«Sımpozıýmnyń maqsaty – halyqaralyq dárejedegi sýretshilermen tyǵyz baılanys ornatyp, elimizdiń mádenı qoryn keńeıtý, qazaq eliniń mádenıeti men ónerin, áleýmettik-ekonomıkalyq damýyn, rýhanı baıýyn sýretshilerdiń qylqalamy arqyly jetkizý. Halyqaralyq sýretshiler arasynda dostyq, mádenı-shyǵarmashylyq baılanysty damytý jáne nyǵaıtý» deıdi osy is-sharany uıymdastyrýshy, joba avtory Kamıla Japalova. Aıta keteıik, Kamıla Ábenqyzynyń ózi de Qazaqstan Sýretshiler odaǵynyń múshesi, Qazaqstan Respýblıkasynyń mádenıet qaıratkeri, halyqaralyq zamanaýı óner akademııasynyń múshesi, BatikKami mádenı qorynyń dırektory.
Halyqaralyq sýretshilerdiń basyn qosyp, tájirıbe almasýyna múmkindik beretin bul joba elimizde 2018 jyldan beri ótedi. Bıyl Mádenıet jáne sport mınıstrliginiń qoldaýymen sımpozıýmǵa Ázerbaıjan, О́zbekstan, Túrikmenstan, Qyrǵyzstan, Tájikstan elderinen jas ónerpazdar qatysty. Olardyń ishinde Túrkııanyń Ankara qalasynda turatyn Zamıra Shahın, Ázerbaıjannan Ramına Saadathan, О́zbekstannan Sardor Allabergenovter, sondaı-aq qazaqstandyq Jeńis Moldabekov, Sembiǵalı Smaǵulov, Dáýrenbek Beknazarov, Baqytnur Berdisbekov, Aınabek Ospanov, Nurbek Járdemov sekildi qylqalam sheberleri bar. Joba aıasynda plener, konferensııa, kórme jáne sheberlik saǵattary ótkizildi.
15 maýsym kúni sımpozıýmnyń ashylý saltanatynda Kamıla Ábenqyzy beıneleý óneriniń búgini men erteńi taqyrybynda baıandama jasady.
– Sulýlyq – áıel zatyna ǵana tán dúnıe emes. Sulýlyq – bizdi qorshaǵan orta hám jan dúnıemiz. Sondyqtan da biz sımpozıým ataýyn «Sulýlyq álemdi qutqarady» dep qoıdyq. Mundaı is-sharalar el órkenıetiniń damýyna septigin tıgizedi. Oraldaı ádemi qalada sýretshiler erkin jumys istep, jaqsy nátıje kórsetedi degen oıdamyn. Jastar sheberlik saǵattaryna qatysyp, tájirıbeli sýretshilerden dáris alatyn bolady, – dedi Kamıla Japalova.
Jıynda Qazaqstannyń eńbek sińirgen qaıratkeri, halyqaralyq «О́ner kavaleri» ordeniniń, «Álemdik beıbitshilik sýretshisi» qurmetti ataǵynyń ıegeri Sembiǵalı Smaǵulov, Qazaqstannyń eńbek sińirgen qaıratkeri, Qazaqstan Respýblıkasy Kórkemóner akademııasynyń akademıgi, Halyqaralyq Turan syılyǵynyń laýreaty, Sýretshiler odaǵynyń múshesi Aınabek Ospanov, Ázerbaıjan Sýretshiler odaǵynyń múshesi, fotograf Ramına Saadathan jáne basqalary sóz sóılep, óz oılaryn ortaǵa saldy.
– Qazaqstanǵa alǵash kelýim. Oral – óte taza qala eken. Maǵan jaqsy áser etip jatyr. О́zim Baký qalasynda turamyn, sýretshimin. Kóbinese suńǵat janrynda jumystanamyn. Neoekspressıonızm baǵytyndaǵy kartınalarym kópshilikke unaıtyn sııaqty. Ańyz-áńgimeler, adamnyń óz-ózin tanýy – meniń negizgi taqyrybym. Neoekspressıonızm – 1970 jyldardyń sońynda paıda bolǵan modernıstik nemese postmodernıstik keskindeme men músin stıli. Shagal, Matıss, Pıkasso shyǵarmashylyǵy janyma jaqyn. Osyndaı sımpozıýmdar tájirıbe almasý úshin kerek. Bul bastama bolashaqta da jalǵasyn tabady degen oıdamyn. Aldaǵy ýaqytta qazaqstandyqtardy Qarabaqta ótetin sharaǵa shaqyramyz, – deıdi sýretshi Ramına Saadathan.
Sımpozıýmnyń ár kúni qyzyqqa toly boldy. 16-18 maýsym kúnderi meımandar Oraldaǵy murajaılar men mádenıet oshaqtaryn aralady. Ashyq aspan astynda sheberlik sabaǵyn ótkizdi. Mahambet atyndaǵy Batys Qazaqstan ýnıversıteti «Dızaın jáne beıneleý óneri» mamandyǵynda oqıtyn stýdenttermen kezdesip, erkin taqyrypta birge sýret saldy. Qazaqstan Sýretshiler odaǵynyń músheleri Baqytnur Berdisbekov «Portret», Almas Nurǵojaev «Oral qalasynyń tabıǵaty men tarıhy» taqyryptarynda sheberlik saǵattaryn ótkizdi.
19 maýsym kúni «Sulýlyq álemdi qutqarady» kórmesi ashyldy. Oǵan Qazaqstan Respýblıkasy Mádenıet jáne sport vıse-mınıstri Nurǵısa Dáýeshov qatysyp, qatysýshylarǵa mınıstr Dáýren Abaevtyń alǵysyn jetkizdi.
– Eýropa men Azııany jalǵap jatqan Aqjaıyq óńirinde keremet is-shara ótti. Sýretshiler bes kún boıy Oralda sýret saldy, óz tájirıbesimen bólisti. Jalpy, elimizdiń tarıhy men mádenıetin bederlep, máńgilikke qaldyrýda sýret óneriniń mańyzy zor. Qazaqstan Respýblıkasy Mádenıet jáne sport mınıstri óńirlerde túrli is-shara ótkizýdi qolǵa aldy. Almatyda, Túrkistan jáne basqa da qalalarda aýqymdy is-sharalar ótýde. Oralda ótken sımpozıýmnan jastar kóp nárse úırendi, bildi dep oılaımyn, – dedi Nurǵısa Muratuly.
Batys Qazaqstan oblysy
