Jaqynda halyqaralyq IT-startaptar tehnoparki alǵash ret Caspian Startup-2022 halyqaralyq baıqaýy aıasynda uıymdastyrǵan Demo Day is-sharasy ótti. Jańa jobaǵa qatysýshy NIS oqýshylary áýeli úsh aı boıy AstanaHub-ta onlaın oqýdan ótip, tálimgerlermen birlesip óz jobalaryn ázirlegen bolatyn. Keıin úzdik shyqqan joba avtorlary óz týyndylaryn kórsetip, qorǵaý úshin Aqtaý qalasyna jınaldy.
Demo Day alańyna shyqqan jobalar ishinde Oraldaǵy NIS komandasynyń «NFT-oıatqysh L7RK» startapy úzdik dep tanyldy. Bul joba óte qyzyq: uıqydan erte turǵan adam baı bolady! Oraldyq ónertapqyshtar jasaǵan NFT saǵaty óz qojasyn uıqydan erte oıatady. Arnaıy tekseristiń kómegimen ıesiniń uıqydan turǵanyna kóz jetkizgen soń, baǵdarlama oǵan token (krıptovalıýta) esepteıdi. Osylaı jınalǵan qarajatty ıesi sıfrlyq dollarǵa aıyrbastap nemese basqa sıfrlyq ámııandarǵa aýdara alady.
«Bul jobany jasaǵan komandanyń ár múshesiniń óz mindeti bar: Adelıa Sháýkeneva top kóshbasshysy bolsa, Almas Saparov pen Azamat Orazǵalı – mobıldi jasaqtaýǵa jaýapty, Ernur Násipqalı – veb-dızaıner jáne frontend, Abylaı Mámetan – analıtık maman», deıdi oraldyq NIS baspasóz hatshysy Aıdana Hamıdýllına.
Jeńimpazdar mobıldi qosymshany ázirlep bolyp, endi AstanaHub-tyń BlockChainBattle-de baq synap kórmek. О́nertapqysh ul-qyzdardyń jetekshisi, mektep muǵalimi Oral Qydyrshaev osyndaı baıqaýlar oqýshylardy óz isin qalaı bastaýǵa, óz ónimin tanystyrý jáne kompanııalarmen qarym-qatynas ornatýǵa úıretetinin aıtady.
Taǵy bir jańalyq – komandanyń beldi múshesi Almas Saparov keshe ǵana INFOMATRIX-ASIA halyqaralyq konkýrsynda pnevmonııanyń bar-joǵyn lezde anyqtaıtyn ChestXRayAl qosymshasy úshin altyn medal ıelendi. Bul baıqaýǵa Qazaqstanmen birge Túrikmenstan, Tájikstan, Qyrǵyzstan jáne basqa elderdiń ókilderi qatysqan bolatyn.
Radıologterge qolǵanat bolatyn osyndaı baǵdarlama jasaý ıdeıasy avtorǵa pandemııa kezinde kelgen eken. Ol úshin medısınalyq ortalyqtardan jınalǵan 6 myńǵa jýyq rentgen sýreti bar bazany paıdalanyp, vızýaldy keskinderdi ózi taldaı alatyn konvolıýsıondy neırondyq jeli jasalǵan.
– Bul baǵdarlama rentgen sýreti arqyly ókpe qabynýyn 92 paıyz dáldikpen anyqtaıdy. Mamandar ár sýretti qarap, keńesip, dıagnostıka úshin 15 mınýt jumsasa, ChestXrayAI jasandy ıntellektisine birneshe sekýnd jetkilikti, – deıdi Almastyń ǵylymı jetekshisi, mektep muǵalimi Borıs Zelenov.
Batys Qazaqstan oblysy
