.
Qazirgi ýaqytta Yildirim Holding Aqtóbe oblysynda hrom kenin jáne konsentratyn óndirý boıynsha tabysty jumys istep keledi, sondaı-aq «Qazgeologııa» AQ-men birlesip, shıkizat bazasyn tolyqtyrý aıasynda Pavlodar, Qaraǵandy jáne Shyǵys Qazaqstan oblystarynda geologııalyq barlaý júrgizip jatyr.
R.Iý. Iyldyrymnyń aıtýynsha, 2013 jyldan bastap holdıng Qazaqstan ekonomıkasyna $500 mln-nan astam ınvestısııa salǵan.
Kezdesý barysynda Álıhan Smaıylov QR Úkimeti Yildirim Holding kompanııasynyń Qazaqstandaǵy eń iri túrik ınvestorlarynyń úshtigine kiretinin eskere otyryp, bizdiń elge ınvestısııalardy keńeıtýdi quptaıtynyn jetkizdi.
Premer-Mınıstr holdıng bastamashylyq etken Jambyl oblysynda kalsıılendirilgen soda óndirý zaýytyn salý jobasy úlken mańyzǵa ıe ekenin atap ótti. Atalǵan jobany iske asyrý nátıjesinde Qazaqstan ony ımporttaýdan eksporttaýǵa kóshýi tıis.
«Bul joba Qazaqstan-Túrkııa ınvestısııalyq yntymaqtastyǵy tarıhynda serpindi bolatyny sózsiz. Memleket qazirdiń ózinde qajetti ınfraqurylymdy qamtamasyz etý boıynsha óz mindettemelerin oryndaýǵa kiristi. Osyǵan baılanysty 2025 jylǵa deıin zaýytty iske qosý úshin qurylys-montajdaý jumystarynyń belsendi kezeńi bastalady dep otyrmyz», dedi Álıhan Smaıylov óz sózinde.
О́z kezeginde R.Iý Iyldyrym qazaqstandyq áriptesterine jobalardy júzege asyrýda kórsetken kómegi úshin alǵys bildirip, Yildirim Holding Qazaqstanmen yntymaqtastyqty keńeıtýge daıyn ekenin atap ótti.
