– Bıyl aýdan ortalyǵy – Shıeli kenti gazben tolyq qamtyldy. Jaqaev, Bıdaıkól, Baısyn, N.Bekejanov, Qodamanov eldi mekeniniń turǵyndary «kógildir otyn» ıgiligin kórýge múmkindik aldy. Tabıǵı gaz – aýyldaǵylardyń qolyn ot jaǵyp, kúl shyǵarýdan bosatýmen qatar, qorshaǵan ortany qorǵaýǵa, orman qoryn saqtaýǵa múmkindik beredi, – dedi oblys basshysy.
Eldi mekendi gazdandyrýdy turǵyndar jyl saıynǵy esepti kezdesýde kóterip kelgen eken. Aqmaıa aýylyna tabıǵı gaz tartý úshin respýblıkalyq, jergilikti bıýdjetterden 460 mln teńge qaralǵan. Al Alǵabas aýylyna 488 mln teńge bólingen. Búginde aýdandy tabıǵı gazben qamtý úlesi 56,4%-dy qurap otyr.
Aldaǵy ýaqytta aýdandaǵy Bestam, Dosbol datqa, Eńbekshi, Jıdeliaryq eldi mekenderine gaz qubyryn júrgizýge qajetti bıýdjettik ótinim tapsyrylsa, Almaly, Tájibaev aýyldary turǵyndary «kógildir otynǵa» qol jetkizý úshin joba-smetalyq qujattamalary ázirlenip, saraptamaǵa usynyldy.
Bıyl oblysta aýyldardy gazdandyrý boıynsha 13 jobany iske asyrý bastalsa, onyń 7-eýi osy jyly aıaqtalady. Nátıjesinde, 15 myńnan astam halqy bar 7 eldi meken tabıǵı gazǵa qosylyp, ony tutynatyn halyq sanynyń úlesi 68 paıyzǵa jetpek.
Shıelidegi 2 aýyl tabıǵı gazǵa qosylǵan kúni kórshiles Jańaqorǵan aýdanyndaǵy Birlik, Qyrash eldi mekenderine aýylishilik gaz taratý jelilerin tartý bastaldy. Osy jumys aıaqtalǵanda Birlikte 6 áleýmettik nysan, 440 úı, Qyrash aýylynda 5 áleýmettik nysan men 124 úı gazdandyrylady. Sonymen qatar aýdandaǵy Tómenaryq, Shalqııa, Quttyqoja, Jaıylma, Keıden aýyldaryna gaz jelisin tartý jobalary ázirlenip, memlekettik saraptama qorytyndylary alynǵan.
Qyzylorda oblysy
