Taıaýda oblystyq ákimdiktegi jańa ınvestısııalyq kásiporyndar týraly ótken keńeste osy Saran qalasynda teledıdar, elektr sý jylytqysh, shańsorǵysh, as úı peshi, shaǵyn pesh, as úı sorǵyshy, kir jýǵysh mashına jáne basqa da turmystyq tehnıkalar shyǵaratyn Artel zaýytynyń paıda bolatyny málim boldy. Qurylysy kúzde bastalatyn bul kásiporynyń óndiristik qýaty jylyna 1,1 mln dana ónim shyǵarýǵa jetedi dep josparlanǵan.
Jalpy, atalǵan keńeste málim bolǵandaı, oblysta barlyǵy 212,7 mlrd teńge somasyna 11 ınvestısııalyq joba, onyń ishinde sheteldik kapıtaldyń qatysýymen bes birdeı joba júzege asyrylyp jatyr. Jaýapty mamandar olardy iske qosýdyń nátıjesinde 2 myńǵa jýyq turaqty jumys ornyn ashýǵa múmkindik týatynyn aıtady.
Oblystyq ónerkásip jáne ındýstrııalyq-ınnovasııalyq damý basqarmasynyń basshysy Murat Qydyrǵanbekov búginniń ózinde ımportty almastyrýshy bir jobanyń iske qosylǵanyn málimdedi.
– Bul – «Saryarqa» EEA aýmaǵynda geomembrana shyǵarýmen aınalysatyn «AltynArna Geosynthetics» JShS jobasy. Kásiporynda qazir 30 adam eńbek etedi, – dep atap ótti basqarma basshysy.
Sonymen qatar M.Qydyrǵanbekov jyl sońyna deıin Balqashta saǵatyna 50 MVt-qa deıin qýat óndiretin kún elektr stansasy iske qosylatynyn jáne onda 20 adamnyń jumyspen qamtylatynyn jetkizdi.
Saran qalasynda úmit artqan úlken joba – «Tatneft» kompanııasynyń qatysýymen salynyp jatqan KamaTyresKZ shına zaýyty jyl sońyna aıaǵyna deıin iske qosylmaq. Kásiporyn jumys isteı bastaǵanda 1 116 adam jumyspen qamtylady degen boljam bar.
Sondaı-aq aldaǵy ýaqytta osy shaǵyn qalada qaǵaz negizindegi sanıtarlyq-gıgıenalyq ónim óndirisi jumys isteı bastaıdy. Áýelde shıkizat shetelden satyp alynǵanymen, keleshekte kásiporyn qaǵaz negizdi óz betinshe daıyndaıtyn bolady. Aldyn ala esepteýlerge qaraǵanda, munyń ózi zaýyttyń qýatyn jylyna 21,4 myń tonnaǵa deıin arttyrýǵa múmkindik beredi. Aıta ketý kerek, 100 adamǵa jumys taýyp beretin atalǵan kásiporyn – monoqalalardy damytý, «Bıznestiń jol kartasy» memlekettik baǵdarlamalarynyń qatysýshysy.
Budan bólek, oblysta katodty mys óndiretin jańa zaýyt paıda bolady. Jylyna bes myń tonnaǵa deıin katodty mys shyǵarýǵa qýaty jetetin bul kásiporynda 140 adam jumys istemek.
Keńeske qatysqan oblys ákimi Jeńis Qasymbek bıylǵy birinshi jartyjyldyqta tartylǵan ınvestısııa kóleminiń 264 mlrd teńgeden asqanyn atap ótti.
– Jyl sońyna deıin ótken jylǵa qaraǵanda 5,5 % ósimmen 732,5 mlrd teńge ınvestısııa tartý josparlanǵan. Bul jobalardy iske qosý óndiris kólemin ulǵaıtýǵa, shıkizattyq emes eksporttyń ósýin qamtamasyz etýge jáne ımport kólemin tómendetýge múmkindik beredi, – dedi jıyndy qorytyndylaǵan J.Qasymbek.
Qaraǵandy oblysy
