Premer-Mınıstr Memleket basshysy qazirgi jaǵdaıda ekonomıkanyń sapaly damýyn qamtamasyz etýge jáne halyqtyń ál-aýqatyn arttyrýǵa baǵyttalǵan júıeli jáne salalyq sharalar keshenin aıqyndap bergenin atap ótti.
«Osy mańyzdy qujatta búgingi tańda azamattarymyzdy tolǵandyryp otyrǵan negizgi máselelerdiń bári qamtylǵan. Joldaýda aıtylǵan mindetterdi sheshý ekonomıkanyń turaqtylyǵyn jáne onyń básekege qabilettiligin arttyrýǵa negiz bolady», — dedi Úkimet basshysy.
Ulttyq ekonomıka mınıstri Álibek Qýantyrov ekonomıka men memlekettik basqarýdaǵy reformalardy iske asyrý jónindegi negizgi sharalar, Premer-Mınıstrdiń orynbasary – qarjy vıse-mınıstri Erjan Birjanov bıýdjet, salyq saıasaty jáne memlekettik satyp alý, ındýstrııa jáne ınfraqurylymdyq damý mınıstri Qaıyrbek О́skenbaev kólik, ónerkásip jáne qurylys máseleleri, aýyl sharýashylyǵy mınıstri Erbol Qarashókeev agroónerkásip keshenin damytý máseleleri týraly baıandady.
Sondaı-aq ekologııa, geologııa jáne tabıǵı resýrstar mınıstri Serikqalı Brekeshev sýmen qamtamasyz etý jáne jer qoınaýyn paıdalaný salalaryn jaqsartý jónindegi josparlar, ádilet mınıstri Qanat Mýsın reformalardy zańnamalyq qamtamasyz etý jóninde, ishki ister mınıstri Marat Ahmetjanov quqyq qorǵaý júıesin reformalaý jáne nashaqorlyqqa qarsy kúres máseleleri, oqý-aǵartý mınıstri Ashat Aımaǵambetov mektepke deıingi jáne orta bilim berý máseleleri, ǵylym jáne joǵary bilim mınıstri Saıasat Nurbek joǵary bilim berýdi damytý máseleleri týraly aıtty.
Sonymen qatar densaýlyq saqtaý mınıstri Ajar Ǵınııat densaýlyq saqtaý salasyn odan ári damytý jónindegi sharalar týraly, al eńbek jáne halyqty áleýmettik qorǵaý mınıstri Tamara Dúısenova áleýmettik saıasat máseleleri jóninde baıandady.
Baıandamashylardy tyńdaǵan Premer-Mınıstr Memleket basshysynyń tapsyrmasy boıynsha memleket pen qoǵamnyń barlyq negizgi salalaryn qaıta jańǵyrtý kerek ekenin aıtty.
«Mazmuny jaǵynan Prezıdenttiń halyqqa Joldaýy Jańa Ádiletti Qazaqstan qurý jolyndaǵy eń mańyzdy qadam bolyp tabylady. Qazirgi jaǵdaıda bárimiz naqty jáne úılesimdi áreket etýimiz qajet», dedi Álıhan Smaıylov.
Premer-Mınıstr Úkimettiń aldynda ekonomıkanyń turaqtylyǵy men básekege qabilettiligin, azamattarymyzdyń ál-aýqatynyń sapaly jáne ınklıýzıvti ósýin arttyrý, bárine birdeı múmkindikter berý, qoǵamdyq qaýipsizdik pen ishki turaqtylyqty saqtaý mindetteri turǵanyn atap ótti.
Osyǵan baılanysty Úkimet basshysy Ulttyq ekonomıka mınıstrligine orta merzimdi kezeńge arnalǵan Ekonomıkalyq saıasat jobasynda Prezıdenttiń eldiń áleýmettik-ekonomıkalyq damýy boıynsha aıtqan baǵyttaryn eskerýdi tapsyrdy.
