Dúnıejúzilik oıyndarda el namysyn qorǵaǵan 16 sportshymyz nashar nátıje kórsetti dep aıta almaımyz. AQSh tórindegi dodada Qazaqstan qorjynyna altyn medaldy karateden Tokıo Olımpıadasynyń qola júldegeri Sofıa Berýlseva saldy. Jarystyń ekinshi kúninde synǵa túsken otandasymyz óz salmaǵynda qarsylas shaq keltirgen joq. Al djıý-djıtsýdyń nevaza túrinen synǵa túsken Galına Dývanova men mýaı-taıdan 2 dúrkin álem chempıony Almaz Sársembekov fınalda súrinip, jarystyń kúmis júldegerleri atandy. Sondaı-aq sporttyq akrobatıkadan Danıel Dıl men Vadım Shýlıar juby úzdik úshtikti túıindedi.
Sportty damytý dıreksııasynyń deregi boıynsha, Qazaqstan quramasy Dúnıejúzilik oıyndarǵa 1993 jyldan beri qatysa bastaǵan. Sol jyly Nıderland Koroldiginiń Gaaga qalasynda ótken dodada jerlesterimiz sporttyń 20 túrinen baq synap, 1 altyn, 1 kúmis pen 1 qola medal jeńip aldy. Al eń keıingi ret 2017 jyly Vroslav qalasynda (Polsha) ótken oıyndarda óner kórsetip, jerlesterimiz 27 sport túrinen 1 altyn, 5 kúmis jáne 2 qola medal enshilegen edi. Bırmıngem oıyndary júlde sany men sapasy jaǵynan 2-orynǵa shyqty.
Esterińizge sala keteıik, Bırmıngemde álemniń ár elinen kelgen 3500-den astam atlet 34 sport túrinen 223 medal jıyntyǵyn sarapqa saldy. Sonyń ishinde Qazaqstandyq sportshylar 8 sport túri – kıkboksıng, sadaq atý, mýaı-taı, djıý-djıtsý, sporttyq akrobatıka, breıkıng, WKF karateden júldege talasty.
Dúnıejúzilik oıyndar 1981 jyldan bastap ár 4 jylda bir ret, Olımpııa oıyndarynan keıingi jyly uıymdastyrylady. Dúnıejúzilik oıyndar 2001 jyldan bastap Halyqaralyq Olımpıada komıtetiniń qol astyna kóshti. Áýeli tek Olımpıada baǵdarlamasyna kirmeıtin sport túrlerinen ótkizilse, bertin kele 4 jyldyqtyń basty básekesindegi sport túrleri qosyldy. Máselen, Bırmıngemde kórkem gımnastıka, sadaq atý, quzǵa órmeleý syndy olımpıadalyq sport túrlerinen júldeler sarapqa salynady. Al Dúnıejúzilik oıyndarda lakross, kanoe-marafon, dron jarystyrý, kıkboksıng, breık-dans, parkýr men arqan tartys sekildi sport túrlerinen alǵash ret jarys ótedi.
