Bul rette Mádenıet jáne sport mınıstrligi men Oqý-aǵartý mınıstrligi birige otyryp mektep jáne joǵary oqý oryndary qabyrǵasyndaǵy balalar jáne jasóspirimder sportynyń damýyna erekshe kóńil bólýge tıis dep sanaımyn. Onyń ózindik alǵysharty bar. Mektep jasyndaǵy oqýshyǵa normatıvtik jetistigi úshin «I, II, II dárejeli jasóspirim sportshy», sport salasyndaǵy jetken jetistigine arnalǵan «Sport sheberine úmitker», «Sport sheberi», t.b. dárejeler júıeli túrde zerttelip jolǵa qoıylǵany jón. Mádenıet jáne sport mınıstrligine mektep jasyndaǵy sportpen shuǵyldanatyn oqýshylarǵa jáne stýdent jastarǵa arnalǵan sporttyq tósbelgilerdi shyǵarý týraly usynystar mınıstrlik tarapynan qoldaý tappady. Osyǵan deıin atalǵan máselege qatysty jazǵan hatyma sol kezdegi Mádenıet jáne sport mınıstri A.Raıymqulovanyń atynan mynadaı jaýap berildi:
«Qurmetti Erlan Shaıahmetuly! Sport jáne dene shynyqtyrý isteri komıteti (budan ári – komıtet) siz usynǵan sporttyq ataqtar men razrıadtar úshin tósbelgilerdiń jobalary boıynsha kelesini habarlaıdy. Buǵan deıin habarlanǵandaı, «Dene shynyqtyrý jáne sporttyń ulttyq sıfrly platformasy (e-sport)» servıstik baǵdarlamalyq ónimi arqyly tıisti sporttyq ataqtar men razrıadtardyń sportshylarǵa avtomatty túrde berilýi josparlanýda».
Mınıstr ekeýmiz bir-birimizdi múlde túsinbeı otyrǵan sııaqtymyz. Iá, «e-sport» – zamanaýı sıfrly platforma. Ol jerden qandaı sporttyq seksııalar bar, jattyqtyrýshysy kim, balańyzdy qandaı sport túrine bergińiz keledi degen sekildi barlyq aqparatty alýǵa bolatynyn bilemiz. Degenmen bul jerde jasóspirim óz jetistigin keýdesine taǵyp júrse, artynan ergen ini-qaryndastaryn yntalandyryp sportqa jeteleıtini týraly sóz qozǵalyp otyr. Sıfrly jańa Qazaqstanǵa bet buryp damytyp jatyrmyz, túsinikti. Jas sportshy óziniń jetistikke jetken sportshy ekenin dáleldeý úshin «e-sport» platformasyn ashyp dáleldeýge tıis pe? Qaı sportshy «e-sport» platformasyndaǵy «jetistigin» keýdesine taǵyp júredi? Mundaı kózqaraspen balalardy yntalandyra alamyz ba? Estigennen góri kózben kórse, kóńil senedi. Taǵy birde: «Ol týraly óńirlerde qarajat qarastyrylmaǵan», degen jaýap aldym. Qalaı túsinýge bolady? Qazaqstan óz jastarynan qarajat únemdeı me? Kórshi Reseıde bul másele naqty jolǵa qoıylǵan. Sporttyq jetistikterin sportshylar keýdesine taǵyp júredi. Qazirgi Prezıdent Toqaevtyń tapsyrmasynan keıin osy máseleni taǵy bir elekten ótkizip, jastardyń óz sporttyq dáreje jetistigin keýdesine taǵyp júrýine jaǵdaı jasalar dep úmittenemiz.
Jalpy, mınıstrlikke bir suraq qoıǵym keledi. Mysaly, elimizde túrli salada jetken jetistikteri úshin eresekterge «Qurmet», «Parasat», t.b. orden-medaldar taǵylatyny aıan. Qyzmetkerlerge úlgi retinde (Sol ataqtardyń túrli salada shyǵarylýyna da tikeleı jaýapty Mádenıet mınıstrligi). Mınıstrliktiń jaýabyna súıene otyryp, «Olarǵa da keýdesine taqpaı, nege elektrondy túrde bermeske?» degen oryndy suraq týyndaıdy. Balalardyń sporttaǵy jetistikteri de jyldar boıy shelektep tókken terdiń jemisi. Sportty súıip, sportzalǵa barǵan bala – óz balalyq shaǵynyń qyzyǵynan sportty joǵary qoıǵan jan. «Jastar bizdiń – bolashaǵymyz!» degende, uranymyz jer jarady. Zamanaýı jabdyqtalǵan sport keshenderi de jeterlik, barlyq qolaıly jaǵdaı jasalǵan. Biraq sportqa jaýapty mınıstrlik tarapynan qaıtarylǵan «sporttyq jetistikteri tek avtomatty túrde beriledi» deıtin jaýaptyń ózi túsiniksiz.
Sport salasyn damytýdyń irgetasy mektepte yntalandyrýdan qalanýǵa tıis. Jáne ol úshin elektrondy platforma arqyly emes, keýdesindegi shynaıy tósbelgilerimen anyqtaý jaǵyn jetildirý kerek. Olımpıadada ne úshin medal taǵady, oılanatyn jaǵdaı! Keýdedegi sporttyq tósbelgiler – jastardy sportqa baýlýdyń, ony jandandyrýdyń mańyzdy bir tetigi. Keı adamǵa jaı ǵana tósbelgi shyǵar, al bala úshin bul – maqtanysh, jetistikterdiń alǵashqy baspaldaǵy. Barlyǵymyz da bala kezde janymyzdaǵy zamandas dostarymyzdyń sporttaǵy jetistikteri úshin taqqan tósbelgisine qyzyqtyq. Qazaqstan balalary men jasóspirimderiniń jáne kásibı sportshylardyń da keýdesine taǵatyn, jetken jetistikterin aıǵaqtaıtyn ulttyq naqyshtaǵy óz tósbelgileri bolýǵa tıis. Jańa Qazaqstannyń jastar sportyna da jańa kózqaras, tyń ózgerister kerek.
Erlan ShAIаHMETULY,
Semeı qalasy gerbiniń avtory
SEMEI
