Súttiqudyq – sý tapshylyǵyn tartyp otyrǵan aýyldyq okrýgterdiń biri. Qazir munda bıýdjetten qarjy bólinip, jańadan 800 gektar sýarmaly jerdi aınalymǵa qosý jumystary jasalyp jatyr. Senator jeri shuraıly Jańaqorǵanda baý-baqsha alqabyn ulǵaıtý jaıly oıyn aıtyp, turǵyndardyń osyǵan baılanysty pikirin tyńdady.
Elimizden bólek syrt memleketterge de qarbyz jóneltip jatqan jaıylmalyqtarǵa bıyl kún raıy qarasyp-aq tur. Gektarynan 35-40 tonna ónim alǵan sharýalar alǵashqyda 100 teńgeden ótkizse, qazirgi baǵa – 45 teńge tóńireginde. Olardan qarbyzdy osy baǵada alǵan alypsatarlar basqa óńirlerde 2-3 esege qymbatqa saýdalap otyr.
«Bul «Kooperasııa týraly» zańnyń tolyq jumys istemeı turǵandyǵyn kórsetedi. О́ndirýshiniń ónimin tutynýshyǵa deldalsyz tikeleı ótkizgeni eki jaqqa da tıimdi. Sonda beli búgilip beınettenbeı-aq daıyn ónimdi qymbattatyp otyrǵandardyń joly kesiledi. Bazar baǵasy da qalypqa keledi. Jańaǵy zańǵa sáıkes shaǵyn sharýashylyqtar birigip, memleket qoldaýyna súıene alady», deıdi senator.
Senator orta ǵasyr jádigeri Syǵanaq qalashyǵyna bardy. Tarıhı shahardyń negizgi bólikterin qalypqa keltirip, týrızm ortalyǵyna aınaldyrý jóninde pikirin bildirdi. Sapar aıasynda aýdanǵa qatysty ózge de problemalyq usynystar talqylandy.
Qyzylorda oblysy
