Vıse-premer Eraly Toǵjanov atap ótkendeı, 2019 jyldyń sáýir aıyndaǵy sapar qorytyndysy boıynsha Memleket basshysy Qosshy qalasyn odan ári damytý, onyń ishinde úsh aýysymdy mektepter máselesin sheshý jóninde naqty tapsyrmalar berdi.
Qazirgi ýaqytta qala halqynyń sany shamamen 65 myń adamdy quraıdy – bul oblystyq mańyzy bar qarqyndy damyp kele jatqan qalalardyń biri. Bul rette halyqtyń jyl saıynǵy ósýi áleýmettik ınfraqurylymǵa aıtarlyqtaı júkteme túsiredi. Osyǵan baılanysty Úkimet pen óńirlik bılik qalalyqtardyń ómir súrý sapasyn jaqsartý boıynsha júıeli sharalar qabyldap jatyr.
Qalada jobalyq qýaty 3,7 myń oryndyq úsh mektep jumys isteıdi, biraq olarda 6,8 myń oqýshy oqıdy. Oqýshy oryndarynyń tapshylyǵy 3,1 myń oryndy quraıdy. Úsh aýysymdy oqytýdy joıý úshin 3 mekteptiń qurylysy júrgizilýde.
1 qyrkúıekte jańa mektep óz esigin ashady, bul oqýshy oryndarynyń tapshylyǵyn 77%-ǵa tómendetýge múmkindik beredi.
E. Toǵjanov 1200 oryndyq taǵy bir mekteptiń qurylysyn jedeldetýdi tapsyrdy, ony jyl sońyna deıin iske qosý josparlanǵan. Bul mektep «Lesnaıa polıana» turǵyn alabynda ornalasqan negizgi mektepke júktemeni azaıtady, onda 4,6 myń bala oqıdy (jobalyq qýaty 2,4 myń oryn). Aqmola oblysynyń ákimi Ermek Marjyqpaev Premer-Mınıstrdiń orynbasaryna kelesi jyly taǵy 2 mektep iske qosylatynyn, onyń bireýi jeke ınvestısııalar esebinen salynatynyn habarlady.
Qosshy qalasynyń mektepterinde úsh aýysymdy oqytý máselesi 2023 jyldyń 1 qyrkúıegine deıin tolyq sheshiledi.
«Memleket basshysy oqý oryndarynda jaıly jaǵdaı jasaýdy tapsyrdy. Ony iske asyrý úshin Úkimet úsh aýysymda oqytatyn mektepterde eki aýysymdyq oqytý formatyna kóshý máselelerin sheshýde. Jyl sońyna deıin Qosshy qalasynda másele óz sheshimin tabady», dep atap ótti E.Toǵjanov.
Sondaı-aq Premer-Mınıstrdiń orynbasary jańa qala tarıhyndaǵy bir aýysymda 100 adam qabyldaıtyn birinshi zamanaýı qalalyq emhanada boldy. Ol 2022 jyldyń úshinshi toqsanynda paıdalanýǵa beriledi jáne onyń ashylýyn qala turǵyndary asyǵa kútýde. Emhana zamanaýı medısınalyq jáne zerthanalyq jabdyqtarmen jabdyqtalǵan jáne dárigerlermen, medbıkelermen qamtamasyz etilgen.
Sonymen qatar vıse-premer polısııa bóliminiń jańa ǵımaratyndaǵy qaýipsizdik jáne quqyq tártibin qorǵaýdy monıtorıngileý júıesimen tanysty. Jańa polısııa korpýsy barlyq qajetti jabdyqtarmen, sonyń ishinde baqylaý jáne tártiptiń saqtalýyn baqylaý monıtorlarymen jabdyqtalǵan.
Sapar qorytyndysy boıynsha E.Toǵjanov Aqmola oblysynyń ákimdigine Oqý-aǵartý jáne Densaýlyq saqtaý mınıstrlikterimen birlesip, mektep pen emhanany pedagogıkalyq jáne medısınalyq personaldarmen tolyqtyrýdy aıaqtaýdy, sondaı-aq bilim berý jáne densaýlyq saqtaý obektilerin qajetti jabdyqtarmen jáne múlipen tolyq jaraqtandyrýdy qamtamasyz etýdi tapsyrdy.
Jumys saparynyń jalǵasynda Premer-Mınıstrdiń orynbasary elordanyń bilim berý uıymdaryna da bardy.
E.Toǵjanov №65 mektepke japsarjaı qurylysynyń barysymen tanysty. Bul mekteptiń jobalyq qýaty bir aýysymda 1200 oryndy quraıdy, búginde 3 myńnan astam oqýshy oqıdy. Oqýshy oryndarynyń sanyn arttyrý maqsatynda qosymsha qurylys salynyp jatyr, ol qosymsha taǵy 1,2 myń oqýshyǵa arnalǵan oryndar qurýǵa múmkindik beredi.
Sondaı-aq Premer-Mınıstrdiń orynbasary erekshe bilim berilýine qajettiligi bar balalarǵa arnalǵan №1 arnaıy mektep-ınternatynyń jumysymen tanysty.
Eraly Toǵjanov ınklıýzıvti bilim berýdiń negizine balalardy kez kelgen kemsitýdi boldyrmaıtyn, barlyq adamdarǵa teń qarym-qatynasty qamtamasyz etetin, erekshe bilim berý qajettilikteri bar balalar úshin erekshe jaǵdaı jasaıtyn ıdeologııa engizilgenin atap ótti.
Aıta keteıik, Nur-Sultan qalasynda ınklıýzıvti oqytýdy qajet etetin 14 myńnan astam bala turady. 3 mamandandyrylǵan bilim berý uıymdarynyń bazasynda 1204 bala úshin oqytý uıymdastyrylǵan. №1 arnaıy mektep-ınternatta 520 bala oqıdy, 125 oryndyq ınternat bar.
№1 arnaıy mektep-ınternattyń qolda bar ınfraqurylymy kúndizgi/saǵattyq bolý sheńberinde qosymsha sabaqtar ótkizý úshin erekshe bilim berilýine qajettiligi bar balalar kontıngentin keńeıtýge múmkindik beredi. Bul múmkindik múgedek balalardy tárbıelep otyrǵan ata-analarǵa júktemeni azaıtýǵa yqpal etedi.
Sondaı-aq Eraly Toǵjanov elordanyń bilim berý uıymdary óz mysalynda múmkindigi shekteýli adamdardy oqytý men kásibı daıarlaýda kedergisiz ortanyń qalaı qurylatynyn kórsetýde úlgi bolýy tıis ekenin atap ótti. Jyl saıyn jańa bilim berý obektileri engiziledi, jobalyq qujattama ázirlengen sátten bastap olar múmkindigi shekteýli balalardy oqytý úshin jaǵdaı jasaý jónindegi sharalar keshenin eskerýi tıis.
«2021 jyly Memleket basshysy ınklıýzıvti bilim berý máseleleri boıynsha zańnamalyq ózgeristerge qol qoıdy. Dál osy zańnamalyq aktide bastapqy jáne bazalyq negizder qalanǵan. Jaýapty memlekettik organdardyń mindeti – zańnamalyq normalardyń múltiksiz oryndalýyn qamtamasyz etý», dedi E.Toǵjanov.
Sapar sońynda vıse-premer qaıta qurýdan keıin jaqynda ashylǵan Kóktal-2 turǵyn alabyndaǵy «Qorǵaljyn» saıabaǵyna bardy. Skverde balalar men eresekterdiń bos ýaqytyn ótkizýge arnalǵan alańdar, mádenı jáne qoǵamdyq is-sharalar ótkizýge arnalǵan aımaq, sport alańy bar. Munda shahmat pen ústel tennısine arnalǵan ústelder ornatylǵan.
Nysandy aralaý barysynda E.Toǵjanov Kóktal-2 turǵyn alabynyń turǵyndarymen kezdesý ótkizdi, onyń qorytyndysy boıynsha qala ákimdigine jáne múddeli memlekettik organdarǵa tıisti tapsyrmalar berildi.
