Eýropa fýtbol qaýymdastyqtary odaǵynyń (ÝEFA) erejesi boıynsha, Kári qurlyqtaǵy álem chempıonatynyń irikteý básekeleri bes satydan turady. Bul – ekinshi irikteý kezeńi. Alǵashqy aldyn ala irikteý týrnırinde ÝEFA reıtınginde eń tómengi oryndarda turǵan quramalar bir-birimen shaǵyn týrnır ótkizip, onda jeńiske jetken Germanııa, Chernogorııa, Danııa, Kıpr, Armenııa, Kosovo, Lıtva, Izraıl, Shvesııa, Aýstrııa, Moldova jáne Grekııa negizgi kezeńge joldama aldy.
Atalǵan 12 qurama reıtıngte joǵary oryndarda turǵan 24 komandaǵa qosylyp, negizgi kezeńde baq synaý qurmetine ıe boldy. Sondaı-aq irikteýdiń barlyq kezeńinen shettetilgen Reseı quramasynyń ornyna shaǵyn týrnırde úshinshi oryn alǵan komandalar ishinde eń úzdik nátıje kórsetken Norvegııa quramasy shaqyrtý aldy. Sóıtip, jerebe qorytyndysy boıynsha 36 qurama úsh-úshten 12 topqa bólinip, negizgi kezeńde óner kórsetpek. Toptyq kezeńniń oıyndary 2022 jyldyń 12-21 qyrkúıegi, 3-12 qazany, 6-9 qarashasy jáne 2023 jyldyń 27 aqpany men 8 naýryzy aralyǵyna josparlanǵan.
Toptyq kezeńde baq synaıtyn quramalar bir-birimen úıde jáne syrt alańda bir-bir oıyn ótkizedi. Nátıjesinde, ár toptyń jeńimpazdary men ekinshi oryn alǵan tórt úzdik komanda elıtaly kezeńge tikeleı joldama alady. Al ekinshi oryn ıelengen qalǵan segiz komanda 2023 jyldyń 10-19 sáýir aralyǵynda ótpeli oıyndar arqyly taǵy tórt joldamany sarapqa salady. Sóıtip, irikteýdiń elıtaly kezeńine 20 qurama qatysyp, olar tórt-tórtten bes topqa bólinip oınaıdy. Ár topta jeńimpaz atanǵan qurama álem chempıonatyna joldama alsa, ekinshi oryn alǵan quramalar bir-birimen oınap, qosymsha eki joldamaǵa talasatyn bolady.
Non qalasynda ótken jerebe tartý rásiminen keıin fýtzaldan Qazaqstan quramasynyń bas bapkeri Rıkardo Kaka Qazaqstan fýtbol federasııasynyń baspasóz qyzmetine suhbat berip, 2024 jylǵy álem chempıonatynyń negizgi irikteý kezeńiniń jerebesi týraly oıyn ortaǵa saldy.
– Bizdiń topqa qıyn qarsylastar tústi. Qazaqstan quramasyn jattyqtyrǵan sátten bastap Slovenııa quramasymen osymen úshinshi ret jolyqqaly turmyz. Alǵashqy eki oıyn biz úshin aýyr boldy. Sebebi eki kezdesýde de tańdaýly qurammen shyǵa almadyq. Osy joly bári biz oılaǵandaı bolady dep úmittenemin.
Chernogorııa týraly aıtar bolsaq, búgingi fýtzalda kez kelgen qarsylasty baǵalaý qajet. Olarmen alǵash ret oınaımyz. Syrt alańda Qazaqstan quramasynyń oıynyna basa nazar aýdarylady dep oılaımyn. Qazir fýtzal oınaýdy bári úırendi. Sporttyń bul túri bir orynda turǵan joq. Osy oıyndardyń barlyǵyna joǵary deńgeıde daıyndalyp, qarsylasty tolyq zertteımiz, – deıdi bapker.
Sondaı-aq ulttyq quramanyń kapıtany Igıta da jerebe týraly óz pikirin bildirip, Qazaqstan qıyn topqa tap bolǵanyn aıtty. «О́te qıyn topqa tústik. Slovenııa árqashan myqty qurama sanaldy. Ony 2016 jáne 2021 jyldarǵy álem chempıonatynyń irikteý oıyndarynda baıqadyq. Keıin Nıderlandta ótken Eýropa chempıonatynda da jolyqtyq. Olardan eshqashan utylǵan joqpyz, deıturǵanymen, barlyq oıynda da jeńiske jetpedik. Bir ret utyp, eki oıynda teń tústik. О́te yńǵaısyz qarsylas, muqııat bolý qajet. Jańa oıynshylar kelip jatqanyn da eskergen abzal. Chernogorııamen buryn-sońdy kezdesken joqpyz. Olardyń oıyny Serbııa men Bosnııa quramalaryna uqsas keledi. Bul elde de jaqsy oıynshylar bar. Qarsylastyń oıynyn kórmegen soń naqty eshteńe aıta almaımyn. Qatelik jibermeý kerek. Mundaı qarsylastardan tosynsyı kútýge bolady. Ár oıynǵa tyńǵylyqty daıyndalamyz», deıdi Igıta.
2021 jyly Lıtvanyń úsh qalasynda – Vılnıýs, Kaýnas, Klaıpedada ótken álem chempıonatynda Qazaqstan quramasy tabysty óner kórsetip, fınalǵa bir qadam qalǵanda súringen edi. Jerlesterimiz toptyq kezeńde Kosta-Rıka (6:1) men Lıtvadan (3:0) basym túsip, sońǵy týrda Venesýelamen teń (1:1) oınaǵan-dy. 1/8 fınalǵa óz tobynda birinshi orynmen shyqqan Qazaqstan quramasy alǵash Taıland fýtzalshylaryn jarys jolynan yǵystyrsa (7:0), shırek fınalda Irandy tize búktirdi – 3:2. Al jartylaı fınalda bolashaq álem chempıony Portýgalııamen teń oınap (2:2), match sońyndaǵy penaltı serııasynda ǵana ese jiberdi. Úshinshi oryn úshin ótken kezdesýde álemniń bes dúrkin chempıony Brazılııadan 4:2 esebimen jeńilip, álem birinshiligin tórtinshi orynmen túıindedi. Fınalda Portýgalııa quramasy 2016 jylǵy álem chempıony – Argentınany jeńip, jahandyq dodanyń bas júldesin jeńip aldy.
