ASTANA. 28 sáýir. Qazaqstan halqynyń birligi kúni merekesine oraı Astanada kópshiliktiń kóńilin kóterip, jan saraıyn ashar mádenı is-sharalar molynan ázirlenýde. Bul týraly astana.gov.kz saıty habarlady.
Tarata aıtar bolsaq, 1 mamyrda aldymen «Qazaq eli» monýmentiniń aldynda halyqtyq serýen uıymdastyrylady. Budan keıin osy monýmenttiń aldyndaǵy alańda túrli sporttyq saıystar, kórmeler men jármeńkeler, qoıylymdar, festıvaldar men konsertter qala turǵyndary men qonaqtarynyń nazaryna usynylmaq.
Astana.gov.kz saıtynyń habarlaǵanyndaı, alańǵa 3 sahna ornatylady. 1 mamyr kúni saǵat 11.00-14-00 aralyǵynda negizgi sahnada shyǵarmashylyq ujymdardyń 700-den astam ártisi óner kórsetpek.
Jalpy, bul merekelik sharanyń eń basty 5 nómiri bolady. Olar: «Qazaqstan halqynyń birligi kúni-2014» ánurany», «Otan daýsy osyndaı», «Qazaqstan bolashaǵy» jáne «Qazaqstan halqynyń bıi».
Aıtýly dýmanda elimizdiń jáne ózge memleketterdiń aldyńǵy qatarly bı ujymdary ónerlerin jurtshylyq nazaryna usynbaq. Bulardy atap óter bolsaq, О́skemenniń «Flesh» shoý-baleti, Qaraǵandy qalasynyń «Ushqyn» bı ansambli, Shymkenttiń «Shamsınýr» jáne «Aıgólek» bı ansamblderi, sonymen qatar, Reseı Federasııasy Sheshenstan respýblıkasynyń «Vaınah» bı ansambli men Omby qalalyq (Reseı) Memlekettik bı jáne án ansambli.
Sondaı-aq, Tbılısı qalasynyń grýzın ulttyq hory men Ankaranyń túrik ulttyq qory kórermenge merekelik kóńil-kúı syılamaq.
Budan bólek, sheteldik jáne elimizdiń jek aspapta oryndaýshylary da óz ónerlerin ortaǵa salady dep josparlanýda. Olar: Zıther (Germanııa), Chjý (Qytaı), Madan Oak (Úndistan) jáne Qorlan Kartenbaev (Qazaqstan).
Árıne, estrada ónerpazdarynsyz merekeniń sáni kelmesi anyq.Sondyqtan, Konserttik baǵdarlamany otandyq estrada juldyzdary jalǵastyrady. Olardyń qatarynda Ardaq Balajan, Indıra Rasylhan, «Alash uly» toby, Qazaq qory jáne Qazaq Ulttyq óner ýnıversıtetiniń jeke oryndaýshylary bar. Sondaı-aq, bularmen birge О́zbekstannyń «Iаlla» toby da sahnaǵa shyǵady dep kútilýde.
Al alańdaǵy shaǵyn sahnada saǵat 10.00-17-00 aralyǵynda astanalyq 23 etnomádenı birlestiktiń konserttik baǵdarlamalary kórermenniń kózaıymyna aınalmaq.
Taǵy bir erekshe toqtala keter jáıt, joǵaryda aıtyp ótkenimizdeı, merekelik shara barysynda sporttyq saıystardy ótkizý umyt qalmaıdy. Máselen, arqan tartý, armrestlıng, gir kóterý, toǵyzqumalaq jáne taǵy basqa da sport túrlerine básekeler uıymdastyrylady.
Sonymen birge, 15 saýda núktesinde azyq-túlik saýdasy júrgiziledi.
Bul aıtýly sharaǵa 100 myńnan astam adam qatysady dep kútilýde.
Joldybaı Bazar.
Derekkóz: astana.gov.kz.
Foto: Alashainasy.kz.
