Salada sapaly ilgerileý bar

Jıynda birinshi bolyp sóz alǵan «Ata­meken» UKP Tóralqasy týrızm komıtetiniń tóraıymy Iýlııa Iаkýp­baeva kóptegen synǵa qaramastan, Qazaqstanda týrızm salasy qarqyndy damyp kele jatqanyn atap ótti.

«Týrızm – Qazaqstanda eń kóp synala­tyn salanyń birine aınaldy. Biraq men elimizde týrızm joq degen sózben kelispeımin. Menińshe, keıingi jyldary otandyq týrızm óte qarqyndy damyp jatyr. Búkil el boıynsha jańa demalys oryndary qurylýda. Týrıstik ónimder qalyptasyp, ınfraqurylym da damýdyń dańǵyl jolyna túsken. Statıstıkaǵa kóz júgirter bolsaq, demalys oryndarynda týrıster sany 22%-ǵa, kelý týrızmi boıynsha ósim 34%-ǵa artty. Týrıster sany tek Nur-Sultan, Almaty qalalary, Býrabaı, Túrkistan jáne Mańǵystaý óńirlerinde artyp qana qoımaı, qal­ǵan aımaqtarda da qarqyn alyp kele jatqanyn baıqaýǵa bolady. Logıstıka, ınfraqurylym boıynsha áli de kóptegen másele bar­ ekeni sózsiz. Degenmen bári óz keze­gimen júrip jatyr. Ári qaraıǵy damý kúshimizdi biriktirýimizge baılanysty», dep atap ótti Iýlııa Iаkýpbaeva.

Mádenıet jáne sport vıse-mı­nıstri Erjan Erkinbaev salaǵa jaýapty vedomstvo, «Atameken» jáne memlekettik organdarmen týrızmdi damytýǵa baǵyttalǵan birqatar jol kartasy baǵdarlamalaryn iske asyryp kele jatqanyn aıtty. «Jyldan-jylǵa jol kartasyna qol qoıǵan memlekettik organdardyń sany artýda. Qol qoıýshylar qataryna Kazakh Geography kompanııasyn qosý týraly usynys aıtqym keledi. Bul kompanııa­da ulttyq parkter men ekologııalyq týrızmdi damytýǵa qatysty kóp usynys bar. Sonymen qatar elimiz keń-baıtaq ekenin atap ótkim keledi. Bir jaǵynan keń aýqym týrızmniń damýy boıynsha jyldam nátıje kórsetý kerek kezde bul jekelegen qıyndyqtardy týdyrsa, ekinshi jaǵy­nan jer-sýlarymyz – bizdiń maqtanyshymyz. Barlyǵyn tez arada ózgertý múmkin emes ekenin túsinemiz. Biraq sala qatysýshylary birlesip jumys istegen kezde ǵana nátıjege tez qol jetkizýge bolatynyn tájirıbe kórsetti. Muny sandar da rastaıdy. Kórsetkishter jaqsaryp keledi, salaǵa salynǵan ınvestısııalardyń kólemi de artqan», dedi spıker.

Is-shara aıasynda «Atameken» UKP, Kazakh Tourism UK» AQ, Máde­nıet jáne sport mınıstrligi, sondaı-aq Geologııa jáne tabıǵı resýrstar mınıstrligi ekologııalyq damýǵa baǵyt­talǵan «jol kartasyna» qol qoıdy.

Bul – Ulttyq palata memlekettik organ­darmen qol qoıǵan úshinshi jol kartasy. Qujat sheńberindegi ótken jylǵy jumys qorytyndylary tý­raly Kazakh Tourism UK AQ Bas­qarýshy dırektory Danıel Ser­jan­uly áńgimelep berdi. Spıker negizinen oqytý baǵdarlamalaryna toqtaldy. Onyń málimeti boıynsha, 2021 jyly 52 qolóner sheberi mar­ketıng pen ónimdi brendteýdi úı­rengen. Sondaı-aq Mańǵystaý ký­rorttyq aımaǵyndaǵy qonaqúıler­diń jelilik personaly da oqýǵa qatys­qan. Jumystyń úlken aýqymy ishki tý­rıs­tik ónimdi damytýǵa, 14 oblys pen res­pýblıkalyq mańyzy bar 3 qalada ót­ken balalar men jasóspirimder tý­rızmi obektilerin túgendeýge arnalǵan.

Sessııa sheńberinde kásipkerler men memlekettik organdar agro jáne saýyqtyrý týrızmin damytý, turaqty damýǵa kóshý strategııa­sy talqylandy. Eýrazııalyq týrızm qaýymdastyǵynyń prezıdenti Rysty Qarabaeva Ortalyq Azııadaǵy turaqty týrızmniń MOST – modeli jobasynyń Qazaq­standa júzege asyrylý barysy týraly aıtyp, jobanyń maqsattaryn atap ótip, ekologııalyq sertıfıkattaý boıynsha qashyqtyqtan oqytýǵa arnalǵan platforma týraly aqparat berdi.