Mamyr aıynda Úkimet tegin medısınalyq kómektiń kepildik berilgen kólemi jáne MÁMS júıesi sheńberinde dári-dármekter men medısınalyq buıymdardy satyp alýdy retteıtin qaǵıdalarǵa engiziletin ózgeristerdi qabyldady. Qujattyń jańa redaksııasynda dástúrli tásilmen satyp alý prosedýralaryn ótkizý múmkindigi tolyǵymen alynyp tastaldy. Endi aýrýhanalar belgili bir dári-dármek «SK-Farmasııa» biryńǵaı dıstrıbýsııa júıesi arqyly satyp alynatyn preparattar tizimine enbese de, olardy elektrondy tásilmen ǵana satyp alýy tıis.
«Atameken» UKP atqarýshy hatshysy, basqarma múshesi Nurlan Saqýovtyń aıtýynsha, satyp alýdy elektrondy formatqa aýystyrý – qısyndy ári boljamdy prosess. Alaıda, satyp alýdyń elektrondy platformasyn tolyǵymen jolǵa qoımaı jatyp, dástúrli satyp alýdy alyp tastaý arqyly Densaýlyq saqtaý mınıstrligi medısınalyq uıymdardy da, medısınalyq zattar men tehnıkany jetkizýshilerdi de tyǵyryqqa tiredi.
«Medısınalyq qyzmetterdi kórsetýge qajetti barlyq preparat pen medısınalyq buıymdardyń barlyǵy «SK-Farmasııa» arqyly satyla bermeıdi. Aýrýhanalar dári-dármektiń kóptegen atalymyn izdep, satyp alady. Qazirgi kezde portaldyń daıyn bolmaýy saldarynan ónimniń osy túrlerin satyp alý tolyǵymen toqtap tur. Farmasevtıkalyq ónimderdiń óndirýshileri men jetkizýshileri portalǵa kire almaı otyr. Osydan pasıentter – qatardaǵy qazaqstandyqtar zardap shegip jatyr. Densaýlyq saqtaý mınıstrligi azamattardyń múddesin oılaýy tıis», dedi Nurlan Saqýov.
«Atameken» UKP mamandary osy másele boıynsha bıznes ókilderimmen birqatar kezdesý ótkizgen. Densaýlyq saqtaý mınıstri atyna portal jumysy jolǵa qoıylǵanǵa deıin burynǵy normalardy qaıtarý qajettigine qatysty hat joldanǵan.
