Kolledjderge qujat qabyldaý bastaldy

Bilim berý granttarynyń basym bóligi tehnıkalyq mamandyqtarǵa bólinedi: IT, qurylys, ınjenerııa, metallýrgııa. Taǵy bir jaǵymdy jańalyq bar. Endi aldaǵy oqý jylynda qazaqstandyq kolledjder «Robototehnıka jáne kiriktiriletin júıeler», «Addıtıv óndirisi tehnologııalary», «Ǵımarattardy jobalaý men paıdalanýdyń avtomattandyrylǵan júıeleri», «Grafıka jáne mýltımedııa dızaıny», «Landshaft dızaıny» jáne basqa da jańa mamandyqtar boıynsha kadrlar daıarlaýdy bastaıdy. Talapkerlerge yńǵaıly bolý úshin qujattardy qabyldaý úrdisi avtomattandyryldy. Qujattar Egov.kz elektrondy úkimet portaly arqyly qabyldanyp jatyr. Sondaı-aq qabyldaý kolledjderde dástúrli qaǵaz formatynda da júzege asyrylady. Budan bylaı talapkerler birden 4 mamandyqty tańdap, elimizdiń 4 kolledjine qujat tapsyra alady. 2021 jyly bilim berýdiń ashyqtyǵy men qoljetimdiligin qamtamasyz etý úshin mınıstrlik «aqsha stýdenttiń sońynan júredi» qaǵıdaty boıynsha memlekettik tapsyrystardy bólýdiń jańa mehanızmin engizdi. Buǵan deıin granttardy kolledjder arasynda bilim basqarmalary ornalastyryp kelse, endi memlekettik tapsyrys talapkerlerdiń tańdaýy boıynsha bólinedi. Iаǵnı túlek qaıda oqýǵa túskisi kelse, bıýdjet aqshasy sol jerge jiberiledi.

«Búgingi tańda 9-synyp túlekteriniń 70%-ǵa jýyǵy elimizdiń kolledjderinde memleket esebinen tegin oqyp jatyr. Bıyl memlekettik tapsyrysty 45 myń orynǵa kóbeıttik. Sondaı-aq mınıstrlik jumysqa ornalastyrý mindettemesimen kásiporyndardyń suranysy boıynsha kadrlardy maqsatty daıarlaýdy engizdi. Iаǵnı qazirdiń ózinde balalardyń jumysqa ornalasýyna kepildik beriledi. Bul eńbek naryǵynyń suranysyna saı mamandardy shyǵarýǵa jáne olardy daıarlaý sapasyn arttyrýǵa múmkindik beredi. Memlekettik tapsyrysty ornalastyrýdaǵy ashyqtyq barlyǵyna tehnıkalyq jáne kásiptik bilimniń qoljetimdiligin qamtamasyz etedi jáne kolledjder arasyndaǵy básekelestikti arttyrady», dep túsindirdi QR Oqý-aǵartý mınıstrligi Tehnıkalyq jáne kásiptik bilim departamentiniń dırektory Nasymjan Ospanova.

Orta býyn jáne qoldanbaly bakalavr mamandyqtaryna túsetin talapkerler arasynda irikteý bilim basqarmalarynyń aqparat júıesi arqyly júrgiziledi. Konkýrs sertıfıkattyń mindetti jáne beıindik pánderiniń ortasha baly boıynsha ótkiziledi. Jumysshy mamandyǵyn alǵysy keletin orta mektep túlekteri, sondaı-aq erekshe bilim berý qajettiligi bar balalar kolledjge áńgimelesý qorytyndysy boıynsha qabyldanady. Olar Egov.kz arqyly onlaın ótinish bere alady nemese qujattardy tikeleı kolledjge tapsyra alady. Pedagogıkalyq, medısınalyq jáne shyǵarmashylyq mamandyqtarǵa túsetin túlekter arnaıy ne bolmasa shyǵarmashylyq emtıhandar tapsyrady nemese áńgimelesýden ótedi. Olardy kolledjderdiń qabyldaý komıssııalary júrgizedi. Memlekettik tapsyrys boıynsha 9-synyp talapkerleri arasyndaǵy konkýrs 19-22 tamyz aralyǵynda ótedi. Al 11-synyp jáne kolledj túlekteri arasyndaǵy baıqaý 22-25 tamyz aralyǵynda ótedi. О́ner jáne mádenıet mamandyqtaryna túsetinder úshin baıqaý 29 shilde men 2 tamyz aralyǵynda ótedi. Byltyrdan bastap kvota sanattarynyń tizimi keńeıtilgenin de atap óteıik.

«Kvota 9 sanatqa beriledi. Kópbalaly otbasy balalary úshin 5%, keminde úsh jyl tolyq emes otbasy mártebesi bar otbasy balalary úshin - 1%, bala kezinen múgedek balalardy tárbıelep otyrǵan otbasylardan shyqqan balalar, I jáne II toptaǵy múgedekter úshin - 1% kvota engizildi. Upaılar teń bolǵan jaǵdaıda kvota sanaty men sertıfıkattyń ortasha baly esepke alynady», dep atap ótti Nasymjan Ospanova.

Aıana Toǵanbek