Álıhan Smaıylov metallýrgııa qaýiptiligi asa joǵary óndiris salasy ekenin atap ótti. Bul rette «ArselorMıttal Temirtaýda» atalǵan problema ótkir bolyp tur, al kásiporynda júrgizilip jatqan qaýipsiz eńbek jaǵdaılaryn qamtamasyz etý sharalary jaǵdaıdy túbegeıli jaqsartýǵa múmkindik berip otyrǵan joq.
Úkimet basshysynyń pikirinshe, tehnologııalyq prosesterdi jańǵyrtýǵa, onyń ishinde moraldyq turǵyda ábden tozyǵy jetken jabdyqtardy jańartýǵa bólingen ınvestısııalar jetkiliksiz. Bul – óndiristegi apattyq jaǵdaılardyń týyndaýyna ákeletin basty sebepterdiń biri.
«Jyl saıyn óndiriste 10-12 adam mert bolady. Biz bul jaǵdaıǵa kóne almaımyz. Jabdyqardyń ábden tozyǵy jetken, jańǵyrtýǵa salynatyn ınvestısııalar deńgeıi basqa kásiporyndarmen salystyrǵanda 2-3 ese tómen. Muny túzetý kerek. Investısııa kólemin kezeń-kezeńmen arttyryp, eń aldymen, qyzmetkerlerdiń qaýipsizdigin qamtamasyz etý kerek», dedi Á. Smaıylov kompanııa basshylyǵyna.
Sonymen qatar Premer-Mınıstr ekologııalyq qaýipsizdikti qamtamasyz etý máselelerine nazar aýdardy.
«Kún tárbindegi ekologııalyq máseleler ótkir tur. Memleket basshysy bizdiń aldymyzǵa tıisti mindetter qoıyp otyr. Sondyqtan bul másele boıynsha birlesip jumys isteýimiz kerek», dedi ol.
Osyǵan baılanysty Úkimet basshysy kásiporyn basshylyǵyn óndiristegi jazataıym oqıǵalardyń aldyn alý jáne ekologııalyq mindettemelerdi saqtaý boıynsha pármendi sharalar ázirleýge shaqyrdy.
Budan keıin Álıhan Smaıylov «Lınde Gaz Qazaqstan» JShS ónerkásiptik gaz óndirý zaýytynyń qyzmetimen tanysty. Zaýyt Memleket basshysynyń Germanııaǵa sapary kezinde Yntymaqtastyq týraly memorandýmǵa qol qoıylǵannan keıin iske qosylǵan.
«Bul oraıda eki el arasyndaǵy ýaǵdalastyqtar tabysty iske asyrylyp jatqanyn kórýge bolady. Bul bizdiń elge ınvestısııa salýdy qarastyratyn basqa sheteldik kompanııalar úshin jaqsy yntalandyrý bolmaq», dedi Premer-Mınıstr.
Álıhan Smaıylov kompanııanyń kómirqyshqyl gazy shyǵaryndylaryn azaıtý jónindegi sheshimderi elimizdiń basqa óńirlerindegi metallýrgııa jáne hımııa zaýyttarynda, munaı-gaz jáne energetıka salalarynyń kásiporyndarynda sátti qoldanylýy múmkin ekenin aıtty.
Sondaı-aq Úkimet basshysy Temirtaýda balalardy tárbıeleý men damytýdyń jaqsartylǵan baǵdarlamasyn iske asyratyn «Jas talanttar akademııasy» balabaqshasyna bardy.
Bıyl respýblıka boıynsha 322 jańa balabaqshany iske qosý josparlanǵan, onyń ishinde 14 balabaqsha Qaraǵandy oblysynda ornalasqan.
Premer-Mınıstr árbir balaǵa mektepke deıingi sapaly bilim berip, tárbıeleý úshin memlekettik-jekeshelik áriptestikti damytý jáne bıznesti yntalandyrý boıynsha júıeli jumys jalǵasatynyn atap ótti.
Aıana Toǵanbek
