Mádenı is-sharaǵa Parlament Senatynyń Tóraǵasy, Álemdik jáne dástúrli dinder lıderleri Sezi Hatshylyǵynyń Basshysy Máýlen Áshimbaev qatysty.
«Aldaǵy Sezd sany jaǵynan ǵana emes, qatysatyn din lıderleriniń mártebesi men deńgeıi jaǵynan da tarıhı is-shara bolmaq. Forýmǵa qatysý úshin álemniń 50-den astam elinen 100-den astam delegasııa keledi. Sezde beıbitshilikti qamtamasyz etýge, dıalog pen yntymaqtastyq ıdeologııasyn ilgeriletýge qatysty máseleler talqylanady. Qazir álemde saıası daǵdarys oryn alyp otyr. Kóshbasshylardyń kelissózder júrgizýi jáne ymyraǵa kelýi qıyn máselege aınaldy. Osyndaı jaǵdaıda rýhanı kóshbasshylardyń birlesip jumys isteýge jáne álemniń ár túkpirindegi ózekti máselelerdi kóterip, olardy sheshýge degen umtylysyn aıryqsha atap ótken jón», dedi Máýlen Áshimbaev óz sózinde.
Aıta ketsek, Álemdik jáne dástúrli dinder lıderleriniń VII Sezine oraı uıymdastyrylǵan is-sharada «Eń kópultty orkestr» atalymy boıynsha jańa álemdik rekord tirkeldi. Jańa rekord Gınnes kitabyna engizildi.
Senat Tóraǵasy is-sharany uıymdastyrýshylar men mýzykanttardy jańa rekordtyń tirkelýimen quttyqtady.
«Mádenıet pen óner ultyna, dinine jáne áleýmettik jaǵdaıyna qaramastan adamdardy biriktirýshi kúshke ıe. Búgin biz tarıhı oqıǵanyń kýási boldyq. Rekordtyń Álemdik jáne dástúrli dinder lıderleriniń VII Sezi qarsańynda tirkelýi de aıryqsha mánge ıe. Bul – bizdiń elimiz úshin ǵana emes, búkil álem úshin, ásirese, qazirgideı qıyn-qystaý kezeńde mańyzdy oqıǵa. Jańa jobanyń túpki maqsaty VII Sezdiń ıdeologııalyq baǵytymen tolyq úndesedi. Ol – dıalog, yntymaqtastyq jáne álemdegi qazirgi ózekti problemalardy birlesip sheshý sııaqty basymdyqtar», dep atap ótti Senat Tóraǵasy.
Aıta ketsek, Gınnes kitabyna engen «eń kópultty orkestrdiń» quramynda 75 etnostyń ókilderi bar. Olardyń barlyǵy respýblıkalyq jáne halyqaralyq konkýrstardyń laýreattary atanǵan.
