Qoǵam • 14 Tamyz, 2022

О́ńirlerge «ıdeologter» qajet emes pe?

1011 ret kórsetildi

Memleket basshysy Qasym-Jomart Toqaev bıylǵy 16 naýryzda jarııalaǵan «Jańa Qazaqstan: jańarý men jańǵyrý joly» Joldaýynda oblystar men res­pýblıkalyq mańyzy bar qalalar ákimderi orynbasarlarynyń sany úsheýden aspaýy kerektigin, erekshe jaǵdaıda ǵana tórtin­shisine ruqsat beriletinin atap aıtty. Ara­da ótken bes aıǵa jýyq ýaqyt ishinde Pre­zıdent tapsyrmasynyń oryndalý bary­syn bilý úshin óńirler ákimdikteriniń resmı saıttaryna úńildik.

Bul rette Qazaqstan azamattarynyń ulttyq biregeıligin qalyptastyrý, etnosaralyq jáne dinaralyq kelisimdi saqtaý, onomastıka problemalaryn sheshý jumystary erekshe mańyzǵa ıe bolyp otyrǵan soltústik jáne shyǵys óńirlerde ákimderdiń áleýmettik máseleler jónindegi orynbasarlary hám «ıdeologter» qysqartýǵa ilikpegen bolar degen oı kelgen. Alaıda Pavlodar oblysynda ǵana solaı bolyp shyqty. Osy óńirdiń ishki saıasat basqarmasyn basqarǵan, aýdan ákimi, Parlament Májilisiniń depýtaty bolǵan tájirıbeli basshy Aızada Qurmanova oblys ákiminiń orynbasary retinde áleýmettik-saıası salalarǵa tolyqtaı jetekshilik jasaýyn jalǵastyryp júr eken.

Al eldiń shetindegi, jeldiń ótindegi Sol­tústik Qazaqstan oblysynda óńir basshy­sy­nyń ishki saıasat pen áleýmettik salanyń kókeıkesti máselelerin sheshýmen jap-jaqsy aınalysyp, jergilikti jurtqa jaqqan eki orynbasarynyń ekeýi de qysqartylyp, olardyń fýnksııalary óz kreslolaryn saqtap qalǵan áriptesterine bólinip berilipti. Birinshi orynbasar, negizgi mamandyǵy agronom Marat Tasmaǵambetov burynnan jetekshilik jasap kele jatqan aýyl sharýashylyǵyna qosa, ishki saıasat jáne bilim berý salalaryna da jaýap beretin bolypty. Qurylys, kólik, turǵyn úı-kommýnaldyq sharýashylyq salalarymen aınalysyp kelgen orynbasar, ınjener Sátjan Ablalıev endi jumyspen qamtý, áleýmettik qorǵaý, kóshi-qon máselelerine de jetekshilik jasap júr. Indýstrııalyq-ınnovasııalyq damýmen jáne kásipkerlikti damytýmen shuǵyldanatyn orynbasar, ekonomıst Dáýren Jandarbekovtiń fýnksııalaryna densaýlyq saqtaý, mádenıet, til saıasaty jáne arhıv salalaryna jetekshilik jasaý qosylypty.

Qostanaı oblysynda da ákimniń áleý­mettik máseleler jónindegi orynbasary qys­qartylypty. Osyǵan baılanysty ishki saıasat, jumyspen qamtý, áleýmettik qorǵaý, kóshi-qon, mádenıet máseleleri buryn qurylys, turǵyn úı-kommýnaldyq sharýashylyq, kólik salalaryna jetekshilik jasaǵan birinshi orynbasar, negizgi mamandyǵy agronom Ǵaýez Nurmuhambetovke qosa júktelipti. Son­daı-aq densaýlyq saqtaý, bilim berý, dene shynyqtyrý jáne sport salalaryna je­tekshilik etý ekonomıka jáne qarjy máse­le­lerimen aınalysyp júrgen orynbasar, ekonomıst Erlan Spanovqa mindettelipti.

Aqmola oblysynda da ákimniń áleýmettik máseleler jónindegi orynbasary qysqartýǵa ushyrapty. Alaıda onyń fýnksııalary kimge tapsyrylǵanyn oblystyq ákimdiktiń resmı saıtynan bile almadyq. Bul máseleni oblys ákimi áli sheshken joq pa, álde, onyń baspasóz qyzmeti tıisti aqparatty jarııalaýdy esten shyǵardy ma – ol jaǵy bizge beımálim.

Shyǵys Qazaqstan oblysy ákimdiginiń resmı saıtyna qaraǵanda, óńir basshysynyń bes orynbasarynyń beseýi de ázirge din aman júr. Qaısylary qysqartylatynyn aldaǵy ýaqyt kórsetedi.

Osy oraıda bir eskererlik jaıt: egemen respýblıkamyzdyń atalǵan bes oblysyna «Biz Reseıdi qalaı kórkeıtemiz?» degen arandatýshylyq maqalasynda kóz alartqan atyshýly Aleksandr Soljenısynnyń saıası sandyraǵyn telearnalar men áleýmettik jelide birinen soń biri daýryǵa qaıtalap júrgen reseılik saıasatkersymaqtardyń kózdegeni – elimizdiń soltústik jáne shyǵys óńirlerinde separatıstik kóńil kúıdi ór­shitý ekeni anyq. Osyndaı nasıhatqa erip, Soltústik Qazaqstan oblysyn Reseı Fede­ra­sııasyna qosýǵa ashyq túrde shaqyrǵan Petropavl qalasynyń erli-zaıypty eki tur­ǵyny separatıstik is-qımyldary úshin jaqynda ǵana sot úkimimen bes jylǵa bas bostandyǵynan aıyryldy. Demek qazirgi almaǵaıyp zamanda Qazaqstanǵa jasalyp jatqan ártúrli aqparattyq shabýylǵa toıtarys berý úshin elimizde, ásirese onyń soltústik jáne shyǵys óńirlerinde qo­ǵam­dyq-saıası jumystardy shırata túsý qajettigi daýsyz. Mine, osy turǵydan qara­ǵanda, ózderiniń «ıdeolog» orynbasarlaryn qysqartyp jatqan oblys ákimderimen kelisý qıyn.

Sońǵy jańalyqtar

«Taza Kókjaılaý» aksııasy ótti

Ekologııa • Búgin, 19:11

Nobel ádebıet syılyǵyn Ennı Erno aldy

Ádebıet • Búgin, 17:38

Janar Aıtjan jańa qyzmetke taǵaıyndaldy

Taǵaıyndaý • Búgin, 16:38

Almatyda jer silkinisi tirkeldi

Oqıǵa • Búgin, 15:53

Rýbldi satyp alý 31%-ǵa ósti

Ekonomıka • Búgin, 15:23

Uqsas jańalyqtar