Ekinshi irikteý kezeńiniń alǵashqy matchynan keıin qazaqstandyq komandalardyń arasynda kelesi kezeńge ótýge tek «Tobyldyń» ǵana múmkindigi joǵary edi. Sebebi óz alańynda Gıbraltardyń «Lınkoln Red Imps» klýbynan 2:0 esebimen basym túsken qostanaılyq ujym syrt alańdaǵy matchta teń oınasa da jetkilikti bolatyn. Al qalǵan úsh komandamyzdy tek iri eseptegi jeńis qana kelesi kezeńge alyp shyǵatyn edi.
Elordada ótken «Qyzyljar» men «Osıek» arasyndaǵy alǵashqy matchta qonaqtar 90 mınýt boıy alańda ústemdik tanytyp, 2:1 esebimen jeńiske jetken-di. Petropavldyqtar match boıy jarytyp shabýyl uıymdastyra almaı, áreń degende avtogoldyń arqasynda esep aıyrmasyn qysqartty. Araǵa apta salyp, Horvatııadaǵy 20 myńǵa jýyq jankúıer syıatyn «Gradskı vrt» stadıonynda ótken qarymta kezdesýdiń birinshi taımy ádettegideı «Osıektiń» basymdyǵymen ótti. Biraq alań ıeleri dop ustaý, qaqpaǵa soqqy baǵyttaý boıynsha qansha ústemdik tanytqanymen, «Qyzyljar» qaqpasynan sańylaý taba almady.
Al ekinshi taımda «Qyzyljar» fýtbolshylary matchty túbegeıli basqa arnaǵa buryp jiberdi. Úzilis ýaqytynda petropavldyq komandanyń bas bapkeri Álı Álıevtiń shákirtterine ne aıtqany belgisiz, áıteýir oıynshylarda jeńiske degen erekshe jiger baıqaldy. Nátıjesinde, kezdesýdiń 61-mınýtynda «Qyzyljardyń» grýzııalyq shabýylshysy Gıorgı Ivanıadze gol soǵyp, komandasyn esepte alǵa shyǵardy. Sóıtip, eki oıynnyń qorytyndysy boıynsha tarazy basy teńesken soń, kópshilik overtaım kórýge daıyndalyp jatqan edi. Alaıda 71-mınýtta «Qyzyljar» fýtbolshylary «Osıek» qaqpasyna ekinshi golyn soǵyp, matchtyń núktesin qoıdy. Bul joly ıvýarlyq jartylaı qorǵaýshy Musa Kone mergendik tanytty – 0:2. «Osıek» fýtbolshylary matchtyń qalǵan ýaqytynda emosııaǵa berilip, kóp jerde bilgeninen jańylyp jatty. Sóıtip, ekinshi taımda «Qyzyljar» qaqpasyna birde-bir dál soqqy baǵyttaı almaıdy.
Osylaısha, syrt alańda Horvatııanyń dańqty komandasyn 2:0 esebimen tize búktirip, qazaqstandyq komandalar arasynda sensasııa jasaǵan «Qyzyljar» Konferensııa lıgasynyń úshinshi aınalymyna joldama aldy. Jerlesterimiz bul kezeńde qazaqstandyq jankúıerlerge jaqsy tanys bolǵan Kıprdiń APOEL komandasymen kezdesedi. Kıprlik ujym ekinshi aınalymda Bolgarııanyń «Botev» klýbyn eki oıynda 2:0 esebimen qapy qaldyrǵan bolatyn.
APOEL búginge deıin qazaqstandyq komandalarmen Eýrododa oıyndarynda tórt márte kezdesken. «Astanamen» bir ret Chempıondar lıgasynyń, bir márte Eýropa lıgasynyń pleı-off kezeńinde kezdesse, keıinnen Eýropa lıgasynyń toptyq kezeńinde bir topta óner kórsetti. Alǵashqy eki pleı-off satysynda «Astananyń» mereıi ústem bolsa, toptyq kezeńde eki klýb ta bir-bir oıynda jeńiske jetken bolatyn. Al 2020 jyly Eýropa lıgasynyń ekinshi aınalymynda Shymkentke kelgen APOEL «Qaısardy» 1:4 esebimen tize búktirdi.
«Qyzyljar» men APOEL arasyndaǵy úshinshi aınalymnyń alǵashqy kezdesýi 4 tamyz kúni Kıprde, qarymta match 11 tamyz kúni elordada ótedi.
Konferensııa lıgasynyń ekinshi irikteý kezeńiniń matchtarynan keıin «Tobyldyń» da úshinshi aınalymdaǵy qarsylasy belgili boldy. Bul kezeńde el chempıondary Bosnııa jáne Gersegovınanyń «Zrınskı» klýbymen kezdesedi. Bosnııalyq klýb ekinshi aınalymda Albanııanyń «Tırana» komandasyn eki oıynnyń qorytyndysy boıynsha 4:2 (1:0, 3:2) esebimen utty.
«Zrınskı» klýbynyń irgetasy osydan 117 jyl buryn qalansa da, bıyl ishki chempıonattaǵy nebári jetinshi chempıondyǵyna qol jetkizdi. Sondaı-aq komanda 2013 jyldan beri Eýrokýbok oıyndarynyń turaqty qatysýshysyna aınalǵanymen, áli kúnge deıin toptyq kezeńge shyǵa almaı keledi. Bir qyzyǵy, «Tobyl» men «Zrınskı» Eýrokýbok oıyndarynda bıyl alǵash ret kezdesip turǵan joq. Buǵan deıin eki klýb 2010 jylǵy Eýropa lıgasynyń ekinshi aınalymynda jasyl alańda jolyǵyp, «Zrınskı» eki matchta da 2:1 esebimen jeńiske jetken bolatyn. Endi, mine, «Tobylǵa» 12 jyl burynǵy eseni qaıtaratyn tamasha múmkindik týyp tur.
Eki ujym arasyndaǵy alǵashqy oıyn 4 tamyz kúni Bosnııada, qarymta kezdesý 11 tamyzda Qostanaıda ótedi dep josparlanǵan.
О́kinishke qaraı, Qazaqstannyń Eýrokýboktardaǵy eń dańqty eki ujymy – «Astana» men «Qaırat» bıylǵy irikteýde ózderimen deńgeıles komandany jeńe almaı, jankúıerlerin jerge qaratty. Syrt alańdaǵy alǵashqy oıynda Polshanyń «Rakýv» komandasynan 5:0 esebimen jeńilgen «Astana» óz alańynda da qarsylastaryna 0:1 esebimen jol berdi. Al byltyr ǵana osy lıganyń toptyq kezeńinde óner kórsetken «Qaırat» eki matchta da Majarstannyń «Kıshvarda» klýbynan 1:0 esebimen jeńilip, Konferensııa lıgasynyń irikteý kezeńinen shyǵyp qaldy.
