Velosportshylar arasyndaǵy beıresmı álem chempıonaty sanalatyn bıylǵy «Týr de Frans» básekesi aldynda Astana Qazaqstan Team velokomandasynyń bas menedjeri Aleksandr Vınokýrov «Basty maqsat – keminde jarystyń bir kezeńinde jeńiske jetý jáne Alekseı Lýsenkonyń jalpy esepte TOP-10 velosportshynyń qataryna qosylýy», degen bolatyn. «Astana» velosportshylary basshylyqtyń jeke kezeńderde top jarý maqsatyn oryndaı almasa da, Alekseı Lýsenko úzdikter qatarynan kórinip, senimdi aqtady.
Jarystyń alǵashqy 10 kezeńinde qalyń toptyń ortasynda júrgen qazaqstandyq veloshabandoz 11-kezeńnen keıin ǵana belsendiligin arttyrdy. Máselen, 11-kezeńde otandasymyz márege segizinshi kelip, jalpy esepte toǵyzynshy orynǵa bir-aq joǵarylady. Alaıda keıingi bes kezeńde qarqynyn báseńdetip alǵan A.Lýsenko TOP-10 sportshynyń qatarynan shyǵyp qaldy. Al 16-17-kezeńderde jerlesimiz qaıtadan shabýylǵa shyǵyp, márege besinshi jáne altynshy bolyp jetti. Osy nátıjesinen keıin ol qaıtadan aldyńǵy lekten kórindi. Jarystyń sońǵy kezeńderine deıin qarqynyn bir sátke de báseńdetpegen Alekseı osylaısha jyldyń eń mańyzdy Grand-týryn toǵyzynshy orynmen túıindedi.
Árıne «Týr de Franstyń» tórt jeńimpazyn shyǵarǵan «Astana» sııaqty Eýropadaǵy dańqty komandanyń birde-bir ókili kezeń jeńimpazy atana almaǵany ókinishti. Biraq bıylǵy básekege qazaqstandyq komanda negizgi velosportshylarynyń jaraqatyna baılanysty mundaı iri dodalarda asa tájirıbesi joq sportshylarǵa senim artýǵa májbúr boldy. Sondyqtan Alekseı Lýsenkonyń úzdik 10 veloshabandozdyń qatarynan kórinýiniń ózi dál qazirgi jaǵdaıda táýir kórsetkish dep esepteımiz. Eger Lýsenkoǵa Vınchenso Nıbalı, Mıgel Anhel Lopes sekildi tisqaqqan tájirıbeli sportshylar kómekteskende, bálkim nátıje budan da jaqsy bolar ma edi, kim bilsin?
Sóıtip, bıylǵy «Týr de Fransta» osy jarystyń keıingi eki jyldaǵy jeńimpazy slovenııalyq Tadeı Pogachardy (UAE Team Emirates) tuǵyrdan taıdyrǵan danııalyq Ionas Vıngegor (Jumbo-Visma) top jardy. Ekinshi oryndy Tadeı Pogachar ıelense, úzdik úshtikti 2018 jylǵy jeńimpaz brıtanııalyq Geraınt Tomas (Ineos Grenadiers) túıindedi.
Jekeleı atalymdarǵa toqtalar bolsaq, sprınterler básekesinde úzdik shyqqan belgııalyq Vaýt Van Art (Jumbo-Visma) jasyl jeıdege ıe bolsa, taýly kezeńderdiń koroline tıesili shaqpaq jeıdeni Ionas Vıngegor kıdi. Al eń úzdik jas veloshabandozǵa beriletin aq jeıde Tadeı Pogacharǵa buıyrdy. Komandalyq esepte brıtanııalyq Ineos Grenadiers úzdik shyqsa, «Astana» veloklýby 22 komandanyń ishinen 10-orynǵa jaıǵasty.
