Qoǵam • 31 Tamyz, 2022

Temir jol ótkelderinde tekke ótip jatqan esil ýaqyt

231 ret kórsetildi

Astananyń úlken aınalma joly paıdalanýǵa berilgeli jolaýshylardyń ýaqyty, kólik júrgizýshileriniń janar-jaǵarmaıǵa jumsalatyn shyǵyny edáýir únemdelip, bári de rıza bolyp júrýshi edi. Alaıda bıyl Býrabaı kýrortyna demalýǵa baratyn, sondaı-aq Kókshetaý men Qyzyljar óńirlerine saparlaıtyn jáne sol jaqtardan elordaǵa san sharýa­men keletin azamattardyń burynǵysha mashaqat shegýlerine týra kelip tur.

«QazAvtoJol» ulttyq kompanııasy» AQ bıylǵy naýryzdyń ortasynda: «Respýblıkalyq mańyzy bar R-10 Nur-Sultan qalasynyń Soltústik-Batys aınalma jolynyń 4 shaqyrymynda oryn alǵan apatty jaǵdaıǵa baılanysty atalǵan joldyń 1,4-shaqyrymynan bastap    6-shaqyrymyna deıingi telimi bıylǵy jyldyń 25 naýryzynan 15 tamyzyna deıin kúrdeli jóndeý jumystaryn júrgizý úshin jabylmaq. Osy oraıda Nur-Sultan qalasynyń jáne Aqmola oblysynyń turǵyndary men qonaqtaryna, sondaı-aq barlyq tranzıttik júrgizýshilerge balama jol baryn eskertemiz. Jeńil kólik ıeleri qala ishimen, Lesozavod eldi mekeni arqyly júre alatynyn, al júk kólik ıeleri úshin Shyǵys aınalma jolynyń bar ekenin eske salamyz», degen habarlama taratqan bolatyn. Árıne, bul aqparat kólik júrgizýshileriniń báriniń qaperine jete qoımaǵany anyq. Sondyqtan olardyń kóbi saparǵa shyqqanda burynǵysha astananyń Soltústik-Batys aınalma jolynyń 1,4 shaqyrymyna deıin barady. Sol arada aldarynan shyqqan «QazAvtoJol»  qyzmetkerleri ári qaraı ótkizbeı, Lesozavod arqyly júrý kerektigin aıtady. Astanalyqtar men elorda meımandarynyń keminde bir saǵat ýaqytyn alatyn sergeldeń osylaı bas­talady. Birinshiden, Lesozavodqa qalaı barý kerektigin nusqaıtyn eshqandaı jol siltegish ornatylmaǵan. Sonyń saldarynan júrgizýshiler qalaǵa qaıta kirgende Petropavl baǵytyna shyǵar joldy árkimnen bir surap áýrege túsedi. Ekinshiden, avtokólikter astananyń shet jaǵyndaǵy úsh  temir jol ótkelinen ótedi. Jolaýshy jáne júk poıyzdary ersili-qarsyly aǵylyp jatqandyqtan, atalǵan temir jol  ótkelderinde únemi avtokólik keptelisi paıda bolady. Uzyn-sonar kezekte turǵan asyǵys júrgizýshilerdiń qaısybiri jol júrý erejesin buzyp, kólikterdiń soqtyǵysý oqıǵalary da ushyrasyp jatady. Al aınalma joldy qalpyna keltirý jumystary uzaqqa sozylyp barady. Áýelde 25 tamyzǵa deıin aıaqtalýǵa tıis kúrdeli jóndeý áli biter emes. «QazAvtoJol» AQ-nyń habarlaýynsha, bul jumysty támamdaý endi qyrkúıek aıynyń sońyna belgilenip otyr. Bul ne qylǵan jaıbasarlyq?!

Jalpy, temir jol boıyndaǵy jer ústi ótkelderinde qalyptasqan keleńsiz jaǵdaı – kópten beri kóterilip kele jatqan kókeıkesti másele. IIM Kóliktegi polısııa departamentiniń málimetine qaraǵanda, elimizde bıylǵy jyl basynan beri temir joldan ótý kezinde 39 adam apatqa ushyrap qaza tapqan. Jaqynda  Qostanaı oblysynda temir jol ótkelinen tezdetip ótip ketpekshi bolǵan «Jıgýlı» avtokóligi jyldam kelip qalǵan júk poıyzynyń astyna túsip, eki adam jan tapsyrypty.  

Budan birer jyl buryn Qyzylorda oblysy Aral qalasynyń turǵyndarymen kezdeskenimizde olar osy shahardy ekige jaryp ótetin temir jol ótkeli máselesin jandary qınala aıtqan edi. Sol ótkeldiń jabyq shlagbaýmy aldynda kezek kútip turatyn kólikter kerýeniniń uzyndyǵy 3 shaqyrymǵa deıin sozylady eken. Sebebi bul temir jol ótkeli poıyzdardyń jıi qatynaýyna baılanysty táýligine 40 retke deıin jabylatyn bolyp shyqty. Tipti «Jedel járdem» kólikteri de kepteliste amalsyz bógelip,
aýrýdan jandary qysylyp jatqan naýqastarǵa der kezinde jete almaıdy eken. Araldyqtar osyndaı tuıyqtan shyǵar jol – temir jol ótkeliniń ornyna kópir salý ekenin aıtyp kele jatqanyna on shaqty jyl bolǵanymen, másele qarjy tapshylyǵyna baılanysty sheshimin tappaǵan. Bilýimizshe, bıyl ǵana seń ornynan qozǵalǵan syńaıly.

Ata Zańymyz boıynsha Qazaqstan Respýblıkasynyń eń qymbat qazynasy – adam jáne adam ómiri. Úkimet temir jol ótkelderindegi jaǵdaıǵa muqııat nazar aýdaryp, qazaqstandyqtardyń esil ýaqytyn tekke ótkizbeý jáne qaýipsizdigin kúsheıtý amaldaryn qarastyrsa, quba-qup.

Sońǵy jańalyqtar

Astana qalasynyń ákimi aýysty

Taǵaıyndaý • Keshe

Uqsas jańalyqtar