Dıplomatııalyq qyzmettiń 30 belesi

Saltanatty is-sharada Premer-Mınıstrdiń orynbasary – Syrtqy ister mınıstri Muhtar Tileýberdi Memleket basshysy Qasym-Jomart Toqaevtyń ystyq yqylasyn jetkizip, quttyqtaý hatyn oqyp berdi.

«Halyqaralyq qatynastardyń qazirgi zamanǵy júıesindegi Qazaqstan Respýblıkasy» atty halyqaralyq konferensııa qatysýshylaryna joldaǵan quttyqtaý hatynda Prezıdent elimizdiń dıplomatııalyq qyzmetiniń otyz jyldyq mereıtoıy halqymyz Jańa Qazaqstan qurýǵa kirisken syndarly sátpen tuspa-tus kelgenin atap ótti. «Qurmetti Qazaqstan Respýblıkasy dıplomatııalyq qyzmetiniń ardagerleri men qyzmetkerleri! Sizderdi elimizdiń dıplomatııalyq qyzmetiniń 30 jyldyq mereıtoıymen shyn júrekten quttyqtaımyn. Biz osynaý tarıhı mejege úlken jetistiktermen jettik», delingen Syrtqy ister mınıstri Muhtar Tileýberdi oqyp bergen Memleket basshysynyń hatynda.

El Prezıdentiniń atap ótýinshe, elimiz 186 elmen qarym-qatynas ornatyp, 50 halyqaralyq uıymnyń múshesi boldy. «Biz óńirlik jáne jahandyq prosesterge belsendi qatysatyn ornyqty ári bedeldi memleketke aınaldyq. Sizder táýelsizdigimizdiń alǵashqy kúninen elimizdiń múddesin halyqaralyq arenada qorǵap kelesizder. Qazirgi geosaıası turaqsyzdyq jaǵdaıynda sizder jahandyq álemde Qazaqstannyń ustanymyn ny­ǵaı­týǵa jáne shet memlekettermen ynty­maqtastyqty damytýǵa úlken úles qo­sasyzdar», dedi Qasym-Jomart Toqaev.

Memleket basshysy elimizdiń dıp­lo­matııalyq qyzmetiniń otyz jyldyq me­reıtoıy halqymyz Jańa Qazaqstan qurýǵa kirisken syndarly sátpen tuspa-tus kelgenin basa atap ótedi.

«Osyǵan oraı Syrtqy ister mınıs­tr­ligine úlken jaýapkershilik júk­teledi. Dıplomattardyń basty min­deti – memleketimizdiń álemdegi már­te­besin odan ary arttyrý, syrtqy qaýip­sizdikti qamtamasyz etý, sheteldegi aza­mat­tary­myzdyń quqyqtary men múúddelerin qorǵaý», dedi Prezıdent.

Saltanatty jıynda mınıstr arda­gerlerdiń qazaq dıplomatııa mektebiniń qalyptasýyna qosqan úlesin joǵary baǵalady. Sondaı-aq ol Syrtqy ister mınıstrliginiń alǵashqy ǵımaraty ornalasqan Almatyda Qazaqstan syrtqy saıasatynyń basty qaǵıdattary men irgetasy «taza paraqtan» jazylǵanyn, syrtqy qatynastar organdary qyzmetiniń uıymdyq-quqyqtyq negizderin jasaý boıynsha mańyzdy jumys atqarylǵanyn atap ótti. «Sizder sheteldik dıplomatııalyq korpýspen kásibı sheberlikpen baılanys ornattyńyzdar. Qosqan úlesterińizdiń arqasynda búgin qazaq dıplomattary kez kelgen halyqaralyq alańdarda memleketimizdiń múddelerin senimdi qorǵap, odan ári ilgerilete alatyn deńgeıge jetti», dedi M.Tileýberdi.

Mınıstr ardagerler men qyz­met­kerlerge zor densaýlyq pen uzaq ǵumyr tilep, kásibı merekege oraı memlekettik jáne vedomstvolyq nagradalar tabys etti. Jıynǵa qurmetti qonaq retinde sha­qyrylǵan dıplomatııa ardageri, aqyn Oljas Súleımenov táýelsiz qazaq dıplomatııasynyń alǵashqy kezeń­derin eske aldy. «Tájirıbemiz men múm­kindigimizdi qazaq elin álemge tanytýǵa jáne ınvestısııa tartýǵa jumyldyrdyq. Táýelsiz qazaq dıplomatııasynyń 30 jyl­dyǵyna arnalǵan medal men úshin erekshe. Bul meniń IýNESKO-da, Italııada dıplomatııalyq qyzmetpen ótken 20 jyldyq ómirimdi eske túsiredi», dedi O.Súleımenov.

Sondaı-aq mınıstr M.Tileýberdi Ál-Farabı atyndaǵy QazUÝ-da «Jańa geosaıası jaǵdaıdaǵy Qazaqstan dıplo­matııasy» taqyrybynda ótken dóńgelek ústelde sóz sóıledi. «Otyz jyl ishinde biz óńirlik jáne jahandyq prosesterge belsendi qatysatyn turaqty jáne bedeldi memleketke aınaldyq. Dıplomatııamyz egemendik alǵan kúnnen bastap memlekettik shekaranyń búkil perımetri boıynsha halyqaralyq-quqyqtyq tanylýyn jáne barlyq kórshilerimizben jáne álemniń bas­qa memleketterimen beıbit jáne teń quqyqty baılanystar ornatýdy qamta­masyz etti», dep atap ótti mınıstr óz sózinde.

Onyń aıtýynsha, Qazaqstan Eýra­zııa­lyq keńistiktegi ıntegrasııalyq proses­terdiń qozǵaltqysh kúshine aınaldy jáne birqatar iri halyqaralyq uıymǵa tabysty tóraǵalyq etti. Osy turǵyda elimizdiń syrtqy saıası vedomstvosy úshin kásibı dıplomatııalyq kadrlardy daıarlaýǵa QazUÝ-dyń qosqan eleýli úlesi erekshe atap ótildi.

Dóńgelek ústelde ýnıversıtet rektory J.Túımebaev, dıplomatııalyq qyzmettiń ardagerleri Tileýhan Qabdrahmanov pen Ádil Ahmetov baıandama jasady. Sonymen qatar is-shara sheńberinde mınıstr men rektor QazUÝ janynan Syrtqy saıasat jáne dıplomatııa ortalyǵyn saltanatty túrde ashty.

О́z kezeginde oqý ordasynyń rektory Janseıit Túımebaev dıplomatııalyq korpýs ókilderin kásibı merekemen quttyqtady. «Bizdiń halyqaralyq dárejedegi túlekterimiz zań shyǵarýshy jáne atqarýshy bılik organdarynda Parlament pen Úkimet apparatynda, SIM-de jáne shetelderdegi ókildikterde jemisti eńbek etýde. Olardyń kópshiligi elimizdi dıplomatııalyq ókildikterde tanystyrady, akademııalyq mekemeler men iskerlik ortalarda joǵary suranysqa ıe», dep atap ótti rektor.

Sondaı-aq kezdesý barysynda BUU Jahandyq kommýnıkasııalar depar­ta­mentiniń ókili jáne Qazaqstandaǵy BUU Aqparattyq bıýrosynyń basshy­sy Vlastımıl Samek, QHR-dyń Alma­tydaǵy bas konsýly Szıan Veı, Túrkııa Respýblıkasynyń Almatydaǵy bas konsýly Alı Ryza Akynjy sóz sóılep, ózara yntymaqtastyqtyń jarqyn bola­shaǵy men dıplomatııalyq kadr daıar­laýdaǵy QazUÝ-dyń rólin erekshe atap ótti.

ALMATY