Ishine otty sý tússe, kólik rýline jarmasatyndardyń qarasy áli sıremeı tur. Qara jol qatelikti keshirmeıtinin bile tura mas kúıinde kólik júrgizýden bas tartpaıtyndardyń sany kún ótken saıyn órshı túspese, kemıtin túri joq. Tekserý jumystary taǵy da jaǵa ustatatyn kórsetkishterdi anyqtap berdi. Bar bolǵany 22 kúnniń ishinde mas kúıinde kólikti basqarǵan 75 júrgizýshi polısııa qyzmetkerleriniń nazaryna ilikti.
Mas kúıinde bir ret ustalǵannan keıin sabaq alǵandy jón kórmeıtinder de bar. Derekterge sensek, ustalǵandardyń biri jol-kólik oqıǵasynyń sebepkeri bolypty. Al 5 azamat masań kúıinde qaıtadan kólik júrgizýge kirisip ketken. Osylaısha, olar bir emes, ekinshi ret ustalyp otyr.
Turar Rysqulov aýdanynyń ortalyǵy Qulan aýylynyń «Jibek joly» kóshesinde jol-kólik oqıǵasy tirkelgen. 57 jastaǵy «Mersedes» avtokóliginiń júrgizýshisi meıramhana mańyndaǵy turaqqa qoıylǵan taǵy bir «Mersedesti» soqqan. Medısınalyq kýálandyrý qorytyndysy jol-kólik oqıǵasyna sebepker bolǵan azamattyń orta dárejede mas bolǵanyn anyqtapty. Búgingi tańda atalǵan derekke qatysty Qylmystyq kodekstiń 346-baby 2-bóligimen sotqa deıingi tergeý amaldary júrgizilip jatyr. Avtokólik aıyp turaǵyna qoıyldy.
Tártip saqshylarynyń jedel áreket etýiniń arqasynda mas kúıinde kólik júrgizgen azamattar der kezinde ustalyp jatyr. Alǵashqy jartyjyldyqta 16 azamat kólikti mas kúıinde ekinshi ret júrgizgeni úshin qylmystyq jaýapkershilikke tartylǵan. Olardyń qataryna taǵy da 5 adam qosylyp otyr.
Ishimdik iship kólik júrgizgen 396 óńir turǵyny buǵan deıin de15 táýlikke qamalyp, 7 jyl boıy kólik basqarý quqyǵynan aıyrylǵan eken.
Jambyl oblysy
