Batys Qazaqstan oblysy ortalyǵyndaǵy kúretamyr kóshelerdiń birinde orta jóndeý jumysy eki aı buryn bastalǵan. Merdiger alty aı ishinde úsh shaqyrymdyq jol qurylysyn tolyq bitirýge ýáde berip otyr.
Merdiger kompanııa dırektory, Oral qalalyq máslıhatynyń depýtaty Janna Kenjınanyń aıtýynsha, qazir jumysshylar kóne asfalt jabynynyń joǵarǵy qabatyn frezamen kesip alyp jatyr. Bul kóne asfalt qala shetindegi múldem jolsyz kóshelerge tóselmek. Osy jol qurylysyn 30 adam, 25 tehnıka jumyldyrylǵan. Qazirdiń ózinde 1,6 km jol jóndeý jumysy aıaqtalypty. Kepildik merzimi – 5 jyl.
– Qala turǵyndarynyń, ásirese qoǵamdyq kólikterdiń qozǵalysyna kedergi kelmes úshin kósheni tolyq jappadyq. Bul jumysty birshama qıyndatty. Áıtse de belgilengen merzimnen keshikpeımiz. Qurylysqa qajet qıyrshyq tasty Aqtóbeden tasymaldaımyz. Vagon máselesinde qıyndyq bar. Shyńǵyrlaýdan Ozınkige deıingi temir joldyń barlyq bólimshesinde jalǵyz teplovoz júr. Bul týraly jaýapty organdarǵa únemi aıtyp otyramyz, – deıdi Janna Kenjına.
Qazaqstan Respýblıkasy Parlamenti Májilisiniń depýtaty Snejanna Imasheva qala turǵyndary tarapynan kóshe joldaryn jóndeý jóninde ótinish kóp túsetinin aıtady.
Sondaı-aq Snejanna Imasheva birneshe kúnnen beri oblystyń birqatar aýdanynda halyqpen júzdesip, áleýmettik nysandar men ınjenerlik kommýnıkasııalar qurylysymen tanysty. Depýtat keıbir turǵyndardyń ótinishi men usynysyn jergilikti jáne respýblıkalyq deńgeıdegi ýákiletti organdar aldynda kótermek.
Batys Qazaqstan oblysy
