Álıhan Smaıylov dızel otynyna qatysty máseleni sheshýdi tapsyrdy

Úkimet basshysy keıbir óńirlerde dızeldik otyn boıynsha problema týyndap otyrǵanyn atap ótti.

«Bul azamattarymyzdyń narazylyǵyn týdyrýda. Egis naýqany bastalar aldynda mundaı problema qalaı oryn alyp otyr?»,  dedi Álıhan Smaıylov Energetıka mınıstrine. 

О́z kezeginde Bolat Aqsholaqov dızel otynyna joǵary suranysty jabý úshin barlyq resýrstardyń birinshi kezekte aýyl sharýashylyǵy taýaryn óndirýshiler men JQS-ǵa bólinetinin habarlady. О́nerkásip kásiporyndary men QTJ úshin otyn qaldyqtary ekinshi kezekte bólinetin bolady, al jetispegen jaǵdaıda qajetti kólem ımporttalmaq.

Budan bólek, mınıstrlik shekara perımetri boıynsha tranzıttik kólik úshin dızel otynyna saralanǵan baǵa belgileýdi kózdeıtin buıryq jobasyn ázirledi. Baǵalar turǵylyqty jerine, tutyný kólemine jáne kólik túrine qaraı saralanady.

Máselen, qazaqstandyqtar úshin júrgizýshi kýáligi bolǵan jaǵdaıda, qazirgi baǵa – 230-260 teńge boıynsha lımıt táýligine 100 lıtr dızel otynyn quraıdy, Qazaqstanda tirkelgen júk kóligi úshin – táýligine 300 lıtr. Qalǵan adamdar tobyna, sondaı-aq kórsetilgen kólemnen artyq dızel otyny úshin 1 lıtr 450 teńgeden satylatyn bolady.

Baıandamany tyńdap bolǵannan keıin Úkimet basshysy Energetıka mınıstrligine otandyq naryqta janar-jaǵarmaı tapshylyǵyn boldyrmaý úshin barlyq sharalardy ýaqytyly qabyldaýdy tapsyrdy.

«Janarmaı quıý stansııalarynyń ıelerimen tıisti jumystar júrgizý kerek. Azamattarymyz ben aýyl sharýashylyǵy salasy zardap shekpeýi kerek. Bolat Oraluly, jaǵdaıdy kúndelikti jeke baqylaýyńyzda ustańyz», dep tapsyrma berdi Premer-Mınıstr.