«Rakýv» – «Astana» – 5:0
Bıylǵy Eýrokýbok oıyndaryna qatysyp jatqan qazaqstandyq komandalardyń arasyndaǵy eń tájirıbelisi, Chempıondar lıgasy men Eýropa lıgasynyń toptyq kezeńderinde oınaǵan «Astana» eki jyldan beri jankúıerler senimin aqtaı almaı keledi. Elordalyq klýb keıingi eki jylda Eýrokýbok básekeleriniń úshinshi aınalymynan árige asa almaıtyn halge jetti. Tipti bıyl sol mejeden kórinýdiń ózi úlken jetistik bolaıyn dep tur. Sebebi Qazaqstannyń alty dúrkin chempıondary ekinshi irikteý kezeńniń syrt alańdaǵy alǵashqy matchynda Polshanyń «Rakýv» klýbynan 5:0 esebimen ońbaı jeńildi. Endi «Astana» kelesi kezeńge shyǵý úshin aldaǵy beısenbi kúni bolatyn matchta qarsylas komandanyń qaqpasyna jaýapsyz alty gol soǵýy kerek. Al óz alańynda bes gol soqqan «Rakýv» syrt alańda alty gol ótkize qoımas...
Qazir «Astana» klýbynyń ishinde qandaı jaǵdaı bolyp jatqany bizge belgisiz, biraq Eýrododa týrnırleriniń turaqty qatysýshysyna aınalǵan klýb bıyl alǵash ret syrt alańdaǵy kezdesýge match bolatyn kúni áreń jetti. Ádette komandalar syrt alańdaǵy oıyndarǵa eki kún buryn baryp, kezdesý bolatyn stadıonda jattyǵý ótkizip, jergilikti ýaqyt beldeýine boı úıretetin. Al klýb basshylyǵyn bıyl ne túlen túrtkeni belgisiz, áıteýir fýtbolshylaryn ekige bólip, jolaýshylar ushaǵymen áreń degende Polshaǵa jetkizdi. Áıtpese, irikteý oıynynyń jerebesi ótken aıdyń 15-i kúni tartylyp, qarsylas komanda 35 kún buryn belgili boldy. Eger «Astana» klýbynyń basshylyǵy charter jaldaýǵa qarjy tappaǵan bolsa, fýtbolshylaryn jaıaý jiberse de matchqa belgilengen merzimnen buryn jetkizýge ýaqyty boldy ǵoı.
Eger mundaı jaǵdaı Eýrokýbok jarystaryna tuńǵysh ret qatysyp jatqan tájirıbesi az klýbtarda bolsa, jankúıerler túsinistikpen qaraıtyn edi. Alaıda ataǵy Eýropaǵa jaıylǵan, jyldyq bıýdjeti bes mıllıardqa jýyq «Astananyń» ózi osyndaı jaǵdaıǵa dýshar bolyp jatsa, basqa klýbtardyń jeńilisine renjýdiń ózi ábestik bolar.
Eń ókinishtisi, Polshadaǵy matchtyń aıaqtalǵanyna baqandaı tórt kún ótse de, áli kúnge deıin «Astana» klýbynyń basshylyǵy jankúıerlerdiń aldyna shyǵyp, jeńilistiń sebebin túsindirgen joq. Jaraıdy, aqtalýǵa ótirik tappaı jatsa, eń quryǵynda, áleýmettik jelidegi resmı paraqshalary arqyly fýtbol jankúıerlerinen keshirim suraýyna bolar edi ǵoı. «Ash qulaqtan, tynysh qulaq jaqsy» dedi me eken, klýb basshylyǵy sol boıy jumǵan aýzyn ashqan joq.
«Tobyl» – «Lınkoln Red Imps» – 2:0
О́zge komandalardyń oıyndaryna toqtalar bolsaq, Konferensııa lıgasynyń bıylǵy irikteý kezeńine qatysyp jatqan tórt komandanyń ishinen Qostanaıdyń «Tobyly» ǵana ekinshi aınalymdaǵy alǵashqy kezdesýin jeńispen bastady. Gıbraltardyń 26 dúrkin chempıony – «Lınkoln Red Imps» klýbyn qabyldaǵan el chempıondary Qostanaıdaǵy «Ortalyq» stadıonda ótken matchta 2:0 esebimen basym tústi.
Gıbraltar quramasynyń, ishki chempıonatynyń deńgeıi Qazaqstanmen salystyrǵanda áldeqaıda tómen bolǵanymen, «Lınkoln» Eýrokýbokta tájirıbeli komandanyń biri sanalady. Sondyqtan fýtbol mamandary bul oıynda «Tobyldy» taǵy bir qıyn match kútip tur dep boljaǵan edi. Qostanaıdaǵy kezdesýdiń alǵashqy bóliginde alań ıeleri qarsylas komandanyń qaqpasyna tolassyz shabýyl uıymdastyrǵanymen, «Lınkoln» qorǵaýshylary men qaqpashysy óte saýatty oıyn kórsetti. Birinshi taımda esep ashylǵan joq.
«Tobyl» úzilisten keıin de birinshi taımdaǵy qarqynyn bir sátke de báseńdetken joq. Nátıjesinde, matchtyń 65-mınýtynda alańǵa qosalqy quramnan shyqqan Aıbar Jaqsylyqov buryshtamadan gol soǵyp, «Tobyldy» esepte alǵa shyǵardy. «Lınkoln» da qarap almaı, goldyń qarymtasyn qaıtarýdyń amalyn qarastyrdy. Alaıda jasaǵan soqqylary birde Mokın qorǵaǵan qaqpanyń baǵanyna tıse, keleside mańdaıshaǵa tıip, keri serpildi. Kezdesýdiń 90-mınýtyna deıin tabloda 1:0 esebi tirkelip turǵan edi. Tóreshi qosqan qosymsha mınýttyń alǵashqysynda «Tobyldyń» qorǵaýshysy Jarko Tomashevıch baspen gol soǵyp, oıynnyń esebin 2:0-ge jetkizip, matchtyń núktesin qoıdy. Alǵashqy kezdesýden keıin eki dop basymdyǵyna ıe bolǵan «Tobyl» syrt alańdaǵy qarymta matchta da aıanyp qalmaıdy dep úmittenemiz.
Týrnır erejesine sáıkes, eki komanda arasyndaǵy jaýapty match beısenbi, ıaǵnı 28 shildede Gıbraltarda ótýge tıis bolatyn. Keıinirek bul kezdesýdiń ýaqyty seısenbige aýystyrylǵany belgili boldy. Endi «Lınkoln» men «Tobyl» arasyndaǵy qarymta match 26 shildede ótedi.
«Qaırat» – «Kıshvarda» – 0:1
Qazaqstandyq komandalardan birinshi bolyp Konferensııa lıgasynyń toptyq kezeńinde oınaǵan Almatynyń «Qaıraty» kútpegen jerde óz alańynda Majarstannyń ortańqol komandasy sanalatyn «Kıshvardadan» jeńilip qaldy. Almatydaǵy Ortalyq stadıonda ótken oıyn 0:1 esebimen majarstandyq klýbtyń paıdasyna sheshildi.
90 mınýt boıy oıyn tizginin óz qoldaryna alǵan almatylyq klýbtyń oıynshylaryna bul kezdesýde sáttilik jetispedi. Sheberlik boıynsha qarsylastarynan bir bas joǵary turǵan «Qaırat» fýtbolshylary gol soǵýǵa qansha tyrysqanymen, oǵan qarsylas komandanyń ókilderi múmkindik bermedi. Al qarsy shabýylǵa ıek artqan «Kıshvarda» fýtbolshylary ózderine berilgen bir ǵana múmkindikti sátti paıdalanyp, «Qaırat» qaqpasyna gol soǵyp ketti. Kezdesýdiń 82-mınýtynda alańǵa qosalqy quramnan shyqqan Iаsır Asanı komandasynyń jeńis golyn saldy. Eki komanda arasyndaǵy jaýapty kezdesý 28 shildede Majarstanda ótedi.
«Qyzyljar» – «Osıek» – 1:2
Eýrokýbok básekelerine bıyl tuńǵysh ret qatysqan Petropavldyń «Qyzyljary» da horvatııalyq «Osıektiń» osal tusyn taba almady. Elordadaǵy «Astana Arena» stadıonynda ótken kezdesýde qonaqtar 1:2 esebimen jeńiske jetti. Bir qyzyǵy, ekinshi taımda «Qyzyljar» qaqpasyna soǵylǵan eki goldy da buryn Qazaqstan chempıonatynda dop tepken fýtbolshylar óz enshilerine jazdy. Atap aıtar bolsaq, birinshi goldy kezdesýdiń 58-mınýtynda 2014-2015 jyldary Qaraǵandynyń «Shahterinde» oınaǵan aýstrııalyq shabýylshy Mıhret Topchagıch salsa, jeti mınýttan keıin majarstandyq jartylaı qorǵaýshy Laslo Klıaınhaısler mergendigimen kózge tústi. Qazaqstandyq fýtbol jankúıerleriniń esinde bolsa, Laslo 2018 jyly «Astana» sapynda óner kórsetip, el chempıony atanǵan bolatyn. Al matchtyń aıaqtalýyna alty mınýt qalǵanda, ıaǵnı 84-mınýtta horvatııalyq jartylaı qorǵaýshy Darko Neıashmıch abaısyzda óz qaqpasyna gol soǵyp alyp, tarazy basyn qysqartty – 2:1. Endi qarymta match 28 shilde kúni Horvatııada ótedi.
