Aıjan Esmaǵambetova 1 qazannan bastap elde tumaýǵa qarsy vaksınasııa naýqany bastalatynyn eske saldy.
«Jyl saıyn epıdemııalyq maýsymnyń bastalýyna deıin biz vaksınasııa naýqanyn ótkizemiz. Osylaısha adamdardyń ımmýnıteti nyǵaıa túsedi», dedi vıse-mınıstr.
Aıjan Esmaǵambetovanyń málimetinshe, bıýdjet esebinen tumaýǵa qarsy vaksınanyń 2,3 mln dozasy satyp alyndy. 20-25 qyrkúıekke deıin vaksınalardy aımaqtarǵa bólip jetkizý aıaqtalady.
Kelesi sanattaǵy adamdar bıýdjet qarajaty esebinen egiledi:
- jıi aýyratyn balalar;
- dıspanserlik esepte turǵan balalar;
- 60 jastan asqan, jabyq medısınalyq-áleýmettik mekemelerdegi adamdar;
- júkti áıelder.
«Turǵyndar óz qarajaty esebinen ekpe saldyra alady. Ortasha alǵanda, ótken jylǵy baǵa aıtarlyqtaı ózgergen joq. Byltyr bul shamamen 3 myń teńge bolatyn, bıyl biz jeke sektorda bul vaksınanyń qansha turatynyn áli bilmeımiz», dep tolyqtyrdy Aıjan Esmaǵambetova.
