Jalǵyz altyndy qanaǵat tuttyq

Dzıýdodan Qazaqstan quramasynyń bas bapkeri Nurbol Súleımenov ótken jarystardyń qorytyndysy boıynsha Azııa chempıonatyna qatysatyn balýandardy iriktep aldy. Olardyń qatarynda álem chempıonatynyń júl­de­gerleri Ǵusman Qyrǵyzbaev (66 kg) pen Erlan Serikjanov (66 kg), Azııa chempıonatynyń úsh dúrkin júldegeri Islam Bozbaev (-100 kg), Horvatııadaǵy Grand Slam jarysynyń jeńimpazy Maǵjan Shamshadın (60 kg) jáne Grand Slam básekeleriniń júldegeri Baýyrjan Narbaev (60 kg) bar edi. О́kinishke qaraı, reıtıngtik upaı beri­le­tin bási bıik jarysta joǵaryda aty atalǵan dańqty balýandarymyzdyń birde biri ánuranymyzdy shyrqata almady.

Jerlesterimizdiń arasynan eń tá­ýir nátıjege 73 kıloda baq synaǵan Danııar Shamshaev qol jetkizdi. Ulttyq qurama sapyna jýyrda ǵana qosyl­ǵan balýanymyz eresekter ara­syn­daǵy alǵashqy Azııa chempıonatyna qatysyp jatqanyna qaramastan barlyq qarsylasyn merziminen buryn aıqyn basymdyqpen tize búktirip, Azııa chempıony atandy. Atap aıtar bolsaq, ol bastapqy básekelerinde úndistandyq Sýresh Sıngh pen Grand Slam, Gran-prı jarystarynyń júldegeri tájikstandyq Behrýz Hod­ja­zo­dany nebári 42 sekýndta jeńse, jartylaı fınalda bıyl ǵana jas­t­ar arasyndaǵy Azııa chempıonatyn­da top jarǵan qyrǵyz balýany Chyngyzhan Sagynalıevti 31 sekýndta tize búktirdi. Fınalda onyń joly О́zbekstannyń bedeldi balýany, jyl basynda Por­tý­ga­lııada uıym­dastyrylǵan Gran-prı jarysy­nyń jeńimpazy Mýrodjon Iýldashevpen qıysty. Danııar bul báse­kede de artyq kúsh jumsamaı, bar-joǵy 34 sekýndta-aq qarsylasynyń jaýy­rynyn jer ıisketti.

Bul – Azııa chempıonattary tarı­hyndaǵy Qazaqstannyń 73 kılo sal­maq­taǵy alǵashqy altyny. Buǵan deıin Dıdar Hamza men Jansaı Smaǵulov júldegerler qatarynan kóringenimen, birde-bir balýanymyz bul salmaqta top jara almaı kele jatqan edi.

Al 100 kıloǵa deıingi salmaqta beldesken Islam Bozbaev bas júldege synyq súıem qalǵanda súrinip, kúmis júldeni qanaǵat tutýǵa májbúr boldy. Jerlesimiz fınalda bıyldan bas­tap Birikken Arab Ámirlikteriniń atynan synǵa túse bastaǵan ıngýshııalyq Djafar Kostoevtan utylyp qaldy. Kezinde Reseıdiń jastar arasyndaǵy chempıonatynda top jaryp, Eýropa birinshiliginde de úzdik shyqqan ol endi, mine, Azııa birinshiliginde altynnan alqa taqty. Buǵan deıin 90 kıloda óner kórsetken Islam Bozbaevtyń bul 100 kılodaǵy alǵashqy iri jarysy. Ol jarystan keıin fınaldaǵy jeńilisin jańa salmaqqa áli boı úıretpegeni men kúshin durys jumsaı almaǵandyǵymen baılanystyrdy.

Bapkerler men jankúıerler erekshe senim artqan Maǵjan Shamshadın (60 kg), Ǵusman Qyrǵyzbaev (66 kg), Dıdar Hamza (90 kg) jáne Nurlyhan Sharhan (-100 kg) qola júldeni qanaǵat tutýǵa májbúr boldy. О́kinishke qaraı, Baýyrjan Narbaev (60 kg), Erlan Serikjanov (73 kg) pen Ádil Orazbaev (+100 kg) irikteý kezeńderinen árige asa almady.

Qyzdar arasyndaǵy balýandar básekesinde nebári eki otandasymyz ǵana júldegerler qatarynan kórindi. Byltyr Qyrǵyzstanda uıym­das­ty­ry­lǵan Azııa chempıonatynda kúmis alǵan 48 kılodaǵy otandasymyz Ábıba Abýjaqynova bıyl da sol mejeden kórindi. Jartylaı fınalda ol birer aı buryn Mońǵolııada ótken Grand Slam básekesinde jeńgen mońǵol balýany Naranseseg Ganbaatardan taǵy da basym túsip, fınalǵa joldama alǵan bolatyn. Alaıda altyn júlde úshin ótken básekede Ábıba japonııalyq Ýakana Kogadan aılasyn asyra almady. Al 78 kıloǵa deıingi salmaqta synǵa túsken Arýna Jangeldına ju­banysh beldesýinde taıbeılik Lıý Shındi jeńip, Azııa birinshiliginiń qola júldegeri atandy.

Osylaısha, tórt kúnge jalǵasqan Sary qurlyq birinshiliginde segiz medal oljalaǵan jerlesterimiz jalpy­ko­­mandalyq esepte tórtinshi orynǵa taban tiredi. Bas júldeni Japonııa balýan­dary jeńip aldy. Olardyń enshi­sin­de 9 altyn, 3 kúmis júlde bar. Ekinshi jáne úshinshi orynǵa Mońǵolııa (2 altyn, 5 qola) jáne О́zbekstan (1 altyn, 2 kúmis, 6 qola) quramalary jaıǵasty.