«Bul – elimizdiń sport salasyndaǵy aıtýly oqıǵa. Qazaqstanda shahmatqa degen qyzyǵýshylyq jyldan-jylǵa artyp keledi. Osy sport túriniń órkendeýine memleket tarapynan barlyq jaǵdaı jasalýda. Halyqaralyq týrnırlerde el namysyn laıyqty qorǵap júrgen shahmatshylarymyz az emes. Sportshylarymyzdyń jýyrda Úndistanda ótken shahmat olımpıadasyndaǵy jetistikteri – sonyń aıqyn dáleli. Kóptegen halyqaralyq sport sheberleri qatysatyn «Atyrau Chess Festival-2022» dodasy shahmat ónerin odan ári damytýǵa úles qosady dep senemin!» delingen Memleket basshysynyń quttyqtaýynda.
Halyqaralyq festıvaldi uıymdastyrǵan Azııa jáne álem chempıony, halyqaralyq grossmeıster Dınara Sádýaqasovanyń aıtýynsha, oǵan 300-ge jýyq shahmat áýesqoıy qatysyp jatyr. Onyń ishinde Qazaqstanmen qosa, AQSh, Nıderland, Lıtva, Ýkraına, Tájikstan, О́zbekstan, Belarýs jáne Reseı Federasııasy sekildi elderdiń oıynshylary bar.
– Halyqaralyq alǵashqy festıvaldi Qazaqstanda shahmatty sport túri retinde tanymal etý jáne damytý, salamatty ómir saltyn nasıhattaý, sondaı-aq jas sportshylardyń sheberligin arttyrý, jas talanttardy izdeý maqsatymen ótkizip otyrmyz. Festıvaldiń júlde qory 13 mıllıon teńgeden asady. Sonymen qatar Qazaqstan-Brıtanııa tehnıkalyq ýnıversıteti (QBTÝ) bakalavrıat pen magıstratýrada oqýǵa grant bóledi. Grant ıegerleriniń esimi týrnırdiń jabylý saltanatynda jarııalanady, – dedi D.Sádýaqasova.
Atyraý oblysynyń ákimi Serik Shápkenovtiń pikirinshe, alǵash ret ótkizilip jatqan mundaı saıys óskeleń urpaqty otansúıgishtikke, salamatty ómir salty qundylyqtaryna tárbıeleý úderisine oń áserin tıgizedi. Bul óńirde 1984 jyly sport mektepterinde shahmat úıirmesi ashylǵan. Qazir oblysta shahmat sportymen 18 355 adam shuǵyldanady. Onyń ishinde aýyldardaǵy úıirmelerge 11 330 adam baryp júr.
Festıvalge kásibı sportshylar men halyqaralyq grossmeısterlerden bólek, D.Sádýaqasovanyń shahmat akademııasynan 58 tárbıelenýshi qatysyp jatyr. Máselen, 6 jasqa deıingi kategorııada oblys chempıony bolǵan Álı Saparov eki jyldan astam ýaqyt atalǵan akademııada bilim alǵan. Ol endi alǵash ret halyqaralyq saıysta baq synaýǵa bekingen. Taǵy bir qatysýshy – Nurpeıis Úmbetqalıdyń jasy 13-te. Shahmat akademııasynda tájirıbeli jattyqtyrýshylardan dáris alǵan ol respýblıkalyq jarysta jeńiske jetken. Endi ol da birinshi ret halyqaralyq shahmat jarysynda baq synaýdy maqsat etken.
Atyraýda halyqaralyq shahmat festıvali alǵash ret ótkizilip otyrǵanyna qaramastan, jarysqa qatysýshylar uıymdastyrý deńgeıine rızashylyǵyn bildirdi. «Shynymdy aıtsam, tańdanysymdy jasyra alar emespin. Festıval joǵary deńgeıde uıymdastyrylǵan. Qazir Qazaqstanda kóptegen shahmat týrnıri ótkizilip júr. Bul festıval uıymdastyrý turǵysynan – úzdikterdiń biri», dedi Nur-Sultan qalasynan qatysyp jatqan halyqaralyq sheber Pavel Gnýsarev. Al AQSh-tyń Kolorado shtatynan kelgen grossmeıster Tımýr Gareevtiń pikirine súıensek, «Atyrau Chess Festival-2022» – keremet festıval. Mundaı saıysqa qatysýdyń ózi kóńilge qýanysh syılaıdy.
Álemdik dodalarda top jaryp, qazaqtyń dańqyn asyrǵan grossmeıster Dınara Sádýaqasovanyń aıtýynsha, árqaısysynyń nátıjesi áıgili shveısarııalyq júıemen baǵalanatyn úsh negizgi týrnırdi ótkizý kózdelgen. Sheberlik sabaqtary men bir mezgilde ótetin oıyn seanstary uıymdastyrylady. Budan bólek, festıval aıasynda tóreshiler emtıhan tapsyryp, FIDE tóreshisi ataǵyn alatyn halyqaralyq arbıtrlerdiń alǵashqy semınary ótedi.
Atyraý oblysy
