Tuǵyry bıik Tarbaǵataı

Igilikti is-shara aýdan orta­ly­ǵy Aqsýat aýylyndaǵy Uran­haı qajy meshitiniń jany­nan salynǵan medreseniń ashylý saltanatymen bastaldy. «Munda asyl dinimizge bet bur­­ǵan jastar dinı saýat ashyp, rýhanı tálim-tárbıe alatyn bolady», dedi Qazaqstan musyl­mandary dinı basqarmasy (QMDB) Sharıǵat jáne pátýa bóli­mi­niń meń­ge­rý­shi­si, naıb múftı San­syz­baı Shoqanov. Medreseniń ashylýyna QMDB Abaı óńiri boıynsha bas ımamy Asqar Muqanov, Aqsýat aýdanynyń ákimi Ashat Smaılov, «Habar» agenttiginiń basqarma tóraǵasy Berik Ýálı qatysqanyn aıta ketken oryndy.

Buǵan qosa áýlıe Yrǵyzbaı Dosqanaulynyń rýhyna arnap as berilip, jas balalar arasynda respýblıkalyq Quran jarysy ótkizildi. Bul synda 25 qatysýshy óz múmkindigin pysyqtap, 1-oryndy ıelengen Eldos Jortymov Umra qajylyǵyna joldama aldy. Jeńimpaz qajylyq sapa­ry­­nyń joldamasyn anasyna syıǵa tartatynyn jetkizdi. Sol se­kildi 5-oryn­ǵa deıin taban tire­­genderge de aq­shalaı júlde ta­bys­taldy.

Osydan keıin aýdan orta­ly­ǵynda Qarakereı Qabanbaı batyrdyń 330 jyldyq mereı­toıyna arnalǵan «Otan qorǵaý jolyndaǵy batyr babalar erlik­teri» taqyrybynda respýb­lı­ka­lyq ǵylymı-tájirıbelik konferensııa uıymdastyrylyp, ǵa­lymdar keleli oılaryn ortaǵa saldy.

«Dana halqymyzda «Týǵan jer­ge týyńdy tik» degen ulaǵat­ty sóz bar. Atadan balaǵa mıras bo­lyp, tól ónerdiń damýy­na at­salysqan azamattar men uıym­­­dastyrýshylarǵa ózimniń jáne jerlesterimniń atynan zor rıza­­shylyǵymdy bildire otyra barlyq sportshy men óner­paz­ǵa sáttilik, kórermen qa­ýymǵa umy­­­­tylmas merekelik kóńil kúı ti­­­leı­min», dedi Abaı oblysynyń ákimi Nurlan Uranhaev.

Qazaq kúresinen uıymdas­ty­ryl­ǵan Yrǵyzbaı Dosqanauly atyndaǵy álemdik gran-prı báse­ke­sine 19 memlekettiń balýandary qatysyp, baqtaryn synady. Jarystyń nátıjesine sáıkes 70 kılo salmaq dárejesi bo­­ıynsha 1-oryn Grýzııadan kelgen Nıko Shıkaıdzege buıyrdy. 2-orynnan tájikstandyq Navrýz Ka­rımzat kórinse, úzdik úsh­tik­­ti moń­ǵo­lııalyq Enhbol Eh­taı­van men otandasymyz Raýan Altynbek túıindedi. 90 kılo salmaq dárejesinde Abaı obly­synyń balýany Áset Ahmet­ja­novqa teń keler qar­sy­las tabylmady. Ol fınalda Grý­zııa­­nyń daryndy sportshysy Paata Gvınashıvılıdiń ja­ýy­rynyn jerge tıgizdi. Qola júldeni qyrǵyzstandyq Jamalbek Asylbekuly men Mol­do­vadan kelgen Mıhaıl Marchıton qanjyǵasyna baılady. 90 kılodan joǵary sal­maq­ta Qap taýynyń taǵy bir ókili Georgıı Kavkaradze qar­sy­las shydatpaı altynnan alqa taqty. Kúmis júldeni pol­sha­lyq Kasper Jýrovskıı alsa, 3-orynǵa qyzylordalyq Maqsat Isaqabylov pen ırandyq Farhamıdrıza Sadjadı taban tiredi.

«Osy jarysta uıymdas­ty­rý­daǵy basty maqsatymyz – qara­­paıym qazaq aýylyn tanytý edi. Qazir atalǵan saıys halyq­ara­lyq Birikken kúres álemi qa­ýym­dastyǵynyń kúntizbesine enip, mańyzdy ja­rys­tardyń qataryna enip otyr. Bul óz keze­ginde elimizdiń abyroıyn arttyryp, otandyq buqaralyq sport­tyń damýyna súbeli úlesin qosady degen úmitimiz basym», dedi Yrǵyzbaı Dosqanauly atyndaǵy gran-prı jobasynyń avtory Bádelhan Kamalhanuly.

Sýyrypsalma aqyndardyń básekesi de Barqytbeldiń baýra­ıyn­daǵy merekeniń kórkin qyz­dy­ra tústi. Tartysqa toly sınk­ret­­tik óner dodasynyń qory­­tyndysyna sáıkes bıylǵy Assyl dombyra-nyń ıegeri jampoz aqyn Rınat Zaıtov atanyp, oǵan temir tulpar tabys etildi. Sol sekildi «Altyn dom­byra­nyń» úsh dúrkin ıegeri Muhtar Nııazov Assyltas stıpendııasyn ıelendi.

Bul rette atalǵan is-sharanyń ótkizilýine uıytqy bolǵan kásip­ker Dýlat Tastekeev Aqsýat aýda­­nyndaǵy Ekpin aýylynda tu­ratyn kópbalaly anaǵa páter kiltin tabystaǵanyn aıta ketý kerek.

Atalǵan festıvaldyń sha­ryq­­­taý shyńy – 140 shaqy­rym­ǵa so­zyl­ǵan alaman báıge boldy desek qate­les­peımiz. Mundaı qa­­shyqtyqtaǵy tulparlar jarysy buryn-sońdy bolmaǵan deıdi uıym­dastyrýshylar. Sodan bolsa kerek, atalǵan alaman Gınnes rekordtar kitabyna enýi múmkin. Kókpekti aýdanynan bastaý alǵan jarysta 17 shabandoz bir-birin shań qaptyrýǵa tyrysty. Áıtse de fınaldyq máreniń syzyǵynan 1-shi bolyp 7 saǵat 12 mınýtta katonqaraǵaılyq Erbolat Toq­sa­novtyń Tarpań sáıgúligi attady. 2-shi satydan almatylyq Sekenaı Bóbekbaıdyń Baı­shu­ba­ry kórinse, úshtikke kókjyralyq Aǵzam Sabýrovtyń Mańmańgeri ilindi. Báıgeniń barlyq sanaty bo­ıynsha jeńimpaz atanǵandar avto­kólik minse, júldegerler aq­shalaı syılyqqa ıe boldy.

Merekeniń sońynda qazaq­s­tan­dyq óner ıeleriniń gala kon­­­serti usynylyp, jergilikti ha­­lyq­tyń kóńil kúıin bir ser­pilt­ti.

Igi dástúrge aınalǵan bul is-sharanyń ótýine oblys ákim­di­giniń qoldaýymen Qazaq kú­resi qaýymdastyǵynyń vıse-prezı­denti Bádelhan Kamal­han­uly men Tas Group kompanııalar tobynyń basqarma tóraǵasy Dýlat Tastekeev muryndyq bolyp keledi.

Abaı oblysy,

Aqsýat aýdany