Keńeste oblys ákimi Jeńis Qasymbek, ındýstrııa jáne ınfraqurylymdyq damý mınıstri Qaıyrbek О́skenbaev, ekologııa, geologııa jáne tabıǵı resýrstar mınıstri Serikqalı Brekeshev, sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, eńbek jáne halyqty áleýmettik qorǵaý birinshi vıse-mınıstri Aqmadı Sarbasov, oqý-aǵartý birinshi vıse-mınıstri Sholpan Karınova baıandama jasady.
Premer-Mınıstr sońǵy ýaqytta Qaraǵandy oblysynda órt jáne sýdaǵy jazataıym oqıǵalarmen, sondaı-aq kásiporyndardaǵy oqıǵalarmen baılanysty tótenshe jaǵdaılar jıilep ketkenin atap ótti.
«Tótenshe jaǵdaılar mınıstrligi oblys ákimdigimen birlesip, óńirdegi qaýipsizdiktiń tıisti deńgeıin qamtamasyz etý boıynsha barlyq qajetti sharalardy qabyldasyn», dep tapsyrdy Álıhan Smaıylov.
Úkimet basshysy 2022 jyly Qaraǵandy oblysyn damytýǵa 176 mlrd teńgeden astam qarajat qarastyrylǵanyn eske saldy. Sonymen qatar respýblıkalyq bıýdjetti naqtylaý aıasynda óńirge qosymsha 48 mlrd teńgeden astam qarajat bólingen.
«Bul shyǵystar ınjenerlik ınfraqurylymdy jáne ınfraqurylymdyq jobalardy damytýǵa, agroónerkásiptik keshendi qoldaýǵa jáne óńirdiń áleýmettik qajettilikterine baǵyttalǵan. Ákimdik sapaly nátıjege qol jetkizýdi qamtamasyz ete otyryp, osy qarajattyń maqsatty paıdalanylýy men tıimdi ıgerilýin qamtamasyz etýi qajet», dedi Premer-Mınıstr.
Sonymen qatar Álıhan Smaıylov azyq-túlik baǵasynyń negizsiz ósýine jol bermeý boıynsha josparly jumys júrgizý qajettigin eske saldy.
Osyǵan baılanysty Úkimet basshysy ústeme baǵalardy baqylaýdy kúsheıtýdi jáne «aınalym shemasyn», ońtústik óńirler men taıaý shetel fermerlerimen tikeleı sharttardy, sondaı-aq aýyl sharýashylyǵy ónimderin jetkizýge forvardtyq kelisimsharttardy qosa alǵanda, qoljetimdi naryqtyq tetikterdi belsendi qoldanýdy tapsyrdy.
Premer-Mınıstr óńir ekonomıkasyn ártaraptandyrýdyń eń ózekti másele ekenin atap ótti.
Osy maqsatta bıyl jeke ınvestısııalar esebinen 222 mlrd teńgege jýyq somaǵa 12 jobany aıaqtaý josparlanyp otyr. Sondaı-aq 874 mlrd teńgeden astam somaǵa taǵy 34 joba pysyqtalyp jatyr.
«Bul jobalar agroónerkásip kesheni, mashına jasaý, metallýrgııa, energetıka, qurylys ındýstrııasy jáne qaǵaz ónerkásibi sııaqty salalarda iske asyrylady. Oblys ákimdigi barlyq jobalardy merziminde iske qosyp, sapaly júzege asýyn qamtamasyz etýi qajet», dedi Álıhan Smaıylov.
Keńes qorytyndysy boıynsha Premer-Mınıstr memlekettik organdar men ákimdikke taǵy da birqatar tapsyrma berdi. Atap aıtqanda, joldardyń normatıvtik jaǵdaıyn jaqsartý, Jezqazǵan-Qaraǵandy avtojolynyń ýchaskesin rekonstrýksııalaý boıynsha JSQ ázirleýdi aıaqtap, qurylys-montajdaý jumystaryn kezeń-kezeńimen bastaý, sondaı-aq Qaraǵandy qalasynyń turǵyn úı alaptaryn jylýmen jabdyqtaýdyń magıstraldyq jelilerin salý jobasyn aıaqtaý boıynsha usynystar engizý kerek.
Eńbek jáne halyqty áleýmettik qorǵaý mınıstrligine «Atameken» palatasymen jáne Kásipodaqtar federasııasymen birlesip, aralas jaýapkershilikti qoldaný kezinde qyzmetkerdiń kinásiniń eń joǵary shegin belgileý boıynsha biryńǵaı ustanymdy ázirleý jáne jazataıym oqıǵalar jónindegi zańnamany jetildirý boıynsha tásilderdi ázirleý tapsyryldy.
Qaraǵandy oblysynyń ákimdigine Oqý-aǵartý mınıstrligimen birlesip, 2022 jyldyń sońyna deıin mektepke deıingi bilim berýge memlekettik tapsyrysty ornalastyra otyryp, 14 balabaqshany paıdalanýǵa berýdi qamtamasyz etý tapsyryldy.
«Biz kúsh biriktire otyryp, Qaraǵandy oblysynyń damýyna atsalysýymyz kerek. Halyqtyń ál-aýqatynyń artýy, ómir súrý sapasynyń jaqsarýy osyǵan tikeleı baılanysty», dedi Álıhan Smaıylov.
Premer-Mınıstr Qaraǵandyda túrli baǵyttaǵy digital-mamandardy oqytatyn «Terrıkonovaıa dolına» IT-Hub-na bardy.
«Búginde memleket IT-kompanııalarǵa kóptegen preferensııalar usynady jáne bıznes-ınkýbasııalaýdyń túrli baǵdarlamalaryn júrgizedi. Bul – elimizde, onyń ishinde jastar arasynda tehnologııalyq kásipkerliktiń ekojúıesin qalyptastyrý boıynsha mańyzdy qadamdar. Osy baǵyttaǵy jumysty barlyq óńirde jeke seriktestermen birlesip jalǵastyrý qajet», dedi Úkimet basshysy.
Aıana Toǵanbek
