Basty basymdyq – jumyspen qamtý

Jalaqy bereshegi – 34 mln teńge

Mınıstrdiń deregine súıensek, Atyraý oblysynda 9,5 myńnan astam kásiporyn men mekeme jumys isteıdi. Onda 278 myń jaldamaly qyzmetker eńbek etedi. О́ńirde kompanııalardaǵy 242 myń jumyskerdi qamtı otyryp, jumys oryndaryn saqtaý boıynsha 3,7 myń memorandýmǵa qol qoıylǵan. Iri jáne orta kásiporyndardyń 97,8 paıyzy qyzmetkerlerimen ujymdyq sharttar jasalǵan. Al 109 kásiporyn jalaqysy tómen 108 myń qyzmetkerlerdiń eńbekaqysyn 5-ten 50%-ǵa deıin kótergen. Alaıda eńbek janjaly týyndaý qaýpi joıylmaǵan kásiporyndar bar.

– Jergilikti atqarýshy organdar eńbek janjalynyń aldyn alýǵa jáne jol bermeýge tıis. Jumys berýshilerdiń ujymdyq sharttar men memorandýmdarǵa sáıkes jumys oryndaryn saqtaý jónindegi mindetterin oryndaýyna turaqty monıtorıng jasalýy kerek. Jumysshylardyń eńbek jaǵdaıy men jalaqy deńgeıine únemi saýaldama júrgizý qajet, – dedi T.Dúısenova.

Mınıstrdiń aıtýynsha, munaıly óńirde jalaqy qaryzy joıylmaǵan kásiporyndar áli de bar. Qazir 9 kásiporynda jalpy somasy 34 mln teńgeni quraıtyn eńbekaqy bereshegi qalyptasyp otyr.

– Ákimdik oblystyq prokýratýra, qarjy jáne ádilet organdarymen birlese jalaqy, áleýmettik aýdarymdarǵa qatysty bereshekti óteýdiń egjeı-tegjeı jospar-kes­tesin ázirleýge tıis. Soǵan sáıkes jalaqy jónindegi yqtımal bereshekti anyqtaý, jumyskerlerdi jumystan bosatý, áleýmettik aýdarymdardy tóleýdiń tómendeýine monıtorıng júrgizilgeni jón, – dedi mınıstr.

T.Dúısenovanyń pikirinshe, sheteldik jumys kúshin tartatyn jumys berýshiler tıisti zańdylyqty saqtaı bermeıdi. Máselen, Atyraý oblysynda bıyl óndiriste 21 qyzmetker zardap shekken. Onyń úsheýi qaza tapqan. Sol sebepten, zańbuzýshylyqqa jol bergen jumys berýshilerge pármendi sharalar qabyldap, óńirlik úshjaqty komıssııada tekserý nátıjelerin qaraýdy usynyp otyr.

– Oblys ákimdigi eń kóp jazataıym oqıǵaǵa jol bergen jumys berýshiniń árqaısysymen qaýipsiz eńbek jaǵdaıyn qamtamasyz etý jónindegi is-sharalar josparyn ázirlep, oryndalýyn mindetti túrde baqylaýy qajet. Memlekettik eńbek ınspektorlary óndiristik jaraqat alýdy azaıtý maqsatynda kásiporyndarǵa profılaktıkalyq baqylaý jumystaryn kúsheıtýge tıis, – dep tapsyrma berdi T.Dúısenova.

Jol kartasynyń yqpaly tıe me?

Jylyoı aýdanyndaǵy «Teńiz» ken ornynda Keleshek keńeıtý jáne Uńǵyma erneýiniń qysymyn basqarý jobalaryn iske asyrý aıaqtalýǵa jaqyndady. Qazir atalǵan eki jobanyń 93%-y oryndalyp, jumysshylardy bosatý bastal­dy. Osyǵan baılanysty Eńbek jáne halyqty áleýmettik qorǵaý mınıstr­ligi jobadan bosatylatyndardy jumysqa ornalastyrý jóninde Jol kartasyn ázirledi. Jol kartasyna Eńbek jáne halyqty áleýmettik qorǵaý mınıstri Tamara Dúısenova, Atyraý oblysynyń ákimi Serik Shápkenov pen «Teńizshevroıl» JShS bas dırektory Kevın Laıon qol qoıdy.

– Osy kezge deıin atalǵan jobalardan 7,6 myńnan astam qyzmetker bosatyldy. Onyń ishinde 1,1 myń jumysshy «Teńizshevroıl» JShS-niń ózge jobalaryna, 449 adam basqa kompanııalarǵa jumysqa ornalastyryldy. Alaıda jergilikti atqarýshy organdardyń jobadan bosatylǵan qyzmetkerlerdi jumysqa ornalastyrý deńgeıi tómen. Qazir elektrondy eńbek bırjasynda 108 myń bos jumys orny bar. Onyń ishinde iske asy­ry­lyp jatqan ulttyq jobalar sheń­berinde 10,4 myń bos jumys orny tur. Jumys oryndarynyń 12 jáne 25%-y – tehnıkalyq maman­dyqtar. Ákimdikter jobadan bosatyl­ǵandardy jumysqa ornalasty­rýdy jandandyrýy qajet, – dedi T.Dúısenova.

Onyń aıtýynsha, mınıstrlik ázirlegen Jol kartasy «Teńizdegi» jobadan bosatylǵandardy jumys­pen qamtýdy kózdeıdi. Onda mı­nıs­trliktiń, óńirler ákimdikteriniń «Teńizshevroıl» JShS-men, qosalqy merdiger mekemelermen ózara is-qı­mylynyń naqty algorıtmi naq­tylanǵan.

– Jumystan bosatylǵan kóptegen qyzmetker Atyraý oblysyna basqa óńirlerden kelgenin umytpaǵan jón. Sondyqtan jergilikti ákimdikter olardy jumyspen qamtýǵa jár­demdesý sharalaryna tartýy qajet, – dep atap ótti T.Dúısenova.

Atyraý oblysynyń ákimi S.Sháp­kenovtiń málim etýinshe, «Teńiz­shevroıl» men merdiger kompanııalardan josparly túrde bosatylǵan azamattardy jańa jumyspen qamtý baǵytyndaǵy jospar júzege asyrylady. Qazir Atyraý oblysynda jańa jumys oryndaryn ashý bo­ıynsha tıisti jumystar júrip jatyr. Ásirese óńirdiń keshendi damý jospary aıasynda naqty jobalar qolǵa alynǵaly otyr.

«Teńizshevroıl» JShS bas dırektory K.Laıonnyń pikirinshe, kompanııa jol kartasy aıasynda memlekettik organdarmen birlesip jumys isteýge daıyn. О́ıtkeni otan­dyq ekonomıkaǵa Keleshek keńeı­tý jáne Uńǵyma erneýiniń qysy­myn basqarý jobasynyń mýltıp­lı­katıvti yqpaly tıgen.

– Biz Atyraý oblysynyń ákim­di­gimen, Energetıka, Eńbek jáne ha­lyqty áleýmettik qorǵaý mınıstr­lik­terimen birlesken jumysty oń baǵalaımyz. Túrli jumystardyń aıaqtalýyna oraı Keleshek keńeıtý jobasy men Uńǵyma erneýiniń qysymyn basqarý jobasynyń jú­ze­ge asyrylýyna birlese monıtorıng júrgizemiz. Qazir jobanyń 93%-y oryndaldy. Joba bastalǵaly beri «Teńiz­shevroıl» jergilikti mamandar­dy oqytyp, biliktiligin arttyrdy. Bul – bolashaqta eldegi jáne shetel­degi ónerkásip jobalarynda táji­rıbesi men bilimin qoldana alatyn qa­zaqstandyq 25 myńnan astam maman. Sondaı-aq joba halyqaralyq kompanııalarmen seriktestik arqyly tehnologııalardy tartýǵa, óńirde jańǵyrtylǵan ınfraqurylymdardy qalyptastyrýǵa yqpal etti, – deıdi K.Laıon.

Jol kartasynda kózdelgen ózara is-qımyl algorıtmine sáıkes, «Teńiz­shevroıl» JShS toqsan sa­ıyn atalǵan mınıstrlikke, óńirler­diń ákimdikterine kásipter men óńir­ler bólinisinde merdiger jáne qosal­qy merdiger kásiporyndar qyzmet­ker­leriniń jumystan bosatylýy týra­ly aqparatty usynady. Ony elek­trondy eńbek bırjasyna ornalastyrady.

Jergilikti atqarýshy organ­dar jumystan bosatylǵan qyzmet­ker­lerdi jumyspen qamtýǵa járdemde­sýdiń belsendi sharalaryna tartý bo­ıynsha mindettemelerdi oryndaýǵa tıis. Onyń ishinde qysqa merzimdi oqý­ǵa jiberý, sýbsıdııalanatyn ju­mys oryndaryna jáne ulttyq joba­lar sheńberinde iske asyrylatyn jo­balarǵa jumysqa ornalastyrý, grant­tar men mıkrokredıtter berý bar.

Eńbek jáne halyqty áleýmettik qorǵaý mınıstrligi «Teńizshevroıl» qyzmetkerlerin jumystan bosatý jáne naqty jumysqa ornalasty­rý monıtorıngin júzege asyrady. Jumystan bosatylatyn qyz­met­kerler úshin bos jumys oryndary­nyń onlaın-jármeńkesin uıymdas­tyrady. Jumysynan aıyrylǵan adam­darǵa memlekettik áleýmettik saq­tandyrý qorynan áleýmettik tó­lem taǵaıyndaýdy qamtamasyz etedi.

Atyraý oblysy