Oblystyq bilim basqarmasy basshysynyń mindetin atqarýshy Aınagúl Dúısekenovanyń aıtýynsha, Prezıdent tapsyrmasyna sáıkes bólingen bilim grantynda kásiptik, tehnıkalyq, gýmanıtarlyq baǵyttaǵy túrli mamandyqtar qamtylǵan. Bıyl Atyraý óńiriniń túlekteri úshin 4 myń grant bólindi. Onyń 3 200-in tehnıkalyq, al 800-in pedagogıkalyq mamandyqty tańdaǵan túlekterge berý kózdelip otyr.
– Bul mamandyqtardyń óńir úshin mańyzy zor. Sol sebepten, túlekterge beriletin granttyń artyqshylyǵy bar. Sebebi grant alǵandarǵa keıinnen eńbek ótili túrinde qaıtarý jaýapkershiligi qarastyrylmaǵan. Túlekterge shákirtaqy alyp, Qazaqstannyń eń úzdik joǵary oqý oryndarynda bilim alýyna tolyqtaı múmkindik berilgen, – deıdi A.Dúısekenova.
Al oblystyq densaýlyq saqtaý basqarmasynyń basshysy Ashan Baıdýálıevtiń deregine qaraǵanda, óńirde 6 747 medısına qyzmetkeri jumys isteıdi. Onyń ishinde 1 515 dáriger, 5 232 orta býyn medısına qyzmetkeri turǵyndarǵa medısınalyq kómek kórsetip júr.
– Munaıly óńirdiń medısına salasynda áli de 201 dáriger jetispeıdi. Aýrýhanalar men emhanalarda, ózge emdeý oryndarynda reanımatolog, akýsher-gınekolog, ınfeksıonıst, jalpy tájirıbe dárigeri, pedıatr sekildi joǵary bilimdi kadrlardyń orny bos tur. Aýyldardaǵy medısına mekemelerine 40 dáriger qajet, – deıdi A.Baıdýálıev.
Onyń aıtýynsha, joǵary medısınalyq oqý ornyn bitirgen Atyraý oblysynyń túlekterin bilikti dáriger retinde bilimin odan ári rezıdentýrada jalǵastyrýyna jaǵdaı jasalyp otyr. Jyl saıyn osy maqsatqa 70-ten asa grant bólinedi. Máselen, 2021 jylǵy jeltoqsanda Atyraýda M.Ospanov atyndaǵy Batys Qazaqstan medısınalyq ýnıversıtetiniń fılıaly ashyldy. Qazir basqa óńirlerden kelgen 35 rezıdent oblystaǵy medısınalyq mekemelerde jumys istep júr.
– Memleket medısına qyzmetkerlerine jan-jaqty qoldaý kórsetip, densaýlyq saqtaý salasyn damytýǵa basa nazar aýdaryp keledi. О́ıtkeni ult saýlyǵy – jańa ádiletti Qazaqstandy qurý jolyndaǵy memlekettik saıasattyń asa mańyzdy baǵyty. О́ńirdegi kadr jetispeýshiligin joıý maqsatynda birqatar jumys qolǵa alyndy. Máselen, S.Asfendııarov atyndaǵy qazaq ulttyq medısına ýnıversıteti atyraýlyq túlekter úshin farmasııa fakýltetine 30 grant bóldi. Bul – mektep bitirýshi túlekterge úlken múmkindik. Oblystyq ákimdik tarapynan Atyraý joǵary medısınalyq kolledjinde bilim alý úshin jyl saıyn 70-ten astam grant bólinedi, – dedi A.Baıdýálıev.
Sondaı-aq dárigerler men medbıke sekildi medısına qyzmetkerleriniń biliktiligin arttyrýdyń naqty jospary jasalǵan. Josparǵa sáıkes 20 baǵyt boıynsha 80 taqyryp bekitilip, akýsher-gınekolog, anestezıolog-reanımatolog, neonatolog, balalar hırýrgi, onkolog jáne basqa mamandyq ıeleri oblystyń medısına mekemelerinde, ulttyq ǵylymı-zertteý ınstıtýttarynda, Izraıl men Germanııa Respýblıkasynda bilimin jetildiredi.
Atyraý oblysy
