Sport • 08 Tamyz, 2022

Baıraqty báseke jalaýyn kóteredi

25 ret kórsetildi

Búgin Túrkııanyń Konıa qala­synda V Islam yntymaq­tas­tyǵy oıyndarynyń jalaýy jelbireıdi. Bul jarysta álemniń 54 memleketinen kelgen tórt myńnan asa sportshy baq synap, sporttyń 23 túrinen barlyǵy 380 júlde jıyntyǵyn sarapqa salady. Baýyrlastar básekesinde Qazaqstan quramasy sapynan 125 sportshy óner kórsetedi. Olar sporttyń 16 túri boıynsha júldelerge talasady.

Dúısenbi kúni Almatydaǵy «Almaty Arena» sport kesheninde Qazaqstan delegasııasyn saltanatty shyǵaryp salý rásimi ótti. Is-sharaǵa Sport jáne dene shynyqtyrý isteri komıtetiniń tóraǵasy Samat Erǵalıev, bokstan Olımpıada chempıony Ermahan Ibraımov qatysyp, el quramasyna sáttilik tiledi.

«Bul sapardyń aldynda jattyǵýlar, jarystar, úlken daıyndyq boldy. Sizder qazirdiń ózinde jeńiske degen erik-jigerdi kórsetip júrsizder. Endi Túrkııadaǵy baýyrlastar básekesinde joǵary nátıje kórsetip, jankúıerler senimin aqtaısyzdar degen senimdemiz», dedi S.Erǵalıev.

Oıyndardyń ashylý saltanatynda Qazaqstannyń Týyn semserlesýden 23 jasqa deıingi Azııa chempıony Erlik Sertaı ustap shyǵady.

Islamıada degen beıresmı ataýǵa ıe bolǵan Islam yntymaqtastyq oıyndarynyń tarıhyna toqtalar bolsaq, bul báseke Islam konferensııasy uıymynyń uıytqy bolýymen qolǵa alǵan biregeı joba ekenin aıta ketý lázim. Baýyrlas musylman el­de­rin biriktirýge arnalǵan eń alǵashqy sporttyq oıyn 2005 jyldyń 8-20 sáýir aralyǵynda Saýd Arabııasynyń Mekke qalasynda uıymdastyryldy. Sol jyly Qazaqstan sportshylary tamasha nátıjege qol jetkizip, 27 júldemen (13 altyn, 8 kú­mis jáne 6 qola) jalpykomandalyq esepte úshinshi orynǵa ıe boldy. Al 24 altyn, 17 kú­mis jáne 19 qolany oljalaǵan jarys qojaıyndary komandalyq synda top jardy. Ekinshi orynǵa Mysyr quramasynyń sportshylary ıe boldy. Olar jalpy sany 42 (14+15+13) medal jeńip aldy.

Ekinshi Islam yntymaqtastyq oıyndary dástúr boıynsha 2009 jyly Irannyń astanasy – Tegeranda ótýge tıis-tin. Alaıda uıymdastyrýshy el májbúrli túrde oıyndardy 2010 jylǵa shegerdi. Biraq keıinnen Iran men Arab elderi arasyndaǵy azdaǵan daý týyndap, saldarynan atalǵan doda múlde ótpeı qaldy. Sóıtip, arada segiz jyl ótkende, ıaǵnı 2013 jyly Islamıadany Indonezııa qabyldady.

Sýmatra aralynyń Palembang qalasynda ótken jarysta 47 elden kelgen 1 800 sportshy túrli-tústi júldelerdi sarapqa saldy. Irandaǵy saıys uıymdastyrylmaı qalǵan soń jarystyń bolashaǵyna senimsizdikpen qaraǵan birqatar eldiń sportshysy Indo­nezııadaǵy básekege barýdan bas tartty. Olardyń qatarynda Qazaqstan ulttyq quramasynyń ókilderi de boldy. Sóıtip, tórtinshi Islamıadanyń jalpykomandalyq esebinde Indonezııa sportshylary dara shyqty. Jarys qojaıyndary óz elinde ótken básekede 29 altyn, 26 kúmis, 23 qola medal enshiledi. Mysyr sportshylary 24 altyn, 23 kúmis, 26 qolamen bul joly da ekinshi orynǵa taban tirese, Túrkııa (20+24+38) quramasy úzdik úshtikti túıindedi.

2017 jylǵy Islamıadanyń shymyl­dy­ǵy baýyrlas Ázerbaıjannyń astana­sy – Baký qalasynda túrildi. Tórtinshi ret uıymdastyrylǵan dúbirli dodada Qazaqstan sportshylary da óner kórsetýge bel býyp, 32 sańlaǵymyz Bakýge attandy. Jerlesterimiz sporttyń bes túrinen, atap aıtqanda, boks, dzıýdo, taekvondo WTF, erkin jáne qyz­dar kúresi boıynsha synǵa tústi. О́kinishke qaraı, Kaspıı teńiziniń jaǵalaýynda ótken jarysta otandastarymyz óte nashar nátıje kórsetti. 10 kúnge jalǵasqan jarystyń qorytyndysy boıynsha Qazaqstan sportshylary bar-joǵy eki altyn, bes kúmis jáne 12 qola medalmen jalpykomandalyq esepte 14-orynnan kórindi. Boksshylarymyz – Azat Mahmetov (52 kg) pen Tursynbaı Qulahmet (75 kg) Bakýde Ánuranymyzdy shyrqatpaǵanda, altynsyz qalaıyn dep tur ekenbiz. Jalpykomandalyq esepte Ázerbaıjan sportshylary top jardy. Olar jalpy sany 152 medal (74 altyn, 46 kúmis, 32 qola) jeńip aldy. Túrkııa (185 medal – 68, 63, 54) jáne Iran (89 medal – 30, 26, 33) sportshylary úzdik úshtikti túıindedi.

9-18 tamyz aralyǵynda Túrkııanyń Konıa qalasynda jalaýy jelbireıtin ja­rys negizi 2021 jyldyń tamyz aıyn­da ótýge tıis edi. Alaıda jarysty uıymdastyrýshylar Tokıo Olımpıadasyna baılanysty básekeni bir aıǵa keıin shegerdi. Al keıin Túrkııa bıligi koronavırýstyń órshýine baılanysty Islamıadany bir jylǵa keıinge qaldyrdy.

Baıraqty básekeniń shymyldyǵy res­mı túrde búgin túrilgenimen, velo­sport­shylardyń jarysy 5 tamyz kúni bas­talyp ketti. Alǵashqy úsh kúnniń qory­tyndysy boıynsha veloshabandozdar el quramasynyń qorjynyna 3 altyn, 1 kúmis, 3 qola júlde salyp úlgerdi.

Atap aıtar bolsaq, velosporttyń trek túrinde Rınata Sultanova 10 shaqyrym qashyqtyqqa jarysta top jarsa, úsh shaqy­rymdyq jekeleı synda da aldyna jan salmady. Sonymen qatar Álisher Jumaqan erler arasyndaǵy jekeleı synda (4 shaqyrym) jarys jeńimpazy atandy. Dál osy synda Álisherden keıin jarys jolyn taǵy bir otandasymyz Dmıtrıı Noskov kesip, kúmis júldege ıe boldy. Al trektegi velosportta (15 km) jarysta Á.Jumaqan qolaǵa qol jetkizdi. Sondaı-aq Iаnına Pashenko men Marına Kýzmına da óz sanattary boıynsha ótken jarysta máre syzyǵyn úshinshi bolyp kesip, qola júlde jeńip aldy.

r

Sońǵy jańalyqtar

«Taza Kókjaılaý» aksııasy ótti

Ekologııa • Búgin, 19:11

Nobel ádebıet syılyǵyn Ennı Erno aldy

Ádebıet • Búgin, 17:38

Janar Aıtjan jańa qyzmetke taǵaıyndaldy

Taǵaıyndaý • Búgin, 16:38

Almatyda jer silkinisi tirkeldi

Oqıǵa • Búgin, 15:53

Rýbldi satyp alý 31%-ǵa ósti

Ekonomıka • Búgin, 15:23

Uqsas jańalyqtar