Zagrebte jalǵyz altyn aldyq

Zagrebtegi doda – 2024 jyly Parıj­de uıymdastyrylatyn Olımpııa oıyndaryna reıtıngtik upaı beretin úshinshi Grand Slam jarysy. О́tken aıdyń sońynda Mońǵolııanyń Ulan-Batyr qalasynda uıym­dastyrylǵan alǵashqy «Úlken dýlyǵa» sa­natyndaǵy jarys­ta qazaqstandyq dzıýdoshylar tórt qola medal oljalaǵan bolsa, Býdapeshtegi ekinshi týrnırde úzdikter qatarynan kóri­ne almaǵanyn joǵaryda aıttyq. Endi, mine, er kezegi úshke deıin degendeı, Olım­pıadaǵa upaı úlestiriletin úshinshi Grand Slam jarysynda qazaqstandyq ba­lýandar alǵashqy altyn medaline qol jetkizdi.

Jastar arasyndaǵy 2015 jyl­ǵy álem chempıony, bıylǵy aq­panda Izraıldiń Tel-Avıv qa­lasynda ótken jarysta qola júlde alǵan Maǵjan Shamshadın (60 kg) Horvatııadaǵy básekede barlyq qar­sylasyn qapy qaldyryp, Zagreb tórinde Qazaqstannyń Ánuranyn shyrqatty.

Horvatııa tatamıindegi ja­rys­tyń alǵashqy aınalymdaryn­da otandasymyz 22 jastaǵy kýbalyq Dannı Porte Valdıvıezo, 28 jastaǵy amerıkalyq Davıd Terao men 20 jastaǵy ıspanııalyq Djaýme Rıko Bernabeýdi jarys joly­nan yǵystyrsa, shırek fınalda túrikmenstandyq Hakberdi Jý­maevty jeńdi. Jartylaı fınalda onyń joly jas­tar jáne eresekter arasyndaǵy Eýropa oıyndarynyń jeńimpazy fransııalyq tájirıbeli balýan Maksım Merlınmen qıysty. Eýropalyq jarystarda júlde alyp júrgen 24 jastaǵy fransııalyq balýan Maǵjan Shamshadınmen bes jarym mınýt boıy kúresip, otandasymyzdyń osal tusyn ta­ba almady. Al bas júlde úshin ótken tartysta qandasymyz álem jáne Azııa chempıonatynyń, Azııa oıyndarynyń júldegeri atanyp júrgen ońtústikkoreıalyq Kım Von Djýnnan aılasyn asyryp, altyn júldege ıe boldy.

60 kılo salmaqtyń qola júl­desine byltyr Aqtaýda ótken jas­tar arasyn­daǵy álem chempıonatynda altyn alǵan 19 jastaǵy grýzııalyq Gıorgıı Sardalashvılı men jastar arasyndaǵy álem jáne Azııa chempıonattarynyń jeńim­pazy japonııalyq Genkı Koga (Japonııa) ıe boldy. Japonııalyq balýan qatarynan ekinshi Grand Slam ja­rysynda qola júlde jeńip alyp otyr.

Tokıo Olımpıadasynan keıin 66 kıloǵa aýysqan Eldos Sme­tovtiń ázirshe jańa salmaqta joly bolar emes. 60 kıloda eki márte Olımpııa oıyndarynyń júl­degeri, álem chempıonatynyń altyn júldesin jeńip alǵan otandasymyz Zagrebte nebári jetinshi orynǵa taban tiredi. Alǵashqy aınalymdarda ol byltyrǵy Eýro­pa oıyndarynyń jeńim­pazy túr­kııalyq Eıder Toktaıdi, jastar arasyndaǵy Eýropa kýbogynyń jeńimpazy ızraıldik Ronald Koko­laev jáne serbııalyq Strahınıa Býn­chıch­ti jeńgenimen, shırek fınalda osy jarys­tyń bolashaq chempıony ázerbaı­jandyq Iаshar Nadjafovtyń osal tusyn taba alma­dy. Sondaı-aq 100 kıloda beldesken Nur­­lyhan Sharhan da shırek fınalda súrindi.

О́zge sportshylarymyzdyń nátı­je­­sine toqtalar bolsaq, Beká­dil Shaı­­mer­denov (81 kg), Erma­han Ánýar­­­bekov pen Ersultan Muzap­pa­rov (90 kg), birin­shi aınalymda súrin­se, Erlan Serik­janov (73 kg) pen Elaman Erǵalıev ekinshi aınalymnan árige asa almady. Al Nur­dáýlet Amanqosov (60 kg), Almas Ǵalymov (66 kg), Abylaıhan Juba­nazar (81 kg), Ádil Orazbaev (+100 kg) jarysty úshinshi kezeńmen aıaqtady.

Áıelder arasyndaǵy beldesýde el namysyn Ǵalııa Tyńbaeva (48 kg), Saltanat Sultanbekova (52 kg), Baqyt Qusaqbaeva (57 kg) jáne Arýna Jangeldına (78 kg) qorǵap, tórteýi de ekinshi aınalymda súrindi.

Álemniń 69 elinen 500-den asa balýan qatysqan Grand Slam jarysynda jalpykomandalyq esepte Japonııa men Nıderland quramalary top jardy. Eki eldiń sportshylary Zagrebte eki altyn, eki qola medal oljalady. Ekinshi orynǵa eki altyn medali bar Kanada quramasy ıe bolsa, bir altyn, eki kúmis jáne eki qola júlde alǵan Grýzııa sportshylary úshinshi orynǵa taban tiredi. Bir altyny bar Qazaqstan quramasy 10-orynǵa turaqtady.