Saıasat • 27 Maýsym, 2022

«Jańa Qazaqstan» – arnaıy júlde

Senatta jýrnalıster arasyndaǵy «Parasat» baıqaýynyń jeńimpazdaryn saltanatty marapattaý rásimi ótti. Bıyl «Parasat» baıqaýyna 100-den astam jumys kelip túsken. Avtorlardyń qatarynda elordamen birge óńirlerdegi telearna, radıo, gazet, aqparattyq portal jáne basqa da buqaralyq aqparat quraldarynyń qyzmetkerleri bar.

Tabıǵat MUSYLMANQUL

BAQ ókilderin kásibı merekelerimen quttyqtaǵan Senat Tóraǵasy Máýlen Áshimbaev Memleket basshysynyń reformalaryn jáne «Jańa Qazaqstan» tujyrymdamasyn iske asyrýdy zańnamalyq turǵydan qamtamasyz etý jolyndaǵy senatorlardyń jumysyna toqtaldy. Bul baǵytta Palatanyń aqparattyq ashyqtyǵyna basa mán beriledi.

«Senat jumysynda qyzmetimizdiń ashyqtyǵyna jáne BAQ ókilderimen tyǵyz baılanysqa árdaıym erekshe kóńil bólemiz. Bul – biz úshin mańyzdy baǵyt. Biz Senattyń zań shyǵarý qyzmetin halyqqa jan-jaqty jetkizýge múddelimiz», dedi Máýlen Áshimbaev.

Senat Spıkeri depýtattar qabyldanatyn zańdardyń sapasyna tereń mán beretinin aıtty. Sondaı-aq olar azamattardy alańdatqan máselelerdi únemi kóterip keledi. Osy jumystardy jurtqa jetkizý úshin Senat dástúrli buqaralyq aqparat quraldarymen jáne mass-medıamen birlesip jumys isteýdi jalǵastyra beredi. Sonymen qatar Palata Tóraǵasy Senattyń zań shyǵarý qyzmetin halyqqa dáriptep júrgen jýrnalısterdiń parlamenttik pýlyna, elimizdegi telearna, radıo, baspasóz redaksııalaryna alǵys bildirdi.

Sonymen «Parasat» baıqaýynyń 2022 jylǵy jeńimpazdary bolyp «Úzdik televızııa materıaly» atalymy boıynsha «Habar 24» telearnasynyń jýrnalısi Dastan Seıilhanuly jáne Astana TV telearnasynyń tilshisi Iаna Gladkova tanyldy. Al «Úzdik baspasóz materıaly» atalymyn áriptesimiz, Egemen Qazaqstan gazetiniń aǵa tilshisi Abaı Otar jeńip aldy. Dál osyndaı atalymmen «Rýdnyı Altaı» Shyǵys Qazaqstan oblystyq gazetiniń ujymy marapattaldy.

Stan.kz aqparat portalynan Aınur Muhadı men «BESsımptomno» telegram-kanalynyń jetekshisi Serikjan Máýletbaı «Internet basylymdardaǵy úzdik materıal» atalymynda oq boıy ozyp shyqsa, «Áleýmettik jelilerdegi úzdik materıal» atalymyn «Suraýy bar» YouTube arnasynyń avtory Erbol Seıilhan jáne qoǵam qaıratkeri Marat Shıbutov ózara bólisti.

«Jańa Qazaqstan» arnaıy júldesi úzdik saraptamalyq materıaly úshin Qazaqstan ulttyq telearnasynyń jýrnalısi Jalǵas Altaev pen «Eýrazııa» birinshi arnasynyń «Granı» televızııalyq baǵdarlamasyna berildi. «Parlamenttik jýrnalıstıkany damytýǵa qosqan úlesi úshin» arnaıy júldesi Tengrinews.kz aqparattyq portalynyń ujymy jáne «Kazahstanskaıa pravda» gazetiniń jýrnalısi Laýra Túsipbekovaǵa tapsyryldy.