О́tken aptada Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Samat Erǵalıev, Sportty damytý dıreksııasynyń dırektory Maratbek Myqtybekov Dúnıejúzilik oıyndaryna qatysatyn Qazaqstan delegasııasyn shyǵaryp salý rásimine qatysty. Is-sharada Samat Erǵalıev kıkboksıngten álem chempıony Shyńǵyshan Tlemisovke Memlekettik týdy tabystap, el namysyn qorǵaıtyn barlyq sportshyǵa sáttilik tiledi.
«Sizder muhıttyń ar jaǵynda ótetin jarysta Qazaqstannyń Kók týyn bıikte jelbiretesizder dep senemin. Sizderdiń ár jeńisińiz jankúıerlerge zor qýanysh syılaıdy. Aralaryńyzda Dúnıejúzilik oıyndarǵa birneshe ret qatysqan sportshy bar. Sondyqtan biz sizderge zor senim artamyz», dedi S.Erǵalıev.
Sportty damytý dıreksııasynyń baspasóz qyzmeti taratqan aqparat boıynsha, AQSh-ta jalaýy jelbiregen álemdik dodaǵa el quramasynyń sportshylary kıkboksıng, sadaq atý, mýaı-taı, djıý-djıtsý, sporttyq akrobatıka, breıkıng jáne WKF karateden júldelerdi sarapqa salyp jatyr. Jarystyń alǵashqy aptasy aıaqtalmaı jatyp jerlesterimiz alǵashqy altynyn oljalap úlgerdi.
Karateshiler básekesinde synǵa túsken byltyrǵy Tokıo Olımpıadasynyń qola júldegeri qazaqstandyq Sofıa Berýlseva barlyq qarsylasyn qoǵadaı japyryp, 68 kılo salmaqta Dúnıejúzi oıyndarynyń chempıony atandy. Jarys barysynda otandasymyz bes jekpe-jek ótkizip, tórteýinde jeńiske jetti. Tek bir kezdesýinde ǵana qarsylasymen teń tústi. Atap aıtar bolsaq, S.Berýlseva alǵashqy básekesinde karateden byltyrǵy álem chempıony ıspanııalyq Marııa Torres Garsııapen teń tússe (7:7), keıingi kezeńderde amerıkalyq Sırrýs Lıngldy (1:4), chehııalyq jáne týnıstik qarsylasyn (3:1) jeńdi. Al bas júlde úshin ótken fınaldyq básekede Sofıa Berýlsevanyń joly alǵashqy aınalymdaǵy qarsylasy Marııa Torres Garsııamen qaıta túsip, bul jolǵy básekede jerlesimiz aıqyn basymdyqpen jeńiske jetti – 7:1. Osy altyn medaldyń arqasynda Qazaqstan quramasy jalpykomandalyq esepte altyn alǵan 14 eldiń qataryna qosyldy.
О́kinishke qaraı, erler arasyndaǵy saıysta Qazaqstan quramasynyń kóshbasshysy, Tokıo Olımpıadasynyń qola júldegeri Darhan Asadilov júldeli orynnan kórine almady. 67 kılo salmaqta synǵa túsken otandasymyz alǵashqy aıqasynda aljırlik qarsylasyn 5:2 esebimen jeńgenimen, ekinshi kezdesýinde ıtalııalyq sportshysymen teń túsip, sońǵy jekpe-jeginde amerıkalyq sportshydan 0:3 esebimen jeńilip qaldy.
Aıta keteıik, Dúnıejúzilik oıyndar 1981 jyldan bastap ár tórt jylda bir ret, Olımpııa oıyndarynan keıingi jyly uıymdastyrylyp keledi. Dúnıejúzilik oıyndar 2001 jyldan bastap Halyqaralyq Olımpıada komıtetiniń qol astyna kóshti. Áýeli bul sporttyq jarys tek Olımpıada baǵdarlamasyna enbeıtin sport túrlerinen ótkizilse, bertin kele 4 jyldyqtyń basty básekesindegi sport túrleri de qosyla bastady. Máselen, Bırmıngemde kórkem gımnastıka, sadaq atý, shyńǵa órmeleý syndy olımpıadalyq sport túrinen júlde sarapqa salynyp jatyr. Al lakross, kanoe-marafon, dron jarystyrý, kıkboksıng, breık-dans, parkýr men arqan tartys sekildi sport túrleri bıyl alǵash ret Dúnıejúzilik oıyndardyń baǵdarlamasyna engizildi.
