«Tórtjyldyqtyń basty básekesinde otandastarymyz álemniń eń myqty sportshylarymen kúsh synasyp, elge abyroımen oraldy. Tarıhı jeńiske toly Sýrdlımpıadada qazaqstandyq atletter erekshe belsendilik tanytyp, joǵary jetistikterge qol jetkizdi. Atap aıtqanda, Shonký Haırathaan eki altyn medal ıelenip, sensasııa jasaǵanymen erekshe quttyqtaımyn. Bul nátıje eldegi Sýrdlımpıada sportynyń damýyna keremet serpin beredi degen úmittemin», dedi Mádenıet jáne sport mınıstri D.Abaev jıynnyń ashylý rásiminde.
Saltanatty is-shara barysynda Mádenıet jáne sport mınıstrliginiń atynan Sýrdlımpıada oıyndarynyń jeńimpazdary, júldegerleri jáne olardyń jattyqtyrýshylary alǵys hatpen marapattaldy. Sondaı-aq sýrdlımpıadalyq sport túrlerin qoldaý maqsatynda memleket tarapynan beriletin qarjylaı syıaqy mólsheri Olımpıada jáne Paralımpıadamen teńestirilgen. Iаǵnı atalǵan jarysta birinshi oryn alǵan sportshyǵa – 250 000, ekinshi orynǵa – 150 000, úshinshi orynǵa – 75 000, tórtinshi orynǵa – 30 000, besinshi orynǵa – 10 000 jáne altynshy orynǵa 5 000 AQSh dollary berildi.
«Búgin elorda tórinde Sýrdlımpıada jeńimpazdaryna kóńil bólip, qurmet kórsetkenine alǵysymyz sheksiz. Jeńiske jetýime qoldaý kórsetken Mádenıet jáne sport mınıstrligine, Qazaqstan Respýblıkasynyń Úkimetine alǵys aıtamyn. Barlyq jeńimpazdy jetistigimen quttyqtaımyn», dedi XXIV jazǵy Sýrdlımpıada oıyndarynyń eki dúrkin jeńimpazy Shonký Haırathaan.
Aıta keteıik, bıylǵy Sýrdlımpııa oıyndary mamyrdyń 1-15 aralyǵynda Brazılııadaǵy Kashıas-dý-Sýl qalasynda uıymdastyryldy. Álemniń 100 elinen 4 000-nan astam sportshy qatysqan jarysta jerlesterimiz jalpy sany 28 júlde (3 altyn, 7 kúmis, 18 qola) enshilep, jalpykomandalyq esepte 13-orynǵa taban tiredi.
Medal kórsetkishi boıynsha Ýkraına sportshylaryna teń keler qarsylas tabylmady. Olar 138 (62 altyn, 38 kúmis, 38 qola) medal jıyntyǵyn oljalap, týrnır kestesinde top jardy. Ekinshi oryn alǵan AQSh quramasynyń qorjynynda 55 (20, 11, 14) medal bar bolsa, úshinshi oryndaǵy Iran sportshylary 40 (14, 12, 14) júlde jeńip aldy.
