Atalmysh saıysqa Qazaqstan ulttyq quramasynan 5 oqýshy attansa, sonyń ishinde «Bilim-Innovasııa» lıseı-ınternatynyń oqýshysy Rızabek Alpamys kúmis medalǵa ıe boldy.
«Barlyq jattyqtyrýshylar men uıymdastyrýshylarǵa olımpıadanyń ótý kezinde kórsetken qamqorlyqtary úshin zor alǵysymdy bildiremin. Eń bastysy, elimniń, maǵan sengen jandardyń úmiti aqtaldy», dedi IPhO-nyń eki dúrkin kúmis júldegeri Rızabek Alpamys.
Álemniń 75 elinen 368 oqýshy qatysqan zııatkerlik jarys 10-17 shilde aralyǵynda qashyqtyqtan ótti. Uıymdastyrýshy el - Shveısarııa.
Qazaqstan namysyn qoǵaýǵa attanǵan qurama komandasy 5 oqýshydan turdy. IPhO qatysýshylary óz bilimderi men daǵdylaryn eki týrda kórsetti. Birinshisi orta mektepte oqytylatyn fızıkanyń keminde tórt bólimin qamtıtyn teorııalyq máselelerdi sheshýge arnalsa, ekinshisi – eksperımenttik týrda oqýshylar zerthanalyq jumystardy oryndady. Qorytyndylar jeke esepte shyǵaryldy.
Sondaı-aq, matematıka páni boıynsha Qazaqstan ulttyq quramasy matematıkadan halyqaralyq IMO-2022 olımpıadasyna qatysý úshin Norvegııa astanasy – Osloǵa attanǵan edi.
Bilim baıqaýynda Atyraý qalasynan saıysta baq synaǵan «Bilim-Innovasııa» lıseı-ınternatynyń 11-synyp oqýshysy Ádilet Zaýythan qolaǵa ıe boldy.
Jarysqa álemniń 104 memleketinen 589 oqýshy qatysty. Jarysta Qazaqstannyń namysyn 6 oqýshy qorǵady.
Buǵan deıin Ádilet jaratylystaný baǵytyndaǵy pánder boıynsha respýblıkalyq olımpıadada matematıka páninen altyn medaldi jeńip aldy. Ol sondaı-aq Halyqaralyq Tynyq Muhıt olımpıadasynyń, «Jibek Joly» Halyqaralyq olımpıadasynyń, Halyqaralyq matematıkadan Balqan olımpıadasynyń kúmis júldegeri atanyp úlgerdi.
Halyqaralyq matematıkalyq olımpıada – bul 1959 jyldan bastap jyl saıyn joǵary synyp oqýshylary arasynda ótkiziletin alǵashqy halyqaralyq pándik olımpıadalarynyń biri. Qazaqstan oǵan 1992 jyldan beri turaqty qatysyp keledi. Olımpıada qatysýshylary matematıkanyń geometrııa, algebra, sandar teorııasy, kombınatorıka sııaqty bólimderi boıynsha kúrdeli 6 esepti shyǵarýy tıis.
