Mádenı, rýhanı is-shara aldymen Aqtóbe qalasynda Ábilqaıyr han men Bopaı hanymnyń ónegege toly ómiri men qoǵamdyq-saıası qyzmetteri týraly tanymdyq konferensııamen bastaldy. Sondaı-aq Ábilqaıyr han men Bopaı hanymnyń ómirlerin zertteýshi tarıhshylar men ólketanýshylar tarapynan ortaq taqyrypqa qatysty oı-pikirler aıtyldy.
Odan keıin zııaly qaýym ókilderi, Ábilqaıyr han men Bopaı hanymnyń urpaqtary han baba máńgilik meken tapqan Áıteke bı aýdanyna atbasyn tirep, Tolybaı aýylyndaǵy «Ábilqaıyr han» mýzeıinde uly tulǵa men jarynyń ómirimen tanysty. Sońynda mýzeıge Bopaı hanymnyń portreti syıǵa tartyldy.
Rýhanı is-sharanyń sharyqtaý shyńy «Han molasy» – Ábilqaıyr han kesenesiniń basynda júzege asty. Aldymen qorym basynda mal soıylyp, quran baǵyshtaldy. Aqyndar aıtys kórigin qyzdyryp, aýdan ónerpazdary konsert qoısa, oblystyq T.Ahtanov atyndaǵy drama teatrdyń ártisteri teatrlandyrylǵan qoıylym kórsetti. Ulttyq sport oıyndary da bul astyń kórkin keltirdi. Jalpy, atalǵan aýqymdy jıynǵa elimizdiń túpkir-túpkirinen zııaly qaýym ókilderi kelip qatyssa, ony 300-ge jýyq aýdan halqy tamashalady.
Is-shara sońynda ony uıymdastyrýǵa kómek qoldaryn sozǵan jomart júrekti demeýshiler men Áıteke bı aýdanynyń ákimdigine babalar urpaqtary shynaıy alǵystaryn jetkizdi.
A.ÁBENOVA
Aqtóbe oblysy,
Áıteke bı aýdany
