«Tobyl» kelesi kezeńge ótti

Osydan bir apta buryn «Tobyl» Qostanaıdaǵy «Ortalyq» stadıonda Gıbraltar chempıonatynyń 26 dúrkin jeńimpazy – «Lınkoln Red Imps» klýbymen sheberlik baıqasyp, 2:0 esebimen basym túsken bolatyn. Sol kezdesýde shabýyl­shy Aıbar Jaqsylyqov pen qorǵaýshy chernogorııalyq Jar­ko Tomashevıch gol soǵyp, jergi­likti jankúıerlerdi qýantqan edi. Al seısenbi kúni keshkisin Gıb­ral­tardaǵy bes myń jan­kúıer syıatyn «Vıktorııa» sta­dıo­nyndaǵy qarymta kezdesýde Mı­lan Mılanovıch shákirtteri qarsylastarynan 1:0 esebimen aılasyn asyryp, Konferensııa lıgasynyń úshinshi irikteý kezeńine joldama aldy.

Birinshi matchtaǵy basymdyqtan keıin jaýapty kezdesýdiń favorıti sanalǵan «Tobyl» syrt alańdaǵy básekeniń alǵashqy mınýtynan bastap oıyn tizginin qolyna alyp, alań ıelerin biraz ábigerge saldy. Kezdesýdiń 30 mınýtyna deıin jergilikti fýtbolshylar «Tobyldyń» qarqynyna tótep bergenimen, ári qaraı shamasy jetpedi. Sóıtip, kezdesýdiń 31-mınýtynda serbııalyq legıoner Zoran Toshıch qarsylastyń aıyp alańynda birneshe fýtbolshyny erkin aldap ótip, jeke sheberliginiń arqasynda Deıl Koýlıng qorǵaǵan qaqpadan sańylaý tapty – 1:0. Birinshi taımnyń sońyna deıin bizdiń jigitterde esepti eseleıtin birneshe múmkindik bolǵanymen, sheshýshi sátte múlt ketip jatty. 

Úzilisten keıin de «Tobyl» fýtbolshylary shabýylyn báseń­detken joq. Ekinshi 45 mınýttyń ishinde qostanaılyqtar «Lınkoln Red Imps» qaqpasyna 10 soqqy jasap, onyń tórteýin qaqpaǵa dál ba­ǵyttady. Alaıda Deıl Koýlıng qyraǵylyq tanytyp, qaqpasy­na birde-bir gol ótkizgen joq. Alań ıeleri ekinshi taımda eki márte qaýipti shabýyl uıymdas­tyr­ǵanymen, Mokınnen aılasyn asyra almady. Osylaısha, eki match­tyń qorytyndysy boıynsha 3:0 esebimen jeńiske jetken «Tobyl» týrnırdiń kelesi satysyna shyqty. Jerlesterimiz Konferensııa lıgasynyń úshinshi aınalymynda «Tırana» (Albanııa) men «Zrınskı» (Bosnııa jáne Gersegovına) jubynyń jeńim­pazymen kezdesedi. Eki klýb ara­syn­daǵy alǵashqy oıyn 20 shildede Albanııada ótip, match qo­naq­tardyń paıdasyna sheshilgen bola­tyn (0:1). Qarymta kezdesý búgin túnde Bosnııa jáne Gerse­go­vınanyń Mostar qalasynda ótedi.

Búgin Qazaq­stannyń úsh komandasy – «Astana», «Qaı­rat» jáne «Qyzyljar» Kon­ferensııa lıga­synyń ekinshi irik­teý kezeńin­degi qarymta matchtaryn ótkizedi. «Astana» óz alańynda Polshanyń «Ra­kýv» (0:5) klýbyn qabyldasa, Pet­ro­pavldyń «Qyzyljary» syrt alań­da Horvatııanyń «Osıek» (1:2) klýbymen, Almatynyń «Qaıraty» Majarstanda «Kıshvardamen» (0:1) kezdesedi.