Úsharal jáne Úrjar áýejaılarynyń jasandy ushý-qoný jolaqtaryn rekonstrýksııalaý jumystary jalǵasýda. Bul sharalar Alakól kóliniń jaǵalaýyn áýe kóligimen qamtamasyz etý maqsatynda qolǵa alynǵan.
Atap aıtqanda, ushý-qoný jolaqtary men perrondy qaıta jańartý, jaryq-sıgnaldyq jabdyq pen perımetrlik qorshaýdy ornatý kózdelgen. Jalpy áýejaılardaǵy qaıta jóndeý jumystary qaýipsizdik pen sapa standarttarynyń deńgeıin arttyrýǵa baǵyttalǵan.
Jóndeý jumystaryn Jetisý jáne Abaı oblystarynyń ákimdikteri júrgizýde. Esterińizge sala keteıik, jergilikti atqarýshy organdar qaıta jóndeý boıynsha jumystardy jazǵy demalys maýsymnyń bastalýyna deıin aıaqtaýdy josparlaǵan bolatyn. Alaıda, merdigerlik uıymdar tarapynan jumystyń ýaqytyly oryndalmaýyna baılanysty nysan kórsetilgen merzimde tapsyrylmaǵan. Osy rette QR IIDM basshysy Qaıyrbek О́skenbaev Úsharal jáne Úrjar áýejaılarynda júrip jatqan qurylys-montajdaý jumystaryn jyldamyraq aıaqtaýdy tapsyrdy.
Úsharal jáne Úrjar áýejaılaryna sýbsıdııalanatyn reısterdi uıymdastyrý máselesine keletin bolsaq, QR Indýstrııa jáne ınfraqurylymdyq damý mınıstrligi tarapynan atalǵan rásimder aldyn ala júrgizilgen. Iаǵnı, tıisti qarajat bólinip, reısterdi júzege asyratyn avıakompanııalar anyqtaldy.
Osylaısha, ótkizilgen konkýrs qorytyndysy boıynsha «SCAT» avıakompanııasy Úsharal – Almaty jáne Úsharal – Nur-Sultan baǵyttarynda tasymaldaýshy bolyp tanyldy. Reıster áýe kemelerinde jazǵy maýsymda ár baǵyt boıynsha aptasyna 14 reıs jıiligimen, qalǵan ýaqytta 7 reıs oryndalatyn bolady. Bılettiń quny tıisinshe 15 myń teńge jáne 16 myń teńgeni quraıdy.
Sondaı-aq Úsharal-Taldyqorǵan baǵyty boıynsha «Jetisý» avıakompanııasy jazǵy maýsymda 28 reıs jıiligimen, qalǵan kezeńde 14 reıs oryndaıtyn bolady. Reıs «L-410» ushaqtarynda júzege asyrylady, bılet quny – 8 myń teńge.
Úrjar – Almaty jáne Úrjar – Nur-Sultan baǵytynda jarııalanǵan konkýrs qorytyndysy boıynsha tasymaldaýshy bolyp «Iýjnoe nebo» avıakompanııasy tanyldy. Reıster «An-24» áýe kemelerinde jazǵy maýsymda ár baǵyt boıynsha aptasyna 10 reıs jıiligimen, qalǵan ýaqytta 5 reıs oryndalatyn bolady. Bılet quny sáıkesinshe 14-16 myń teńge.
Jergilikti atqarýshy organdardyń aqparatyna sáıkes, Úsharal áýejaıyn qaıta jańartý jumystary 20 shildede, al Úrjar áýejaıyndaǵy jumystar tamyz aıynyń basynda máresine jetedi dep josparlanǵan.
Aıta keterligi, vedomstvo basshysy Q.О́skenbaevtyń tapsyrmasy boıynsha Úsharal jáne Úrjar áýejaılarynda qaıta jóndeý jumystary júrgizilip jatqan kezde Alakól kóliniń jaǵalaýyna kóliktiń basqa túrlerine degen qoljetimdilikti qamtamasyz etý úshin jolaýshylar tasymaldaıtyn poıyzdardyń sany artty.
