Álemdik tennıs týrnıriniń jeńimpazyn Nur-Sultan qalasynyń halyqaralyq áýejaıynan Premer-Mınıstrdiń orynbasary Eraly Toǵjanov, Mádenıet jáne sport vıse-mınıstri Serik Jarasbaev, Nur-Sultan qalasy ákiminiń orynbasary Erlan Bekmýrzaev jáne álemdik arenalarda el namysyn qorǵap júrgen chempıondar da qurmet-qoshemetpen qarsy aldy.
Al seısenbi kúni qazaqstandyq tennısshi Premer-Mınıstr Álıhan Smaıylov pen elorda ákimi Altaı Kólginovtiń qabyldaýynda boldy. Tústen keıin Elena Rybakına qazaqstandyq BAQ ókilderimen kezdesip, jýrnalısterdi qyzyqtyrǵan suraqtarǵa jaýap berdi. Baspasóz máslıhatynda Elena «Ýımbldon» jarysyna qalaı daıyndalǵany týraly aıtyp, jeńisinen keıingi áserin ortaǵa saldy. Sondaı-aq ol jıyn barysynda qazaqstandyq jankúıerlerdiń erekshe qoldaýyna rızashylyǵyn bildirip, jýrnalısterge Qazaqstannyń azamatshasy ekenin dáleldeıtin jeke kýáligimen pasportyn da kórsetti. Baspasóz jıynynda aıtylǵan budan da basqa suraq-jaýapty gazetimizdiń kelesi sanynda tolyq jarııalaımyz.
Jýrnalıstermen kezdesýden keıin E.Rybakına Ulttyq tennıs ortalyǵyndaǵy kortta elimizdiń jas tennısshilerimen kezdesip, olarǵa arnaıy sheberlik-sabaǵyn ótkizdi. Sodan keıin elordalyq tennıs jankúıerlerimen de júzdesip, estelikke sýretke túsip, qoltańba berdi.
