Jastar saraıynda ótken is-sharaǵa óńir basshysy Arhımed Muhambetov, «Otbasy bank» AQ-nyń basqarma tóraıymy Lázzat Ibragımova, sondaı-aq oblys ákimdigi janyndaǵy jastar isi jónindegi keńes músheleri men belsendi jastar qatysty.
Jas otbasylar men jas mamandardyń baspana satyp alýyna kómek kórsetý maqsatynda iske qosylǵan «Jas shańyraq» óńirlik baǵdarlamasyn oblys ákimdigi men «Otbasy bank» AQ oblystyq fılıaly birlesip ázirlegen. Baǵdarlama, negizinen joǵary suranysqa ıe salalarda eńbek etip júrgen 35 jasqa deıingi jas mamandarǵa arnalady. Bul oraıda oblys ákimdigi men «Otbasy bank» AQ-nyń birlesken qarajaty esebinen jastarǵa turǵyn úı satyp alýǵa jetetin qarjy nesıe retinde beriletin bolady.
– Biz jas otbasylar men jas mamandardy qoldaýǵa múddelimiz. Soǵan oraı, osy sanattaǵy jastarǵa turǵyn úı alýǵa kómektesý úshin «Jas shańyraq» óńirlik baǵdarlamasyn ázirledik. «Otbasy bank» AQ basshylyǵy bul bastamaǵa qoldaý jasady, sol úshin biz erekshe alǵys bildiremiz. «Jas shańyraq» baǵdarlamasy ázirge Qostanaı qalasynyń aýmaǵynda qanatqaqty joba retinde iske asyrylatyn bolady. Bul maqsatta 700 mln teńge qarjy qarastyrylyp otyr. Onyń 350 mln teńgesi «Otbasy bank» AQ qarajaty esebinen, qalǵany jergilikti bıýdjetten bólinetin bolady. Atalǵan jobany iske asyrý barysynda bıyldyń ózinde 50 jas otbasy baspana qýanyshyn sezinetin bolady. Aldaǵy ýaqytta biz bul baǵdarlamanyń aýqymyn keńeıtip, búkil oblys kólemin qamtý jaǵyn qarastyrýdy kózdep otyrmyz, – dedi oblys ákimi Arhımed Muhambetov.
Baǵdarlamaǵa qatysýǵa úmitti jastar Qostanaı qalasynda keminde 1 jyl turaqty tirkeýde turýy shart. Sondaı-aq densaýlyq saqtaý, turǵyn úı-kommýnaldyq sharýashylyq, áleýmettik qyzmetter sııaqty joǵary suranysqa ıe salalarda keminde 1 jyl jumys ótili bolýǵa tıis.
О́tinish berýshi jáne onyń otbasy músheleriniń el aýmaǵynda sońǵy 5 jyl ishinde turǵyn úıi jáne ıelikten shyǵarý faktileri, sondaı-aq memlekettik baǵdarlamalar boıynsha alynǵan jalǵa beriletin turǵyn úıleri bolmaýǵa tıis. Baǵdarlamaǵa erli-zaıyptylardyń bireýi ǵana qatysa alady.
Irikteý rásiminiń ashyqtyǵyn qamtamasyz etý jáne turǵyndar tarapynan týyndaýy múmkin narazylyqty boldyrmaý maqsatynda qatysýshylardy irikteý baldyq júıe boıynsha jáne táýelsiz konkýrstyq komıssııanyń otyrysyn ótkizý arqyly júrgiziledi.
– Jalpy, aǵymdaǵy jyldyń qorytyndysy boıynsha biz 450,5 myń sharshy metr turǵyn úı salyp, paıdalanýǵa berýdi josparlap otyrmyz, bul ótken jyldyń kórsetkishterinen áldeqaıda artyq, – dedi oblys ákimi.
Is-shara barysynda aımaq basshysy oblystaǵy jastar saıasatynyń júzege asyrylý barysyna da toqtalyp, jastarǵa memleket tarapynan kórsetilip jatqan memlekettik qoldaýdyń kóp ekenin tilge tıek etti. Ákimniń aıtýynsha, búginde óńir turǵyndarynyń 18 paıyzyn jastar quraıdy. Oblysta turatyn jastardyń sany shamamen 152 myńnan asqan. Sońǵy jyldary memlekettik jastar saıasatyn iske asyrý barysynda jastardyń ózekti máselelerine erekshe kóńil bólinip, kóptegen ıgi jobalar júzege asyrylǵan.
Máselen, «Bıznestiń jol kartasy» baǵdarlamasy boıynsha jyl basynan beri 100-den astam jas azamat granttyq qoldaý men sýbsıdııaǵa ıe bolǵan. Onyń ishinde 7 jobaǵa jalpy kólemi 30 mln teńgeniń granty berilse, 43 jobanyń avtory 350 mln teńgege ıe bolyp otyr. Sondaı-aq jas kásipkerler ázirlegen 51 jobaǵa jalpy somasy 1 mlrd teńge sýbsıdııa bólingen.
Ulttyq kásipkerlikti damytý jobasy boıynsha 5 myńnan astam jas azamat jumysqa ornalastyryldy.
О́ńirde jastardy jumyspen qamtý maqsatynda «Jasyl el» jobasy tıimdi júzege asyrylýda. Joba aıasynda tamyz aıynyń aıaǵyna deıin keminde 1 800 azamatty jumysqa ornalastyrý kózdelip otyr.
Qostanaı oblysy
