Bıyl ekinshi jyl qatarynan ótkizilip jatqan jarysta qazaqstandyq kanoeshi Ánýar Akchýrın da óner kórsetip, tolaıym tabysqa qol jetkizdi. Ol byltyrǵy AQSh ashyq birinshiligine de qatysyp, bir altyn jáne tórt kúmis medal oljalap, úzdikter qatarynan kóringen bolatyn. Bıylǵy jarys ta otandasymyz úshin tabysty aıaqtaldy. Jerlesimiz bul joly eki qashyqtyq boıynsha jarystyń bas júldesin jeńip aldy. Sondaı-aq bir márte márege ekinshi jetip, kúmispen kúpteldi.
Atap aıtar bolsaq, 200 metr qashyqtyqqa jarysýda Ánýar Akchýrın AQSh sportshysy Gevın Rosspen birge jup qurap, jarys jeńimpazy atandy.
Al 500 metrge tórttik kanoe esýde taǵy da AQSh sportshylarymen birge aldyna jan salmasa, 200 metr qashyqtyqqa jekeleı jarysta ekinshi boldy.
22 jastaǵy otandasymyz – elordadaǵy №4 balalar men jasóspirimderdiń mamandandyrylǵan olımpıadalyq rezerv sport mektebiniń (baıdarka men kanoe esý seksııasy) túlegi. Sporttyń bul túrimen 2011 jyldan beri aınalysyp kele jatqan otandasymyz 2017-2019 jyldary 1 000, 500 jáne 200 metr qashyqtyqtarda Qazaqstan chempıonatynyń birneshe dúrkin júldegeri atanyp, 2016 jyly О́zbekstanda ótken jastar arasyndaǵy Azııa kýbogynda top jarǵan. Sondaı-aq ol birqatar halyqaralyq týrnırde el qorjynyna júlde salǵan. Atap aıtqanda, Ánýar 2018 jyly Slovakııanyń Pıshtan qalasynda uıymdastyrylǵan halyqaralyq týrnırde 200 metrge esýde birinshi oryn alsa, dál sol jyly Bolgarııada ótken jastar arasyndaǵy álem chempıonatynyń kúmis júldesin oljalady. Sonymen qatar ol 500, 200 metr qashyqtyqta Azııanyń eki dúrkin jeńimpazy atanǵan.
Baıdarka men kanoe esý boıynsha halyqaralyq dárejedegi sport sheberi degen ataǵy bar Ánýar Akchýrın bul kúnderi AQSh-tyń Florida Institute of Technology ýnıversıtetinde bilim alady.
