«Kún tártibindegi basty másele - bas qalanyń aınalasynda azyq-túlik beldeýin qurý boldy. Búgingi tańda astanada qala turǵyndaryn azyq-túlikpen qamtamasyz etetin agroónerkásiptik keshenniń 56 sýbektisi bar. Bul un tartý kásiporyndary, nan zaýyttary, shujyq ónimderi men sút ónimderin óndiretin kásiporyndar, kókónis bazalary jáne jylyjaı kesheni», dedi vedomstvo basshysy.
Erbol Qarashókeevtiń aıtýynsha, 2025 jylǵa deıin Nur-Sultannyń aınalasynda azyq-túlik beldeýin qurý aıasynda AО́K salasyna 625,7 mlrd teńge baǵyttalady. Bul qarjyǵa 256 ınvestısııalyq jobany iske asyrý, sondaı-aq olarǵa ınjenerlik-kommýnıkasııalyq ınfraqurylym júrgizý josparlanyp otyr. Sondaı-aq qýattylyǵy jylyna 10 000 tonna kókónis bolatyn 2 jylyjaı kesheniniń qurylysy aıaqtalýǵa jaqyn.
Munyń barlyǵy maýsymaralyq kezeńde aýyl sharýashylyǵy ónimderi tapshylyǵynyń ornyn toltyrýǵa jáne elordalyq bazarlarda baǵany turaqtandyrýǵa, sondaı-aq 2000-nan astam jumys ornyn qurýǵa múmkindik beredi. Mınıstr kezdesýge qatysqan kásipkerlerdi osy jumysqa belsendi qatysýǵa shaqyrdy.
Atap aıtqanda, bıylǵy jyly Memleket basshysynyń tapsyrmasy boıynsha agroónerkásiptik keshendi memlekettik qoldaý qoldanystaǵy sýbsıdııalaý qaǵıdalary boıynsha júzege asyrylady. Al 2023 jyldyń 1 qańtarynan bastap sýbsıdııalaýdyń jańa tetigi iske qosylady.
Budan bólek, mınıstr aýyl sharýashylyǵy taýar óndirýshilerine agroónerkásiptik keshendi damytý boıynsha Úkimet pen Aýyl sharýashylyǵy mınıstrligi qabyldaǵan daǵdarysqa qarsy sharalar týraly aıtyp berdi.
